Luka 21

1LOMBA eŵinula menso noŵaŵona asambazi enzopoza vyabule vyaŵo motilila. 2Naye eŵona mwanakazi wofwilwa mkavu chite opozamo mula tundalama tuŵiri. 3Echiti, Ng'aleze numuuzyani kuti uyu mwanakazi wofwilwa mkavu wapozamo zyoŵapula ŵonse: 4pakuti ŵonse aŵa apozamo mmapakilo ŵaŵo pa vyabule: sembe yeve mu ukavu wake wapozamo vyonse vyenze navyo.

5Lomba ŵambi penzolaŵira zya chipupilo, umo mchusamikiwira na myala iweme na mitulo, yeve echiti, 6Ivi vimuŵona, nsiku ziti zize ziuti ukanosiiwa apa mwala umo pa uyake, wamene uti ukanowishiwa pansi. 7Naŵo emkonsha kuti, Asambizi, nga ivi viŵepo zuŵanji? nga chiziŵikwilo chiŵe syani chakuti ivi viri pafupi nochitika? 8Naye echiti, Chenjerani mngaluvishiwe: pakuti anyinji aaze mzina langu akuti, Ne nine wamene; na kuti, Nsita yafwikila: msaŵakonka. 9Namwe mkazakumvwa zya nkondo na viwawa msachita chintente: pakuti ivi tangavichitike, sembe posila nte lomba.

10Pamene apo eŵauzya, Mtundu uzoukirane na mtundu, na ufumu nofumu: 11paze paŵe visung'unzyo vikuru vya charo, na vilala na vimumpe mmalo mmalo; paze paŵe vyoyofya na viziŵikwilo vikuru kufuma kumulu. 12Sembe pavikaliyoŵapo ivi vyonse azamkateni nomtamanisyani, nomsuzulani ku masunagoge na mtumbolimboli, nomtwalani pa menso pa mafumu na manduna chikomo cha zina langu. 13Kuze kuyaruke kuli mweo kuŵa untoni. 14Teti mnkazikike mmitima yanu kusalukanira futira mumti muyasukire: 15pakuti neo nimpeni pakanwa na nzeru zyati akanokumako ŵonse ompatani kuzisusya kano kuzikanikizya. 16Sembe mweo mze msuzuliwe chukanga na emvyalani, na akwanu, na a vumo limo, na enekwanu; na ŵambi a mweo azampaisyeni. 17Namwe mze mtinkiwe na ŵantu ŵonse chikomo cha zina langu. 18Leka limo sisi la mmutu wanu liti litaikepo. 19Mkukoselela kwanu ni mumti msungire mizimu yanu yamoyo.

20Sembe apo mkazoŵona Yerusalemi uzingiwa na maumba a nkondo, pamene apo ninga mziŵe kuti mapapuliwe a wine ali pafupi. 21Pamene apo ŵala ali mu Yudaya nautukire ku malupiri; na ŵala ali mwamene nafumemo; na ŵala ali ku minda asaloŵamo. 22Pakuti aŵa ni masiku a msanzukulo, wakuti vyonse vilembewa visilizike. 23Malilo kwa ŵala ana mavumo na kwa ŵala onyonsha mmasiku ŵala! pakuti paze paŵe mkululusyo ukuru pa charo cha pansi, na kwanyekera mtima ŵantu aŵa. 24Aawe nolumate wa chinkalammanja nokatiwa a mnsinga kuya ku mitundu yonse: na Yerusalemi uzonyantiwenyantiwe na a Mitundu mpaka nsita zya a Mitundu paziti zisilizike. 25Paze paŵe viziŵikwilo pa zuŵa na mwezi na ntandara; na pa charo cha pansi mazuzyo a mitundu, pokanganya pa mlulumo wa chimana na magapigapi ŵake; 26ŵantu akufwa tutu na mwezo nololera vintu viti vize pa charo: pakuti mpamvu zya mlulezi zize zisung'unzikiwe. 27Pamene apo ninga azamuŵone Mwana wa muntu akuza mlukumbi ana vizo na mchinzi ukuru. 28Sembe ivi vikazotatikoŵapo mololesya kumulu noŵinusya mitu; chikomo kununuliwa kwanu kwafwikila.

29Lomba eŵasimikira linganizyo: Ŵonani chimuti cha chiku na vimiti vyonse: 30pamene lomba pavutumba muviŵona noziŵa mweka kuti mainza afwikila. 31Tetyo namwe soti, apo mkazoŵona ivi vuchitika, ziŵani kuti ufumu wa Mlungu wafwikila. 32Lezee numuuzyani kuti luko luno siliti lize lilope mpaka vyonse paviti vize visilizike. 33Charo cha kumulu na cha pansi vize vilope: sembe malizu ŵangu salopa.

34Sembe mweo molichenjezya mwaŵene, kano mitima yanu ingolemelwa na malyalya nokolwa walwa, na vyatupwe vya mmoyo uno, na siku lila lingamzileni kovurumukizya nga ni chitembo: 35pakuti ni mliti lize liŵazile ŵonse ŵala onkala pa chinso cha charo chonse cha pansi. 36Sembe mweo mwakuŵa tuni nsita zyonse, mopapatira kuti mulikoselezye kupuzumukila ivi vyonse viti vize viŵepo, nopanama pa menso pa Mwana wa muntu.

37Naye nsiku zyonse enzosambizya mchipupilo, nosiku wonse efumamo nonkala mlupiri luitiwa lwa Elaya. 38Naŵo ŵantu ŵonse echerera kwake umo mchipupilo kuza kummvwa.

Currently Selected:

Luka 21: MA23

Highlight

Copy