Luka 16

1NAYE enena naŵo asambili, Enzepo chite msambazi, wamene enze na chilolesya; wamene uyo esimikizyiwa kwake kuti enzoŵomwazya vyake. 2Naye emuita echiti kwake, Nga ichi ni chinji chinikumvwa cha weo? upende vyochilolesya wako; pakuti sungaŵe soti chilolesya. 3Naye chilolesya enena mkati mwake, Nichitenji, poŵona kuti asikuru wangu onilonda uchilolesya? kulima niliye mpamvu; kusenga nuŵona nsoni. 4Nalukana chinti nichite, kuti pamene penti nilondewe uchilolesya anipokelele mnanda zyaŵo. 5Lomba akaŵaite kwake umo umo amangaŵa ŵa asikuru wake enena naye wotangula, Wina mangaŵa ŵanji kwa asikuru wangu? 6Echiti, Milingo makumi kumi ya mafuta. Naye emuuzya, Ula kalata kako, puvyonkala pansi ulembe makumi asano. 7Pamene apo elaŵira na muyake, Nawe una mangaŵa ŵanji? Echiti, Milingo makumi kumi ya mapira. Emuuzya, Ula kalata kako ulilembere makumi asano na atatu. 8Nipo asikuru wake emlumba ula chilolesya wosalungama pakuti echita kwa nzeru: chikomo ŵana a nsita ino pa luko lwaŵo ana nzeru zyopula ŵana a mkuŵala. 9Nane nikuti kuli mweo, Mulichitire mweka viuza na mpango zyosalungama, kuti zikazopereŵera azampokeleleni kankalilo maŵeromaŵero. 10Uyo ali wochetekereka pa katontotonto ni wochetekereka soti pa chikuru: na uyo ali wosalungama pa katontotonto ni wosalungama soti pa chikuru. 11Teti kati muliyekuŵa ŵochetekereka pa mpango zyosalungama, ni ŵani ati amsungisyeni mpango zyendi. 12Namwe kati muliyekuŵa ŵochetekereka pa vya mwine, ni ŵani ati ampeni vyanu mwaŵene? 13Paliye mlumbwana wa ng'anda angaŵe kapolo wa asikuru aŵiri: pakuti pambi amtinke umo nomtemwa muyake; pambi akatane na umo nompwazya muyake. Kumkangani kuŵa kapolo wa Mlungu na wa mpango kumo.

14Lomba Afarisayo amene enze ŵotemwa ndalama echimvwa ivi vyonse, naŵo emseka. 15Naye eŵauzya, Nimwe mulichisya ŵolungama pa menso pa ŵantu; sembe Mlungu oziŵa mitima yanu: pakuti icho chukwezyewa ku ŵantu ni chanyansa pa menso pa Mlungu. 16Dango na aŵirizi vyenzepo mpaka na Yohana: chitatikile nsita ila evangelo yofumu wa Mlungu yuŵirizyiwa, na ŵantu ŵonse oloŵamo kwa mantunya. 17Lomba ni chipepu ku charo cha kumulu na cha pansi vilope kupula ku kalembo ka mdango kaŵe katyala. 18Ali wonse omsuzula mkazi wake nolingula muyake ochita uchende: na uyo olingulana na wosuzuliwa na alume ŵake ochita uchende.

19Lomba enzepo chite msambazi, wovwala kaniki na nyula zya limpinti na kulya viweme nsiku zyonse: 20eikiwa pa mulyango pake chite wosenga zina lake Lazaro, wa vilonda mmuŵili wonse, 21esakochizyiwa na topona pa chilyero cha msambazi; inde, na imbwa zichizomyangula vilonda vyake. 22Lomba yenzepo kuti wosenga echifwa, euliwa na malaika ku chifuŵa cha Abrahamu: na msambazi echifwa noŵikiwa. 23Mu Hade eŵinula menso pakuŵa mmazuzyo, eŵona Abrahamu patali na Lazaro pa chifuŵa chake. 24Eŵirikizya echiti, Ŵata Abrahamu, munichitile lusungu, mtumeni Lazaro azuŵike nsongo ya munwe wake mmanzi nomyalalisya lulimi lwangu, panuzuzika pa mulilo uno. 25Sembe Abrahamu echiti, Mwanawe, kumbuka kuti weo pewenze moyo wenzopokera viweme vyako, tetyo na Lazaro viipa: sembe lomba omyalalikiwa pano, na weo uzuzika. 26Mpuzyo zya ivi, pakati pasu na mweo paluŵikiwe mulindi wonoka, kuti ŵopangwofumila kwasu kuza kwanu sangakumeko, notauka kufumila kwanu kuza kwasu paliye. 27Naye echiti, Napapata, ŵata, mtumeni ku ng'anda ya ŵata; 28pakuti nina akwasu asano; akaŵaŵonesye untoni angaze naŵo soti mmalo muno mozuzika. 29Sembe Abrahamu echiti, Ana Musa na aŵirizi; naŵamvwile ŵeve. 30Echiti, Yai, ŵata Abrahamu: akaŵaila muntu wofumila kwa akufwa angayaruke mitima. 31Emuuzya, Kati onyanyaizya Musa na aŵirizi, sangaŵetekewe na akazyuka muntu kwa akufwa.

Currently Selected:

Luka 16: MA23

Highlight

Copy