यूहन्ना 13

प्रभु भोज

1फसहने तीवारान पेल, यीशु ने देखील कि ज्याह जागाह सोडणे एने मारो आबाक फाय जाणेन टाइम आवा हि तेवी आवो जगाम जें तान एता एने ज्यापूर तो प्रेम केरतीन एता तापोर तान शेवेटरान प्रेम देखाडणे. 2हाजपुरणे रोटू केरतीन एता शैतान एविवूर शिमोन इस्कर्योतचा सोरो यहूदा ज्यान मोनाम टाकील एता कि यीशुह धोकाम लीन देरावीन आपणे जुवी. 3यीशु, हे ओळखतेह एतो कि मारो आबुक आखा काही तान आथे होपीन आपील हि एने तो बोगवानारीन आवा हि एने बोगवानान आहने पोशा जात हि, 4तान केरता जेवण सोडीन उबरील रेणू तान आपणा बाहेर फाडका काडीन एने एक रुमाल आपणो माहणे बाधील. 5ओवतो एक गंगाळामाय पाणी बोरगे आपणो चेलान पाय धुवू लागिल एने ता कोमरोह बांधील रूमालाकेरिन नुसु लागिल. 6ओवतो जेवी तो शिमोन पतरसान आहने गीयो, तेवी पतरसाने कियील, “हे प्रभु, काय तू मारा पाय दुवही हीच?” 7उत्तर आपतेन यीशु कियील, “ऐवी तुवाह मालूम नाहं कि मी काय केरतीन हि, ओवतो तुवाह मालूम एय.” 8पतरसाने ताह कियील, “तू मारा पाय केधीच धोवणे नाहं” यीशु ने उत्तर आपील, “जर मी धोवणे नाहं तर तुवाह माहफाय जागो जुळी नाहं” 9शिमोन पतरसाने ताह कियील, “हे प्रभु, फक्त मारा पायुच नाहं, तर मारा आथ एने मारा मुंडे पुण धोवीन आप.” 10यीशु ताह कियील, “ज्यान उगेलने केरील हि ताह आपणो पायान व्यतिरिक्त काही दोवन्या आवश्यकता नाहं तर तो पुरो शुद्ध एतो तुमूह माणहे शुद्ध हेते पुण आखाच नाहं.” 11यीशु ताह ओळखतेह एतो जो ताह धोकाम देरावदे एतो तान केरता तान कियील एता, “तुमूह आखा शुद्ध नाहं.”

12ओवतो ताहेरया तान पाय धुवील गीया तेवी तान आपणा बाहेर फाडका पोशा रीगाडीन लीईल एने आपणो जागे पोशा आवीन बोहील काय तुमूह ओळखतेह हि कि मी तुमरीकेरता काय किरील? 13तुमूह माहु गुरु एने प्रभु केणु एने तुमूह योग्य हि कारण मी तो हि. 14तान केरता जर मी प्रभु एने गुरु असून तुमरो पाय धुवील तर तुमूह पुण एकमेकान पाय धोवणे जूइ मी तुम्राओगाण मी एक वार्ता आपील हि. 15जानकेरता तुमूह भी दिहराहे-यो तोज केरूह शकणार जे मी तुवाहेर्यो किरील हि. 16मी तुमूह खेरो किथु एक दास आपणा मालिकाहारीन मोठू नाहं एणेन संदेश आपणार मोठू हि ज्यान तुवाह मोकलील हि. 17जर तुमूह ज्याह वातू ओळखतेह हि एने तानहोस चालणु तर तुमूह धन्य हेते. 18मी तुमूहहु आखान विषयाम किथी नाहं मी ताह ओळखणे ज्याह मी निवाडील हि एने हे पुण कि यहूदा विश्वास हि पुण मी ताह जानकेरता निवाडील हि कि शास्त्राचे वचन खेरो एने जुवी एने ज्यान मारी रूटू खादल्यी तो मारिनिरूध एनो. 19ऐवी हि घटना घेडाणेनपोयले मी तुमूह जानकेरता किथे कि विश्वास तो मी हि. 20मी तुमूह खेरो खेरोज किथु कि जो कूण मान्हा मोकलने ग्रहण करने तो मान्हा ग्रहण करने एने जो मान्हा ग्रहण करने तो ताह ग्रहण करने ज्यान मान्हा मोकलील हि.

