मत्ती 18

स्वर्गान राज्यामाय मोठू कूण?

(मरकुस 9:33-37; लूका 9:46-48)

1ता समयी चेला यीशु हे-या आवीन ताहा फुसणे लागिल का, “स्वर्गान राज्यामाय आखामाय मोठलु कूण हि” 2तेवी तो एक सोरा आपनेहेऱ्यो हादाडीन, तामाय उबराखाडीन कियील, 3मी तुमूह किथु, का जो ताहवोर पासाण फिरणार नाहं एने सोरान होस एय, तोच स्वर्गान राज्यामाय आखामरीन मोठलु हि. 4जो कुणआपणे स्वताज्या सोरान होस आत्यो केरी, तोच स्वर्गान राज्यामाय मोठो एय. 5एने जो कूण मारा नावामाय ओहला एखादा सोराह मान लेणे, तो माहु आहने लेणे.

पाप केरणेन परिक्षा

(मरकुस 9:42-48; लूका 17:1,2)

6“पुण जो कुणी न्या आत्या मायरीन जो मारपुर विश्वास मेलणु एका भी ठोकर खावाडी, ते हाजो एय का तान गेलामाय मोठली घेरटीन पूड बांधीन ताह समुद्राम उंडाले बुडाव देणे जुवी. 7ठोकरान वजसे जगा पोर हाय ठोकर ते आवणारूच हि पुण ता माणहापूर हाय हि जान वजसे ठोकर आवणे.” 8“जर तारो आथ नाह ते पाय ठोकर खावाडी, तर ताह काटीन टाक दी, काहाकाय किइल लुला बोणीन जीवनामाय प्रवेश केरणेन कोलोक हाजो हि का तू दुय आथ केव्ही दुय पाय लीन अनंत आकठाम टाकाय जाय. 9जर तारो डोलो तुवाह जेठ पोचाडणार तर ताह काडीन टाकीन आप, कारण तार केरता आदोलो बोणावीन जीवनामाय प्रवेश केरणेन ज्यापोररीन हाजो हि कि तारो दुय डोला असून भी तू नरकाम जाही.”

टाकायील मेंढरान वार्ता

(लूका 15:3-7)

10“देखू, तुमूह आत्या मोठलाह तुमु कुणीहुच तुच्छ माणहु मा, कारण मी तुमूह किथे कि स्वर्गाम तान दूत मारो स्वर्गीय आबाकने मूय कायम दिखिह रेतेह. 11काहाकाय माणहान सोरो टाकाईलाह वोचाडणे आवील हि.”

12तुमूह काय लागीह? कूण एक आमरी हे-या शंभर मेंढरे ओहली, एने तामारीन एखादो भटकिल्यो, तर ता नव्याण्णव ला जेंगलामाय सोडीन ता टाकीन जाईल होदणे केरणेन तो जाहू नाहं काय? 13एने जर इही एय गीयो का ती ताह जुड जाय तर मी तुमूह खेरीज किथु का तो तान केरता ता नव्याण्णव जां मेंढरा टाकाय नाह एता, ओलिक आनंद नाय एय जोलोक का ता एक मेंढरान केरीन तापेक्षा होवटो आनंद करने. 14तोहोलोच तुमरो आबुक जो स्वर्गाम हि ओहलो ईच्छा नाहं कि आवो हाणाम एकाआ पुण नाश एने जुवी.

गुनेगारान प्रती व्यहवार

15“जर तारो बाहाक काही पाप केरतीन रेंय, तर जाइन ताह एखलाच होमजाळ, जर तो तारो होमेल तर तू ताह मिलवी लीईल हि. 16पुण जर तारी तो होमबोलणार नाहं तर आपणेहेर्यो एक केव्ही दुय माणुह उंजू लेईन जा तान केरता कि दुय केव्ही तीन गवाही माणहान मुया मायरीन शब्दान ते निश्चित किरील जाहो. 17जर तो तान पुण होमबोलणार नाहं तर कलीसियान माणहाह किजी जर तो तान पुण होमबोलणार नाहं तर तो तुवाह दिहरी जाती एने चुंगी लेणार सारखो एतो.”

