यूहन्ना 8

व्यविच्यारी बायकूह क्षमा

1यीशु जैतुन बोयडीपोर गीयो. 2ओवतो वेगोस यीशु मंदिरामाय गीयो; एने ताजागेन आखा माणहे तान आहने आवा एने तो बोहीन ताह संदेश आपुह लागिल. 3तेवी यहूदी धर्मी शास्त्री एने फरीसी माणहे व्यभिचार गुन्हामाय एक बायकूह ता जागापूर लीन आवा, एने तीह माणाहान ओगाण उबरीयेल किरील. यीशुह केया, 4“हे गुरु. हि बायकू व्यभिचार केरता लीन देरानीह. 5मुसान व्यवस्था आमूह आज्ञा आपणे माय आवी हि कि ओहला बायकू देगडा केरीन मारील जुवी ऐवी केवो, तुमरो काय केणे हि?” 6हे यीशुह ओळखणेकेरता ते ताह विचाराम एता जानकेरता ताह ओहलो बाहानु जुळणे हवी कि ज्या उखेरीन तान विरुद्ध लागडणे आवी तेवी यीशु बुंदे वाकीन आपणो मुंदी केरीन जोमनि पोर लिखू लागिल. 7कारण ते विचाराम रेणा तान केरता यीशु उबरील रेणू एने ताह कियील, तुमूमायरीन जे पापी निह एय तास देखील जीपोर दिगुड दिणेन. 8एने तो पोशो ढोंगोपोडीन जोमनि पोर लिखू लागिल. 9ताहेरया माणहान हे होमलील तेवी आखान पेल्लो डावालु माणहे ओवतो पोशो एक एक केरीन तीठीकाणेरीन निकलीन गीया एने ज्यानहोस ताहरी यीशु एखालो उबरील रेणू एने यीशुन सुमोर ती बायकू उभी एती. 10यीशु उबरील रेणू एने ता बायकू कियील, “हे बायकू, ता आखा का गीया काय तुवाह कूण दोषी ठेरायेल नाहं?” 11बायकू बोलिल, नाहं, महोदय कुनुस नाहं यीशु कियील, “मी पुण तुवाह दण्ड आपतेन नाहं; जा, ऐवी पोशो पाप केरही मा.”

यीशु जग तान उजालो

12ओवतो ताजागेन उपस्थित माणहाह यीशु कियील, “जगान प्रकाश हि; जो कूण मार पासाण आवी तो आंधाराम रेय नाय, एने ताह ता प्रकाशाची जुळणी एय जो जीवन आपथु.” 13ह्यापूर फरीसी ताह कियेल, तू आपणी गवाही स्वता: च आपतेन हि तान केरता तारी गवाही योग्य नाहं. 14उत्तरामाय यीशु ताह कियील, जर मी आपणी गवाही जीवाच आपतेन हि तेभी पुण मारी गवाही योग्य हि कारण माहु मालूम हि मी कारीन आवा हि एने केह जात हि पुण तुमूह माहु ओळखतेह नाहं कि मी कारीन आवा हि एने का जात हि. 15तुमूह माणहान नियमांना न्याय केरणू मी कुणान न्याय केरतीन नाहं. 16पुण जर मी न्याय केरूह तेभी पुण मारो न्याय योग्य रेंय कारण मी एखालो नाहं पुण परम आबोक ज्यान माहु मोकलील हि तो एने मी मिलिन न्याय केरणू. 17तुमरो व्यवस्था माय लेखील हि कि दुय माणहान गवाही हि न्याय किथी. 18मी आपणी गवाही स्वता: किथे एने परम आबोक ज्यान माहु मोकलील हि, माहफायरीन तो गवाही आपथु. 19ह्यापूर माणहान ताह कियील, तारो आबोक का हि? यीशु उत्तर आपील, नाहं तुमु माहु ओलकतेह एने नाहं तुमूह मारो पित्याला ओलकतेह जर तुमूह माहु ओलखिल हि तर मारो पित्याला पुण ओलखिल हि. 20यीशु मंदिराम हिकाडतेन एतो तेवी भेट सामानाबारामाय तो बोल्णु एतो पुण कूण ताह दिरील नाहं कारण उंजू तान टाइम आवा नाह एतो.

