M. Yohana 5

1PAVULI pa ivi kwenze siku likuru la Ayuda; na Yesu echiya ku Yerusalemi.

2Lomba pa Yerusalemi, pa chilyango cha mbelele, pali tenga loitiwa mChihebrayo Betesda, lina lukoro lwa mipata isano. 3Mwamene mula mwenzelele winji wa ŵolwala, ŵotulika menso, ŵopintya, na ŵonyala [enzolindila kuŵindusya manzi: 4pakuti malaika wa Asikuru enzosika nsita ziyake mtenga novundula manzi: nipo pavuli povundula manzi uyo etatikoponamo epoleshewa ntenda iri yonse yenze nayo.] 5Lomba enzepo chite enze na ntenda yake virimika makumi atatu na visano na vitatu. 6Yesu akamuŵone alilele noziŵa kuti ali tetyo lomba nsita ikuru emnenera, Upangwopozyewa kansi? 7Mulwele uyo emyasuka echiti, Asikuru, niliye muntu oniika umo mtenga pakuvunduliwa manzi: lomba panikuya neo muyake onipula nosikamo. 8Yesu emuuzya, Uka uule chisampi chako noyenda. 9Lomba pano apa muntu uyo epozyewa, eula chisampi chake eyenda.

Lomba siku lila lenze sabata. 10Teti Ayuda emuuzya uyo epozyewa, Ni pa sabata, ni chosazomereka kwako kuula chisampi chako. 11Lomba eŵayasuka echiti, Uyo wanipozya ni wamene waniuzya niule chisampi changu noyenda. 12Emkonsha kuti, Ni ŵani muntu wakuuzya kuula chisampi chako noyenda? 13Sembe uyo epozyewa nteziŵa ni ŵani: pakuti Yesu enyeremuka, pelenzepo liumba. 14Pavuli pake Yesu emfwanga mchipupilo emuuzya, Ŵona, wapozyewa: usaifya soti, chingaŵe chiipa chikuru kuli weo. 15Muntu efumapo eŵauzya Ayuda kuti, Wanipozya ni Yesu. 16Chikomo choteti Ayuda ni pechimuŵintila Yesu, pakuti echita ivi pa sabata. 17Sembe Yesu eŵayasuka echiti, Ŵata ochita mulimo mpaka lomba, nane nuchita mulimo. 18Chikomo choteti Ayuda ni pechililizyompaya, nte pakuti esula sabata leka, sembe soti kuti emtula Mlungu awisi, kolilinganya na Mlungu.

19Teti Yesu eyasuka enena naŵo,

Lezee lezee numnenelani, Kumkanga Mwana kuchita kantu pa yeka, sembe vyakuŵona Awisi pochita: pakuti viri vyonse vyakuchita ŵeve tetyo na Mwana ovichita vyamene. 20Pakuti Awisi omtemwa Mwana nomlangizya vyonse vyakuchita mwine yeka: na vikuru kupula ivi azamlangizye soti, kuti mozizwa mweo. 21Pakuti umo Awisi mwakuusyira akufwa noŵapa moyo, tetyo na Mwana soti ni mwakwapera moyo ŵakupangwa. 22Pakuti chukanga Awisi ntopingula ali wonse, lomba echipa Mwana upinguzi wonse; 23kuti ŵonse aŵomchinzika Mwana, nga ni umo mwakumchinzikira Awisi. Uyo asamchinzika Mwana somchinzika Awisi emtuma. 24Lezee lezee numnenelani, Uyo omvwila lizu langu nomzomera uyo enituma ana moyo wosasila, ntakuza kopinguliwa, lomba epita mu imfwa kuya ku moyo. 25Lezee lezee numnenelani, Nsita ikuza, inde ilipo lomba, yati akamvwe akufwa lizu la Mwana wa Mlungu; na aŵo omvwako azaŵe moyo. 26Pakuti umo Awisi mwalili moyo mwa yeka, tetyo ni mwechimpera na Mwana kuŵa moyo mwa yeka: 27naye empa nsaka yopinguzi, paali Mwana wa muntu. 28Msazizwa pa ichi: pakuti nsita ikuza yati akamvwe lizu lake ŵonse ali mmitupa 29nofumamo, ŵala echita viweme ku maukilo a moyo, na ŵala echita viipa ku maukilo opinguzi.

30Siningachite kantu neka: nga ni umo munumvwila ni mnupingulila: nopinguzi wangu ni wolungama; pakuti sinusaka vinupangwa namwine, sembe vyakupangwa uyo enituma. 31Kati nulichitira untoni namwine untoni wangu nteuli wendi. 32Onichitira untoni ni mumbine; nane nuziŵa kuti untoni wakunichitira ni wendi. 33Mwituma kwa Yohana, naye evichitira vyendi untoni. 34Sembe untoni unuchitiwa nte ku ŵantu: lomba nulaŵira ivi kuti mpulukwe mweo. 35Uyo enze msaniko uyaka nosanika ngwee: namwe mwenzozomera kutemwa kwa nsita noŵala kwake. 36Sembe untoni unili nawo ni ukuru kupula ula wa Yohana: pakuti milimo yechinitumbika Ŵata kuti niisilizye, milimo yamene iyi inukata, yunichitira untoni wakuti enituma ni Ŵata. 37Na Ŵata wamene enituma enichitira untoni. Mweo mkaliyekumvwa lizu lake nsita zyonse, kano kuŵona maŵonekero ŵake. 38Namwe simuli naŵo malizu ŵake ŵokalilila muli mweo: pakuti uyo wechituma simummvwila wamene uyu. 39Musazima malembo pamulinga muli ŵeve ni mmulili nawo moyo wosasila; na aŵa namene onichitila untoni; 40namwe mukanonizila mwakuŵa moyo. 41Sinupokera mchinzi ku ŵantu. 42Lomba numziŵani mweo kuti ntemuli nacho chintemwa cha Mlungu muli mweo. 43Neo nichiza mzina la Ŵata, namwe ntemunipokelera: kati umbi akaza mzina lake mwine mze mpokelere wamene. 44Nga mngazomere syani pamulonderana mchinzi, na mchinzi ufuma kwa Mlungu ali yeka ntemuusaka? 45Msalinga kuti nimpeni mlandu kwa Ŵata: kuli umo ompani mlandu, ni Musa, umuchetekera. 46Pakuti angati mummvwila Musa sembe munimvwila neo; pakuti elemba zya neo. 47Sembe kati simumvwila malembo ŵake, kansi mngamvwile syani malizu ŵangu?

Currently Selected:

M. Yohana 5: MA23

Highlight

Copy