मरकुस 1

यूहन्ना बाप्तिस्मा आपणारान पोरचार

(मत्ती 3:1-12; लूका 3:1-18; यूहन्ना 1:19-28)

1बोगवानान सोरो यीशु मसीहान सुवार्ता पोरचार सेवान सुरवात. 2जीही यशाया भविष्यवक्ता पुस्ताकाम लिखील हि का, “देखू मी आपणा दूताह तार ओगांण मोकेलथू, तो तार केरीन वाट तियार केरी.” 3“जेंगलामाय एक आयेडणारान शब्द होम्लाणे बाज रेनाह का” प्रभुन वाट तियार केरू, “एने तान सेडक्यू हिद्यू केरू.”

4यूहन्ना आवीन, तो जेंगलामाय यार्देन नदीन जागे बाप्तिस्मा आपतालु, एने पापान क्षमान केरता एने मोन फिरावणेन बाप्तिस्मान पोरचार केरतालु. 5तेवी आखा यहूदा देशाम एने यरूशलेमाय रेणार आखा निक्लीन ताफाय गीया, आप-आपणा पापाह मानीन यार्देन नदीमाय ताफायरीन बाप्तिस्मा लेणे लागा.

6यूहन्नाना उंटळान रोस्कान फाडका पेरतालु एने तान कोमरांह चांबडान कोमेरपोट्टो बांधील इतू, एने तान खाणो टीडया एने जेंगली मोवाल खाया केरतालु. 7एने ज्यो पोरचार केरतालो, मार पासाणरीन आवण्यो हि तो; माहुरीन भी शक्तीशाली हि, मार लायकी ओलिक नाह सोती का मी डोंगो पोडीन तान पायान खाहडान बोंद सोडू. 8मी ते तुमरो बाप्तिस्मा पाण्या केरीन केरील हि, पुण तो ते तुमरो बाप्तिस्मा पवित्र आत्मा केरीन केरी.

यीशुन बाप्तिस्मा एने परिक्षा

(मत्ती 3:13; 4:11; लूका 3:21,22; 4:1-13)

9ता दिहामाय यीशु गलील ने नासरेथ रीन आवीन यूहन्ना फायरीन यार्देन नेंदीमाय तान बाप्तिस्मा एनो. 10एने तो पाण्या मायरीन निक्लीन उपेर आवतालू, तेवी चालूच आकाश उगेडतालो एने आत्माह कबुतरान रूपामाय आपणे उपेर उतरतालो देखायेल. 11तेवी आकाशवाणी एनी का, “तू मारो प्रिय सोरो हि, तार बारामाय मी आनंद हि.”

12तेवी पवित्र आत्मा ताह चालूच जेंगलामाय ली गीयू. 13एने जेंगलामाय चालीह दिह वोर शैतान तान परिक्षा लेदो; एने तो जेंगली जेनावरा हेर्यो एतो एने स्वर्गदूत तान सेवा केर्ते रिनो.

यीशुन सेवान सुरुवात

(मत्ती 4:12-17; लूका 4:14,15)

14यूहन्नाहा अटक ला बादमाय यीशु गलील माय आवीन बोगवानन राज्यान पोरचार केणे लागिल. 15तो कियेल, काल्लान पूर्णता एनीह एने बोगवानन राज्य आहने आव जाईल हि मोन फिरावू पोस्तावू केरू एने सुवार्ता पोर विश्वास केरू ओवतो.

बोयटाह हाद्णु

(मत्ती 4:18-22)

16यीशु गलील ने समुद्रान मेरे रीन जातालु तेवी शिमोन एने तान बाहाक आंद्रिया ज्यां समुद्रा माय जालो टाकताला देखायेल, काहाकाय ता मासा मारणारा बोयटा एता. 17यीशु ताह कियील, मार पासाण आवु, मी तुमूह माणहा देरणारा बोणावूह. 18ओवतो ता जालाह सोडीन तान पासाण चालणे लागिल.

19तारीन जारिक ओंगान जाइन बादमाय ताह जब्दीन सोरा याकूब एने तान बाहाक यूहन्ना ज्या नावीमाय जाल हुदारताला देखाना. 20एने तो चालूच ताह आयडीन हादील, ओवतो तो चालूच तान आबाकाह जब्दीह एने ताह नौकरा हेऱ्यो नावीम सोडीन तान पासाण चालणे लागा.