यीशु खुदने बारामाय किथी

21यीशु ताह पोशो कियील, “मी निकलीन जाहू एने तुमूह मारो होदणे मुडोपुर पुण तुमूह स्वतान पाप ने मोरण्यू एने जाहारी मी जात हि ताहारी तुमूह आवहू शकत नाहं.” 22ओवतो यहूदी अधिकारी केहू लागिल, काय तुमूह विचार केरणू कि तो आत्महत्या केरुहू हि? कारण तान कियील हि कि तुमूह ता जागापूर आवहू शकत नाहं ज्याडगी मी जात हि. 23यीशु ताह कियील, तुमूह नीचे वाला हेते, मी उपेर वालू हि; तुमूह संसारान हेते, मी संसारान नाह. 24जानकेरता मी तुमूह कियील एता कि तुमूह खुदने पापाहाम मोरण्यू जर तुमूह विश्वास केरतीन नाहं कि मी तो हि तुमूह आपणो पापाहाम देणे. 25ओवतो तास यीशुह फुसील, तू कूण हि? यीशु उत्तर आपील मी तोच हि जो कि सुरुवातीरीन तुमूह किथी आवा हि. 26तुमूह केणेन एने तुमरो न्याय केरणेन माहफाय जुलुम काही हि पुण खेरो ज्याच हि ज्यान माहु मोकलील हि जगाम जे होमलील हि तोज मी करने. 27ते हे ओलखु शकले नाहं कि यीशु ताह परम आबोक विषयी किथी हि. 28ओवतो यीशु ताह कियील, ताहेरया तुमूह माणहान सोराह उचो मुडोपुर तेवी तुमूह ओलखु कि मी तोच हि मी माफायरीन काही केरतीन नाहं तर मी जे काही किथी हि ते ज्याच हि कि जे माहु मारो परम आबुक हिकाडील हि. 29एने ज्यान माहु मोकलील हि तो मारहे-या हि, तान माहु एखाला सुळील नाहं कारण दाडीन मी तोज करने जे ताह पोटणे. 30यीशु ताहेरया हे किथी एतो तेवी जादा माणहान तापोर विश्वास मेलील.

सत्य तुमूह स्वतंत्र केरी

31यीशु ता यहूदी अधिकारीन कियील जे तापोर विश्वास केरतीन एता, “जे तुमूह मारो संदेशानहोस चालूह तर खेरीच मारा चेला ईहू. 32एने सत्य काय हि ते ओलखु एने सत्य तुमूह मुक्त केरूह.” 33ह्यापूर तास यीशुह प्रश्न किरील, “आमु अब्राहामान पिडीन पिडी हेते, आमु कुणान गुलाम रेणा नासोतो तर तुमूह केवी केतेह कि तुमूह मुक्त ईहू.” 34यीशु ताह उत्तर आपतेन कियील, “मी तुमूह खेरीज किथे प्रत्येक जो पाप करने तो पापाहा गुलाम हि. 35एने कूण गुलाम कायमने परिवाराह-या रेथे नाहं फक्त सोरोच रेहू शकणे. 36जर सोरो तुमूह मुक्त केरतीन हि तेव्हीच तुमूह खेरो मुक्त ईहू माहु मालूम हि कि तुमूह अब्राहामान पिडीन पिडी हि. 37पुण तुमूह माहु मारणेन प्रयत्न केरतीन हि कारण मारो संदेशानकेरता तुमरो मोनाम काही जागो नाहं. 38मी तोज करने जे माहु आबुक देखाडणे हि एने तुमूह तोज केरता जे तुमूह तुमरो पित्यावूखेरीन होमलील हि.”

