मत्ती 8

कुष्ठरोगिह हाजो केरणेन

(मरकुस 1:40-45; लूका 5:12-16)

1जेवी यीशु डोंगरापुररीन उतरणो, तेवी एक मोट्ली माणहान गर्दी तान पासाण चाल पोडील. 2एने देखो, एक कुष्ठरोगी तान आहने आवयो, एने ताह नमन केरीन कियो, “हे प्रभु, जर तारी ईच्छा एय ते माहु शुद्ध केर दी.” 3यीशु आथ ओगांण केरीन ताह आथ लागाडीन कियो, “मारी ईच्छा हि, तू शुद्ध एय जा” एने तो ताहारूच कुष्ठरोगामायरीन हाजो एय गीयो. 4एने यीशु ताह कियो, “देख, कुणीह मा किही, पुण जाइन आपणे आपह याजकाह देखाड, एने मुसान द्वारे ठेरावील भेट अर्पण केरीन गवाही बोणी.”

एक अधिकारीन विश्वास

(लूका 7:1-10)

5एने जेवी ता कफर्णहुम नगरमा आवा तेवी एक अधिकारी तान आहने आवा एने विनंती केरणे लाग्यो, 6“हे प्रभु, मारो दास लखवामाय पिडीत हि.” 7तो ताह कियो का, “मी आवीन ताह हजो केरुहू.” 8पुण तो अधिकारी उत्तर आप्यो, “हे प्रभु, मी ज्या लायक नाहं का तू मारे घेर आवी, पुण फक्त आज्ञा आप मारो दास हाजो एय जाय. 9कारण मी भी न्यायान अधीन माणुह हि, एने मारे अधीन मारा शिपाई हेते. जेवी मी एकाह केणे जा ते तो जाणे, एने दिहीराह केणे, आव! ते तो आवणे, एने ताह दास केणे ज्यो केरते तो करने.”

10ज्यो होमलील यीशुह आश्चर्य एय गीयू, एने आपणे पासाण आवनाराहा कियो, “मी तुमूह खेरीज किथु का, माहु इस्राएल माय भी ओहलो विश्वास कुणामाय भी देखायील नाहं. 11मी तुमूह किथु का, पूर्व एने पश्चिमाय रीन जुलुम माणहे अब्राहाम, ईसाहाक एने याकूब न्या हेऱ्यो स्वर्गान राज्याम बोहती. 12पुण बोगवान राज्यान सोरा बाहेर आंधाराम टाक देय, ताहरी रेडनेन एने दात केकडावणू रेय.” 13एने यीशु सुभेदाराह कियील, “जा, तारो विश्वास हि तोहलोच तारे केरता एय” एने दास तास समयी पोर हाजो एय गीयो.

दुखाऱ्या माणहाह हुदारणे

(मरकुस 1:29-34; लूका 4:38-41)

14यीशु पतरस घेर आवयो, तेवी तान हाहवूक दुखारी हेऱ्यामाय पोडील देख्यो 15तो तीन आथा आथल्यो, एने तीन हेरी उतर गीयी एने ती उठीन तान सेवा केरणे लागी 16एने हांज एनी तेवी दुष्ट आत्मान पीडामाय मोक्तास माणहाह ताफाय लाव्या एने तान फक्त एक शब्दाम दुष्ट आत्माना बाहेर निक्ली जाताला एने तो ता आखाह हाजा किऱ्यो जां दुखारया एता 17काहाकाय जो वचन यशाया भविष्यवक्ता द्वारे कियील एतो तो पुरो एने जुवी, तो ज्यो का, “तो जीवेच आमरा दुखे एने आमरा रोगाह वीस लिदो.”

यीशुन चेला बणेन किमुत

(लूका 9:57-62)

18यीशु जेवी ताहेरया चारू बाजूमाय माणहे एखठा एताला देख्यो तेवी तो ताह समुद्राम पुरलेउखीर जाणेन हुकुम आप्यो. 19एने एक शास्त्री आवीन यीशुह कियो, “गुरुजी, जाहारी तू जाही मी तारे पासाण पासाण चालूह.” 20यीशु ताह कियो, “कोल्याहा देर एने आकाशान चिडाह पांजरा हि पुण माणहान सोराह मुंड टेकाडनेन भी जागो नाहं सोतू.” 21एक चेलो उंजू ताह कियो, “हे प्रभु माहु पेल जाणेदी, का मी मारा आबाक गाडीन आवु.”

वादुणाह शांत केरणेन

(मरकुस 4:35-41; लूका 8:22-25)

22यीशु ताह किदो, “तू मार पासाण आव, एने मुरीलाह आपणो मुरदो बुजणे दी.” 23जेवी तो नावीम चेढ गीयो, तेवी तान चेला तान पासाण जाणे लाग्या. 24एने देखू, समुन्द्रमाय एक मोठो तुफान उठ्यो, तान नाव जावटामाय बुडणे लागी यीशु हुवणे बाजरीयील इतो. 25तेवी तान चेला आवा एने ताह उठाडीन केतेह, “प्रभु, आमूह वोचाड, आमु नाश ऐतेह” 26तो ताह कियो, “हे अल्पविश्वासी, तुमु ओला काहा बितेह” तेवी तो उठीन वादलाहा आज्ञा आपील, एने ताहारूच पुरो ठावकुच एय गीयो. 27तेवी ता माणहाह आश्चर्य लागो एने केणे लागा, “ज्यो कोहलो माणुह हि कि वारो एने समुन्द्र भी ज्यान होमलिह.”

दुष्टात्मा लागिल माणहाह हुदारणेन

(मरकुस 2:1-12; लूका 8:26-39)

28जेवी तो गदरसेकरान प्रदेशाम पोचना, तेवी दुय माणुहे जामाय दुष्ट आत्मा एती, ता कबरस्थानामायरीन निकलीन ताह मीलाना. तो ओला खराब एता कि कुनुस ती वाटी नाह जातालो. 29एने देखू, ता ताह आयडीन कियील, “हे बोगवानान सोरो, आमारो तारहेरी काय काम? काय न्या तू आमूह टायमान पेल दुख आपणेन आवोह का.” 30थोडाच अंतरापूर डुकरान एक मोठू कळप चारतेन एतो. 31दुष्ट आत्मा ताह विनंती केरील, “जर तू आमूह काडणेन आवूह तर आमूह डुकरान टोलाम मोकली दी.” 32तो ताह कियो, “जावो” निकलीन डुकरांम रीन गनो एने देखू, तो पुरो टोलु जाइन कोठापुररीन समुद्रा माय पोडीन बुडीन मोर गीया. 33डुकरे चारणारे दोवळतीन नगरांम गीया, एने दुष्ट आत्मा से पिडीत माणहा हेऱ्यो जो एनो तो आखो केया. 34एने देखू, ता गावान आखा माणहे यीशुह मिलणेन आवा, एने ताह देखीन ताह विनवणी केऱ्यो कि आमरा प्देशामायरीन जातरी.

Currently Selected:

मत्ती 8: NLXNT

Highlight

Copy