Luka 11

1NIPO yenzepo yeve enzolomba pachite, lomba akaleke umo wa asambili ŵake emnenera, Asikuru, tisambizyeni kulomba, nga ni umo Yohana naye mwechisambizyira asambili ŵake. 2Naye eŵauzya, Mkalomba monena, Ŵata, Zina lanu nalulemekewa. Ufumu wanu naukuza. [Vimupangwa navuchitiwa, nga ni kumulu tetyo na pano pansi.] 3Mtipe nsiku zyonse chakulya chasu cha nsiku. 4Mtilekere viipa vyasu, pakuti seo seka nase tuŵalekera amangaŵa ŵasu ŵonse. Msatiulila poyezyewa.

5Naye enena naŵo, Nga ni ŵani wa mweo angaŵe na chiuza nochiila pakati posiku nochiuzya, Muyangu, muniyapuzye mitanda itatu; 6pakuti chiuza changu chanizila, chiri polwendo, nane niliye kantu kochiteŵetera; 7naye ali mkati angayasuke na kuti, Msaniŵevya: ku mulyango lomba ni kozala, na ŵana ŵangu ali nane pamo pa mpasa; siniuka kumpani? 8Numuuzyani, Chukanga okanouka nompa pakuŵa chiuza chake, sembe chikomo cha ntina yake ni pati auke nompa vyonse vyakusaka. 9Nane nikuti kuli mweo, Sengani, ninga chipewe kwanu; sakani, ninga mfwange; kuntani, ninga chizuliwe kwanu. 10Pakuti ali wonse osenga opokera; na uyo osaka ofwanga; na uyo okunta chizuliwe kwake. 11Nga ni ŵani wa mweo akaŵa awisi, mwana wake akasenga mtanda angampe mwala? kano saŵi, angampe njoka pa malo pa saŵi? 12Kano akasenga sumbi kansi angampe chere? 13Teti kati mweo pamuli mwaipa muziŵa kuŵapa ŵana ŵanu mitulo iweme, nga Ausu wanu a kumulu angaŵape ngako kupula Mzimu Mtuŵa ŵala omsenga?

14Naye enzofumya chiŵanda chisilaŵira. Lomba yenzepo chikafume chiŵanda silaŵira elaŵira, na maumba ezuzuka. 15Sembe ŵambi ŵechiti, Kwa Beelzebule mkuru wa viŵanda uyu ni pakufumya viŵanda. 16Ŵambi naŵo pomuyezya esenga kwake chiziŵikwilo chofuma kumulu. 17Sembe yeve poziŵa malingililo ŵaŵo eŵanenera, Ufumu uli wonse ukayaŵanikana kulisusya wine uchishiwa masala; na chiŵanza chikayaŵanikana kususya chiŵanza chupasuka. 18Naye Satana soti akayaŵanikana kulisusya yeka, nga ufumu wake utang'e syani? pamulaŵira kuti nufumya viŵanda kwa Beelzebule. 19Kati neo nufumya viŵanda kwa Beelzebule, nga ŵana ŵanu ovifumya kwa ŵani? teti ni pati aŵe ŵompingulani. 20Sembe kati nufumya viŵanda na munwe wa Mlungu, lomba ufumu wa Mlungu ulumzileni. 21Apo wa chanalume ana mauta pakulindila luŵanza lwake viya vyake viri mtendere: 22sembe apo wa chanalume wompula akamzila nomkanga, omlonda mauta ŵonse ŵenzochetekera noyaŵa vyotapa vyake. 23Uyo asali nane pamo onisusya; naye wamene asaunjika nane pamo omwazya tyala. 24Uyo mzimu wa usali ukafuma mmuntu uyendayenda pa chinkamu kusaka popumula; lomba popumbula ukuti, Niwerere ku ng'anda kwangu kwinifuma. 25Nawo ukaza uifwanga yopyerewa nosamikiwa. 26Pamene apo ukuya noliulila mizimu iyakene isano na iŵiri iipa kupula wine; nayo yuloŵamo nonkala: na unkalo wosalilila wa muntu uyo ni uŵipa kupula ula wotatika.

27Nipo yenzepo pechinena ivi mwanakazi muyake wa mliumba etumpula lizu lake nomnenera, Lina shuko vumo limvyalani na maziŵa emwinyonka. 28Sembe yeve echiti, Ngakongako mwandi ana shuko aŵo olimvwa lizu la Mlungu nolisunga.