39ह्यापूर तास यीशुह उत्तर आपील, आमारो आबोक अब्राहाम हि तेवी यीशु ताह कियील, तुमूह जर अब्राहामान सोरा रेणा हि तर तुमूह तोज काम किरील हि जे अब्राहामने किरील एता. 40पुण तुमूह तर ऐवी माहु म्हणजे ओहला माणहाह जो तुमूह ता सत्याह किथी हि जे तान बोगवानारीन होमलील हि ताह तुमूह मोरू इच्छिता अब्राहामने तर इही किरील नाह एता. 41तुमूह आपणो पितान कार्य केरतीन हि, ओवतो तास यीशुह कियील, आमु व्यभिचारान मोदेतसे जन्मूला आवूह नाहं आमारो फक्त एकुच आबोक हि तो बोगवान हि. 42यीशु ताह उत्तर आपील, जर बोगवान तुमरो आबोक येतो तर तुमूह मारपुर प्रेम किरील हि कारण मी बोगवाना फायरीन आवा हि एने ऐवी मी न्या हि मी न्या स्वता: रीन आवा नाहं पुण तान माहु मोकलील हि. 43मी जे तुमूह किथी हि ते तुमूह का होंबलेह नाहं? यान कारण ज्याच हि कि तुमूह मारो संदेश होंबलेह नाहं. 44तुमूह आपणो आबुक शैतानान सोरा हेते एने तुमूह आपणो आबाकने इच्छेप्रमाणे चालणे प्रयत्न केरीन हि तो पेलरीनुच खुनी हि एने तान सत्यान खाटलो केध्दीह लीईल नाहं कारण तामाय सत्याचे एकतीडकु नाहजेवी तो ठेगणे बोलेहे तेवी तो इहज जीवासे बोलीह असतो कारण तो ठेग-यु हि एने आखा ठेंग जेल्मो आपथु. 45कारण मी सत्य किथी हि तुमूह मारपुर विश्वास केरतीन नाहं. 46तुमरे माय वालो कूण ओहलो हि तो मारपुर पापी येणेन डाग देखाडहु शकणे? जर मी खेरो किथी हि तर तुमूह मारपुर का विश्वास केरतीन नाहं? 47जो माणुह बोगवानान हि, बोगवानान वचनामाय होमलथू तान कारणाने तुमूह मारा होंबलेह नाहं कि तुमूह बोगवानान नाहं.

यीशु एने अब्राहाम

48उत्तर आपतेन यहूदी ताह कियेल, हे केणु कि आमु खेरो नाह एतो, तू शमरोनी हि एने तुमरे माय एखादी दुष्ट आत्मा ने वास किरील हि? 49यीशु उत्तर आपील, मारामाय कुणीबी दुष्ट आत्मा नाहं, पुण मी तर मारो आबाक आदर करने एने तुमूह मारो अपमान केरतीन हि. 50मी आपणी महिमा केरतीन नाहं पुण एक ओहलो हि जो मारी महिमा केरूह इच्छितो एने न्याय पुण करने. 51मी तुमूह खेरो किथे जर कूण मारो संदेशाला ग्रहण करने तर तो मोरणाह केधीच देखणार नाहं. 52ह्यापूर यहूदी अधिका-याने ताह कियील, “ऐवी आमु ओलखिल हि कि तुमरीम कूण दुष्ट आत्मा ने वास केरील हि. न्याओर कि अब्राहाम एने भविष्यवक्ता मारीन गीया; एने तू केतेह हि, जर कूण मारो संदेशानहोस चालना तर ताह केधीच मरण एय नाहं. 53निश्चय तू आमारो अब्राहाम ह्यापेक्षा मोठू नाहं. जो मरण जूळनो एने भविष्यवक्ता पुण मरणेपूर. तू काय हि?” 54यीशु उत्तर आपील, “जर मी मारी महिमा केरील, तर ती महिमा कायीच नाहं; जो माहु महिमा आपथु तो मारो परम आबोक हि, ताबाराम तुमूह आखासुमुर केणु कि तो आमारो बोगवान हि. 55तुमूह ताह केध्दीह ओलखिल नाहं पुण मी ताह ओलखणे जर मी इही केहू कि मी ताह ओळखतेह नाहं तर मी पुण तुमरीगेत ठेग-यु ठेरणार कारण मी ताह हाजो रीतीमाय ओळखणे एने तो जे किथे तान मी पोहणे करने. 56तुमरो पूर्वज हे अलखुहु कि तो ज्याह दिहा देखणार तेवी मी आवूह आनंदमाय बोरीन गीयो एतो तान ताह देखील एने प्रसन्न एनो.” 57ओवतो यहूदी अधिका-यान ताह कियील, तू ऐवी पन्नास वर्षाचा पुण नाहं एने तू अब्राहामाह देखीन लीईल. 58यीशु ज्यापूर ताह कियील, मी तुमूह खेरीच किथे, अब्राहामान पेल पासून मी हि. 59ज्यापूर तास यीशुह मारणे केरता मोठ-मोठे दिगुड उखीलील पुण यीशु गुप्तपणे मंदिरामाय रीन निकलीन गीयो.

Currently Selected:

यूहन्ना 8: NLXNT

Highlight

Copy