रोकणु एने समय आपणु

18मी तुवाह किथु कि जो काही तुमूह पृथ्वीपोर बाधहु तो स्वर्गाम बाधील जाय एने जो काही तू पृथ्वीपोर बांध हो तो स्वर्गाम उगडन्यो. 19मी तुमूह पोशा किथे जर जो तुमरे माय दुय जन पृथ्वीपोर एखादो मांगणीकेरता एक मोन हि तर ते मारो स्वर्गीय आबापुररीन तान केरता आपील जाहू. 20काहाकाय न्या दुय केव्ही तीन मारो नावान एक्ठाच ऐतेह ताहरीक मी तामाय हि.

निर्दयी दासान वार्ता

21तेवी पतरसाने आवीन ताह कियील, प्रभु मारो बाहाक कोलाक वारीन मारो विरुद्ध पाप केरुहू एने मी ताह क्षमा केरीन रेहू काय सात वेलवर? 22यीशु ताह कियील, “मी तुवाह हे केरिननाहा कि सात वेला इहज पुण साताआ सत्तर वेला ताहवोर.”

23तामुळे स्वर्गान राज्यान मेल एखादो ओहलो राज्याहे-यो केरील जातेह ज्यान आपणी दासाहे-योरीन इसाब लेणेनेन एतो. 24ताहेरया तो हिशोब लेहु लागिल, तर तान सुमोर एक माणुह लीन आवा, न्यानहेऱ्यो मेंढा रुपयां कर्ज एतो. 25पुण ताहेरया तान आहने कर्ज फेडणेकेरिन कायीच नाह एता, तेवी राजाने हुकुम केरील कि तान बायकू, सोरा एने जे काही तान आहने हि आखा पाकील कर्ज चुकाडीन आपज्यू. 26ज्यापूर दासान पाया पोडीन नमन किरील एने कियील मालक धीरज देर मी आखा काही आपील आपण्यू. 27तेवी दासाहा मालकाह तापोर दया केरीन ताह सोडीन आपील एने तान कर्ज पुण क्षमा केरीन आपील.

28पुण तो दास बाहेर निकलील एने तान भेट तान एक हेरी दासाबरोबर एनी जो तान शंभर रुप्याआ कर्जदार एतो तान ताह देरील एने तान गळा दाबीन ताह कियील मारो कर्ज फेड. 29जापोर तान हेगातीई दास तान पाया पोडीन विनंती केरूह लागिल कि धीर देर मी आखा कर्ज फेडीन आपण्यू. 30तेभी पुण तान तान होमलील नाहं ताहउर ताह ठाणाम टाकीन आपील कि तो कर्ज फेडीन आपण्यू नाहं. 31हि देखीन तान हेगातीई दास अतिशय दुखाम एनो एने तान जाइन हि घटना आपणो मालक्या कियील. 32तेवी तान मालकाह हादाडळीन कियील, हे दुष्ट दासान तान केरता कि तू माहु विनंती केरील मी तारो आखा कर्ज क्षमा केरीन आपील एतो. 33तर ज्याफायरीन मी तारपोर दया केरील त्याप्रमाणे तानहोस दासापुर दया केरणे मां काय? 34ओवतो तान मालकाह तापोर जुलील तो आखा आपणे फेडीपर्यंत ताह यातना आपणारा होपीन आपील.

35“केरीन जर तुमूह प्रत्येक जन तुमु आपणो बाहाक मोनामरीन क्षमा केरुहू नाहं तर मारो स्वर्गातील आबुक हि तीहच भी क्षमा तुमूह केरी.”

Currently Selected:

मत्ती 18: NLXNT

Highlight

Copy