द्रुष्टआत्मा लागिल माणहाह हुदारणेन

(लूका 4:31-37)

21अवतो ता कफर्णहुम नगराम गीया, एने चालूच तान शब्बाथ दिह आराधनालय माय जाइन शिक्षण आपेल. 22एने शिक्षणा पोर्रीन माणहे बोंगलाय गीया, काहाकाय तो ताह शास्त्री माणहान होस नाहं पुण अधिकार होस हिकाड तालो. 23ताच टाईमापोर तान आराधनालय माय अशुद्ध आत्मा लागिल एक माणुह एतो. 24तो आयडीन कियील, हे यीशु नासरी, आमूह तारे से काय काम? काय तू आमारो नाश केरणेन आवूह काय? मी तुवाह ओलेखथू तू कूण हि जां? तू बोगवानन पवित्र तो तूच ज्यां. 25यीशु ताह धो जुलीन कियील, ठावकु री एने ज्यामायरीन निकेल. 26तेवी अशुद्ध आत्मा ताह पिल्लीन मोठला आवाजामाय आयडीन एने तामायरीन निक्ली गीयो. 27तेवी ता ओला बोंगलाय गीया का ता एकमेकांह फुसणे लागिल, ज्यो हि तेभी काय? काय ज्यां अधिकार युक्त नोवालो हिकाडीह! ज्यो अशुद्ध आत्मा भी ज्यान आज्ञा मानतेह एने तो तान होमेलनू. 28जी तान किर्ती चालूच गलीलान चारू उगेन आखा भागाम पोसरील.

जुलुम दुखऱ्या हुदारणेन

(मत्ती 8:14-17; लूका 4:34-38)

29आराधनालय मायरीन निक्लीन तो चालूच याकूब एने यूहन्ना न्या हेऱ्यो शिमोन एने आंद्रिया न्यान घेर गीयो. 30शिमोनान हाहवूक हेर्यामाय दुखारी पुडील एती, तान बारामाय चालूच ताह कियील. 31तेवी तीन आहने जाइन तीन आथाह देरीन तीह उठाडील एने ती तापा मायरीन हाजी एयीन, तान सेवा केरणे लागिल. 32सूर्य बुडणे तेवी हांजपोर माणहा आखा दुखार्याह एने दुष्ट आत्मा लागीलाह ताफाय लावील. 33एने आखो नगर ने माणहा बायणाहेऱ्यो आवो. 34तेवी तामाय आलेग आलेग रोगान दुखार्याह मोकताह माणहाह तो हाजो किरील एने मोकता दुष्ट आत्मा काडील; ता दुष्ट आत्मा ताह ओलखिन केरीन तो ताह बोलहने नाहं देणु.

यीशुन एखालामाय प्रार्थना केरणो

(लूका 4:42-44)

35उवतू तो हेकाले मोठला वेगोस उठीन बाहेर गीयो जेंगलामाय जाइन ताहरी प्रार्थना केरील. 36तेवी शिमोन एने तान हेरी ताह होदणे केरीन गीया. 37एने तो सापडनेपोर तो ताह कियेल, आखा माणहे तुवाह होदणे केरीन हि. 38तेवी यीशु ताह कियील, माहु आसपासणे गावामाय उपदेश केरता आव केरीन आपु दिहरे उगे जाहू काहाकाय ज्यांच उदेशासे मी निक्लील हि. 39उवतू तो तो आखोच गलील माय तान आराधनालय माय जाइन उपदेश केरीन एने दुष्ट आत्मा काडते रेणू.

कोड लागिल माणहाह हुदारणो

(मत्ती 8:1-4; लूका 5:12-16)

40तेवी एक कुष्ठरोगी ताफाय आवु, एने तान ओगांण मांडा, टेकिन ताह विनंती केरणे लागिल, एने ताह कियील, “जर तारी ईच्छा एय ते आमूह शुद्ध केरणेन तू समर्थ हि.” 41तेवी यीशुह तान दया आवी एने तान आथ ओगांण, केरीन ताह आथ लागाडील एने ताह कियील, “मारी ईच्छा हि, शुद्ध एय जा.” 42तेवी चालूच तो कुष्ठरोगी शुद्ध एय गीयू. 43यीशु ताह कुणीह मा किही केरीन चेतावणी केयीन चालूच मोकलील दियील. 44एने कियील देख, कुणीह मा किही ज्या विषयामाय, ते जाइन स्वताह याजकाह देखाड एने ताह प्रमाण प्रिय जुवी केरीन तू आपणो शुद्ध केरता मुसान ठेरावील अर्पण केर तान केरता का तू शुद्ध ला गवाही आखाह सोमेजणे जुवी. 45पुण तो बाहेर जांणेबादमाय तो घोषणा केरी केरीन ती खुबेर ओली प्रसिद्ध केरील का यीशुह आखान ओगांण शहराम जाता आवातालो नाहा; केरीन तो बाहेर जेंगलामाय रेणू तेभी माणहे चारू उखेर रीन ताफाय आवताला.

Currently Selected:

मरकुस 1: NLXNT

Highlight

Copy