यूहन्ना 17

यीशुन महायाजकिय प्रार्थना: स्वतान केरता

1ज्याह वातू केनेबादमाय यीशु आकाशाफाय देखीन कियील, “जो मारो आबुक, ती टाइम आवी हि कि; आपणो सोरा महिमा प्रदान केर जानकेरता कि तारो सोरो तारो महिमा केरूह शकेल, 2तू ताह योग्य आखा प्राणी जीवापोर अधिकार आपील हि, कि तो आखाह ज्याह तू ताह आपील हा अनंत जीवन आपुह शकेल.” 3अनंत जीवन हे हि कि ते तारो एक मात्र खेरो बोगवान एने यीशु मसीहान, ज्याह तू मोकलील हि, ओलेख. 4जे काम तू माहु आपील एता, ते पुरो केरीन जगाम मी तुवाह महिमा किरील हि. 5तान केरता तू पुण माहु महिमा केर हे मारो आबुक, तोच महिमा माहु आप जो जगाच्या देखील तारहेऱ्यो माहु प्राप्त एतो.

चेलान केरता

6जगामारीन जे माणहे तू माहु आपील हि मी ताह तारो नावान जगाम हिक किरील हि ते माणहे तारो एता पुण तू ताह माहु आपील हि. एने तास तारो वचनान पोहणे किरील हि. 7ऐवी ते ओलकतेह कि प्रत्येक वस्तु जी तू माहु आपील हि ती वस्तु तुवाफारीनुच आवी; 8मी ताह तोच संदेश आपील एतो, एने तास ग्रहण किरील हि, ते निश्चय पूर्वक ओलकतेह, कि मी खेरीच तुवा फायरीन आवूह हि एने ताह विश्वास एनो हि कि तूच माहु मोकलील हि. 9मी तान केरता प्रार्थना केरीन हि; मी जगानकेरीन प्रार्थना केरीन नाह पुण तान केरता करने ज्याह तू माहु आपील हि, कारण ते तारो हि; 10जे आखा काही मारा हि ते तारो हि एने जे तारो हि ते मारा हि एने ताफायरीन मारो महिमा एनो हि. 11ओगांण मी जगामाय नाय रेंव, पुण ज्या जगामाय रेती, एने मी तुवा फाय आवथू, हे पवित्र पिता, आपणा ता नाव से जो माहु आपील हि, तान रक्षा केर, का ता आमरे सन्मान एक एती. 12ताहेरया मी ताहेर्यो एतो, मी तारो ता नावान, शक्ती केरी तान रक्षा केरील जे तू माहु आपील एता मी रक्षा केरील एने तामायरीन कुणीन भी नष्ट एनो नाहं ज्यान शिवाय तान जो नाशयेणेन सोरो एतो जानकेरता कि शास्त्राचे वचन खेरो एने जुवी. 13ऐवी मी तारहेर्यो आविह हि पुण ज्याह वातू मी आवो जगाम एतालून किथी हि जानकेरता ते आपणो हृदयाम मारो पुरो आनंद एहू शकणे. 14मी तारो वचन ताह आपील हि पुण जगान तापोर घीन केरील हि कारण ते सोवसारान नाहं जोहलो मी आवो जगाम नाहं. 15मी इही प्रार्थना केरतीन नाहं कि तू ताह संसारामाय काडीन ले पुण हे कि तू तान ता दुष्ट शैताना फायरीन रक्षा केर. 16ते सोवसारान नाहं तोहोलोच मी ज्याह जगाम नाहं. 17सत्य के द्वारा तू ताह पवित्र केर: तारो वचन खेरो हि. 18जोहलो तू माहु ज्याह जगाम मोकलील तोहोलोच मी यान जगाम मोकलील हि. 19मी तान केरता जीवाह तार केरता पवित्र केरीन हि जानकेरता कि ते पुण सत्यान द्वारे जीवाह तारो सेवा केरता आपथु एने जुवी.

आखा विश्वासीन केरता

20“पुण मी फक्त तान केरताच प्रार्थना केरीन नाहं तर तान केरता पुण जे तान संदेशा द्वारे मारपुर विश्वास केरती. 21ता आखा एक एने जुवी ते पुण आमरा माय एक एने जुवी जानकेरता आबाक जगान विश्वास केरणू कि माहु तू मोकलील हि. 22जो महिमा तू माहु आपील हि मी ताह आपील हि जानकेरता कि ते पुण तोहोलोच एक एने जुवी जोहलो आपु एक हेते. 23मी तामाय रेंय एने तू कुणबी रेहू, ज्यासे ते पुरो एकताल प्राप्त केरुहू एने जग ओलखिन लेहु कि तू माहु मोकलील हि एने तू ताह तोहोलोच प्रेम किरील हि जोहलो तू मारपुर प्रेम किरील हि. 24हे मारो आबाक, जे माणहे तू माहु आपील हि मारी ईच्छा हि कि जाहरी मी हि ताहरी तुमूह ते पुण मारहे-या रिजी जानकेरता कि ते पुण मारो महिमाह देखहुं शकणार जो तू माहु आपील हि कारण हि जगाह बोणावणेन पेल तू माहु प्रेम किरील हि. 25हे खेरो आबुक, जग तुवाह ओळखतेह नाहं पुण मी तुवाह ओलखिल हि एने मारा चेला ओलकतेह कि तू माहु मोकलील हि. 26मी फक्त तुमरीम नावान हिक कियील नाहं पुण मी ज्यान पुण हिक केरणे पुण लागाळ रेईन जानकेरता कि जे प्रेम जे तू मारपुर देखाडील हि तामाय पुण एने जुवी एने मी पुण तामाय रेव.”

Currently Selected:

यूहन्ना 17: NLXNT

Highlight

Copy