29Lomba maumba penzomuunganila etatikonena, Luko luno ni luko luŵipa: lusaka chiziŵikwilo; lomba sichiti chipewe chiziŵikwilo kuli leve, sembe chiziŵikwilo cha Yona. 30Pakuti nga ni umo Yona mwenzele chiziŵikwilo kuli Anineve, tetyo naye soti Mwana wa muntu ni mwati azaŵere ku luko luno. 31Mfumukazi ya kuli kampambe ize iukirane popinguzi ula na ŵantu a luko luno noŵapa mlandu: pakuti ifuma kunsilililo kwa mcharo kuza kumvwa nzeru zya Solomoni; lomba ŵonani, wompula Solomoni ali pano. 32Ŵantu ŵala a ku Nineve azaimirane popinguzi ula na luko luno nolipa mlandu: pakuti eyaruka mitima poŵirizya kwa Yona; lomba ŵonani, wompula Yona ali pano.

33Paliye muntu akayasya msaniko ouŵika mchisengu kano mnyansi mwa chitundu, sembe pa chikalo nipo, kuti ŵala oloŵamo akuŵone kuyaka. 34Msaniko wa muŵili wako ni liso lako: liso lako likaŵa lamsuma muŵili wako nawo ni wozula kuŵala; sembe likaŵa liipa muŵili wako nawo ni wozula mfinzi. 35Teti nkoŵona kuti kuŵala kuli mwako kusaŵa mfinzi. 36Teti kati muŵili wako wonse ni wozula kuŵala, uliye pa malo pafipa, uzozule kuŵala monsemonse, nga ni msaniko muukusanikira poyaka kwa wine ngwee.

37Lomba penzolaŵira Mfarisayo emkonsha akalye kwake: naye eloŵamo nonkala pakulya. 38Naye Mfarisayo akaŵone ezizwa pakuti aliyotangulosamba pakulya. 39Asikuru enena naye, Lomba Mwafarisayo musuka kunja kwa ntumo na kwa lulilo; sembe mkati mwanu muluzule malilizya na viipa. 40Mwe mwaŵopusa, kansi uyo ekupoza kunja sempoza mkati namo? 41Lomba ipani vyabule vya mkati; ŵonani, ninga vyonse vyakuŵa vyosukiwa kwanu.

42Sembe malilo kwanu, Mwafarisayo! pakuti mupatula chimo cha pa kumi chiŵoleŵole na tumbuto twa luta na ndiŵo zyonse, nolumpila upinguzi nomtemwa Mlungu: lomba ivi mngati mwivichita, nosavileka viyake vyosachitiwa. 43Malilo kwanu, Mwafarisayo! pakuti mutemwa vilimba vya mchinzi mmasunagoge na malonje a pa mawalo. 44Malilo kwanu! pakuti muli nga ni mitupa yosaŵoneka, na ŵantu okandapo ntoziŵapo.

45Lomba umo wa adango ŵala eyasuka emnenera, Asambizi, pamunena teti mutituzula nase kumo. 46Naye enena, Malilo kwanu namwe, mwadango! pakuti mutwalika ŵantu mitolo yovufya kutwala, namwe mweka simuisunka mitolo na umo wa minwe yanu. 47Malilo kwanu! pakuti muimanga mitupa ya aŵirizi ŵala ŵechipaya amausu wanu. 48Teti nimwe ntoni nozomerezyana na milimo ya amausu wanu: pakuti ŵeve eŵapaya, na mweo muimanga mitupa yaŵo. 49Teti soti nzeru ya Mlungu ichiti, Nize niŵatumire aŵirizi na apostolo; ŵambi ŵala azaŵapaye noŵatamanya; 50kuti mlopa wa aŵirizi ŵala ŵonse wivwishiwa chitatikile ponkazikika charo cha pansi uzopindiwe ku luko luno, 51chitatikile mlopa wa Abele mpaka mlopa wa Zakariya, echenekeka pakati popupila nsembe na pa ng'anda yozila: inde, numuuzyani uzopindiwe ku luko luno. 52Malilo kwanu, mwadango! pakuti mwichiimyapo chozulila cha maziŵilo: muliyoloŵamo mwaŵene, na ŵala ŵenzoloŵamo mwiŵalesya.

53Naye akafumemo mulamwa alembi ŵala na Afarisayo eyambomuyumilizya nomuŵala alaŵire vinyinji; 54emfisamila nomsonda mkanwa.

Currently Selected:

Luka 11: MA23

Highlight

Copy