धोकान संकेत

(मत्ती 26:20-25; मरकुस 14:17-21; लूका 22:21-23)

21हे केनेबादमाय यीशु आत्मा माय व्याकुल एनो एने गवाही आपील मी तुमूह खेरो किथे, तुमरे मायरीन एक ओहलो हि कि तो माहु धोका आपील देरावदे. 22तेवी तान चेला एक दिहीरा देखाडहु लागिल ताह निश्चित एता नाह एता कि तो कुणीनबारामाय बोलीह हि. 23तान एक चेला तान आहनी बोहील एतो ताह यीशु जुलुम प्रेम केरतीन एतो. 24तेवी शिमोन पतरसाने ईशारो किरील कि पुसू का तो कूण एहू शकणे ज्यावीरूढ यीशु बोलीह एतो. 25यीशुन पोटताली चेलो ताह इहज तान छातीपूर वाकून ताह फुसील, “हे प्रभु तो कूण हि?” 26यीशु ने उत्तर आपील, रोटान टुकडा वाटकामाय बुडाविन ज्याह मी आपण्यू तोच हि ओवतो यीशु रोटान टुकडा वाटकामाय बुडावील एने तो विसीन शिमोन इस्कर्योतचा सोरो यहूदाला आपील. 27जोहलोबी यहूदाने रोटान टुकडा लियेल तामाय शैतानाने वास किरील ओवतो यीशु ताह कियील, जे तू केरणे निकलील हि ते जेल्दी केर. 28पुण ता जागापूर रूटू खाणेन बोहरेयीलमामरीन कुणबी हे सोमोजनो नाहं यीशु हे का कियील. 29काय भी विचार किरील कि पोयशान थैली यान एती तान केरता यीशु ताह किथी हि कि फसह तिवार केरता काही आवश्यक सामग्री लीन आवु केव्ही केतालू एतो कि गारीबांह काही आपील आपज्यू तान केरता यहूदाने रोटान टुकडा लियेल. 30जेवण केरील तां बाद तो तात्काळ निकलीन गीयो हि रातीने टाइम एतो.

नोवाली आज्ञा

31तो निकलीन जायीलओवतो यीशु केदा, “माणहान सोरो ऐवी महिमात आवा हि एने तान द्वारे बोगवानान महिमा एनो हि.” 32जर ताहानद्वारे बोगवानान महिमा एनो हि तर बोगवान आपणे फायरीन ताह महिमा आपण्यू एने ताह महिमा जेल्दी हि आपण्यू. 33हे मारो पोटताली सोरांन, मी ऐवी जारीकुच टाइम तुवाहेर्यो हि तुमूह माहु होदणे एने जोहलो मी यहूदी अधिकारीन कियील एता, तोहोलो तुमूह ता जागापूर आवहू शकत नाहं ता जागापूर मी जात हि, तोहोलोच तुमूह पुण किथे. 34मी तुमूह नोवालो आज्ञा आपथु कि तुमूह एकमेका हे-यो प्रेम केरू जोहलो मी तुमूह प्रेम किरील हि तोहोलोच तुमुबीही एकमेका हे-यो प्रेम केरू. 35जर तुमूह एकमेका हे-यो प्रेम केरुहू तेवी प्रत्येक जन ओलखिन लेती कि तुमूह मारा चेला हेते.

पतरसने यीशुह नकारणेन संकेत

(मत्ती 26:31-35; मरकुस 14:27-31; लूका 22:31-34)

36शिमोन पतरसाने ताह फुसील, “हे प्रभु, तू का जात हि?” यीशु ताह उत्तर आपील, “तू ऐवी मार पासाण आवहू शकत नाहं; पुण ओवतो तू मार पासाण आवूह.” 37पतरस ताह कियील, “हे प्रभु, ऐवी मी तारे पासाण काहा आव सकेत नाहं? मी तर तार केरता मारो जीव भी आप देह.” 38यीशु उत्तर आपील, “तू स्वताहन जीव आपण्यू? मी तुवाह खेरीच केथु का कुकडू वाह नाह देत ताहवोर तू माहु तीन वारीन नाकार दीही.”

Currently Selected:

यूहन्ना 13: NLXNT

Highlight

Copy