यूहन्ना 10

गोवाल एने मेंढरान वार्ता

1यीशु ताह कियील, “मी तुमु खेरीज किथे, जो मेंढराह वाडाम बायनामाय माय जात नाह. एने दिहीरा बाजूने माय जाथू, तो चोर एने लुटणार असतो. 2पुण जो बायनामाय माय जाथू तो मेंढरे चालनारू असतो. 3तान केरता द्वारपाळ बायणो उगाडणे, एने मेंढराह आयेडने एने तान आवाज होमेलनू तो मेंढराह नाव लीन आयेडने एने ता बाहेर लीन जाणे. 4तो आपणो आखा मेंढराह ताहेरया बाहेर काडीन, तेवी तान ओगाण ओगाण तो चलील, एने तान मेंढरे तान पासाण-पासाण चालतो रेणू, कारण ते तान आवाज ओलकतेह. 5मेंढरे काल्लोबी एजानल्यो ला देखीन, तान तानगेत केरतीन नाहं ते तापुररीन सेटो जातेह कारण ते ता एजानल्यो आवाज ओळखतेह नाहं.” 6यीशु ने ताह हा वार्ता आपील, पुण ते होमजू शकले नाहं कि यीशु काय किथी हि.

यीशु हाजालो गोवाल

7तेवी यीशु ताह पोशो केदा, “मी तुमूह खेरो किथी हि, कि मेंढरा केरता बायणो मी हि.” 8ता आखा मारो पेल आवा एता, ते चोर एने चोरटा एता पुण मेंढरा तान होमलील नाहं. 9मी बायणो हि; एने जो कूण मारोत प्रवेश करने तर तान उद्धार एय एने आहने आवी एने बाहेर जाहो एने ताह खाणेन जुडी. 10चोर आवथू तो तो फक्त चोरी, खुन एने खेतेम केरणेन केरता आवथू पुण मी तान केरता आवा हि कि माणहे जादा जीवन जीवहु शकेल. 11“हाजो चालनारू मी हि, हाजो चालनारू आपणो मेंढरा केरता जीव आपुह शकणे.” 12पुण भाडान नौकरा तो चारणार नाहरेने एने मेंढरे तान स्वताहन नाह सोता ताहेरया किइल आविह तो ताह देखीन पोडीन जाथू एने मालक्यान मेंढ्यापूर झेडपे टाकीन ताह दाणाफाण करने. 13नौकराना हीन जाथू कारण तो मालक्यान हि कारण ताह मेंढरान कालजी नाह सोती. 14हाजो चालनारू मी हि; आपणो मेंढराह मी ओळखणे एने मारी मेंढरे माहु ओलकतेह. 15तोहोलोच ओलकतेह जोहलो परम आबोक माहु ओळखणे एने मी परम पिताला ओळखणे मारो मेंढरा केरता मी जीव आपथु. 16मारी उंजू मेंढरे हि जी ज्या टोळमाय नाहं माहु ताह पुण लीन आवही ते पुण मारी आवाज होमलती एने आवो टोलाम आवीन एक एय ओवतो आखान एकुच चालनारू एती. 17परम आबोक माहु जानकेरता प्रेम करने कि मी आपणो जीव आपथु मी आपणो जीव आपथु जानकेरता कि मी ताह पोशो पोशा लेहु शकणे हा माफायरीन कूण लेहु शकत नाहं. 18पुण मी स्वताह मारो ईच्छा आपतेन हि तो माहु आपणेन अधिकार हि हा आज्ञा माहु मारो परम आबोक फायरीन जुडना हि.

19ज्याह शब्दामुळे यहूदी अधिकारी माय एक उंजू फुट पुडील. 20मोकताज केहू लागिल, “हा देड एनो हि ज्यामाय दुष्ट आत्मा ने वास किरील हि, एने तो गांडो हि; तुमूह यान का होमलने?” 21काही दिहरा माणहे कियेल, “हे शब्द एखादो ओहला माणाहान एहू शकत नाहं कि ज्याह दुष्ट आत्मा माय वास किरील हि. निश्चय हि कूण दुष्ट आत्मा लागिल कूण आंधल्हा डोला आपुह शकत नाहं?”

यहूदीन अविश्वास

22ओवतो यरूशलेमा माय पुण: तियारकेरणे तिवार आवा एतो एने ते दिह हियायान एता. 23यीशु मंदिरामाय सुलेमानाह बोगवानानडीन आहने फिरीन एतो. 24तेवी यहूदी अधिका-यान ताह घेरलेना एने कियेल, तू आपणो मोन कुलबूखिवोर संशयामाय पोडही, जर तू मसीह हीच तर आमूह उघड केवो. 25यीशु उत्तर आपील, मी तुमूह कियील हि एने विश्वास केरतीन नाहं जे कामे मी मारो आबाकने नावान करने याम तो स्वताह गवाही हि. 26पुण तुमूह माणहे विश्वास केरतीन नाहं कारण तुमूह मारो मेंढ्यामायरीन नाहं. 27मारी मेंढरे मारो आवाज ओलकतेह एने मी ताह ओलकतेह ते मारो पासाण आवते. 28मी ताह अनंत जीवन आपथु तानकेरीन केधीच नाश एय नाहं एने कूण ताह माफायरीन साडाळीनि लेहु शकत नाहं. 29माहु तां पोर हक्क आपणार मारो परम आबोक आखारीन महान हि मारो आबापुररीन ताह कूण सांडाळीन शकत नाहं. 30मारो आबुक एने मी एक हि. 31ओवतो यहूदी अधिका-यान यीशुह मारणे केरता दिगुड उखीलील. 32यीशु ने ताह कियील, आबापुररीन मी तुमूह मोकता हाजो काम देखाडणे हि तामायरीन कायताहा कामान केरता तुमूह माहु दिगुड देतेह हि? 33यहूदी अधिका-यान उत्तर आपील, आमु तुवाह काल्लोबी हाजो कामान केरता डीगुडदी केरतीन नाहं तर तान केरता केरुहू हि कि तू बोगवानान निंदा केरतीन हि एने तू फक्त एक माणुह हि, स्वताह बोगवान जाही केरणू केरता हि.

34यीशु ताह उत्तर आपील, काय हे तुमरो व्यवस्था माय लेखील नाहं कि, मी कियील कि तुमूह आखा बोगवान हि. 35जाह बोगवानान वचन जुडणो जर ताह बोगवान केदा ते पवित्र शास्त्रान भंग इत नाह 36ते ज्याह मारो आबुक पवित्र ठराविन जगाम मोकलील हि, तू निंदा केरणे केवळ जानकेरता कि कियील मी बोगवानान सोरो हि. 37जर मी मारो आबाकने काम केरतीन नाहं तर मारो विश्वास केरू मा. 38पुण जर मी मारो आबाकने कार्य केरतीन हि तर जर तुमूह मारपुर विश्वास केरतीन नाहं तर ता कार्यामाय हि विश्वास केरू जापोर तुमूह हे अनुभव केरूह शकतेहे एने ओलखु शकता कि मारो आबुक कुणबी हि एने मारो आबाक माय मी हि. 39जापोर यहूदयान ताह बोन्दि बोणावणे केरता इकवारी पोशो प्रयत्न किरील पुण यीशु तान तान आथा मायरीन निकलीन गीयो.

40यीशु ओवतो यार्देन च्या पुरलेउखीर ता जागे चालते गीयो, जाहरी देखील यूहन्ना बाप्तिस्मा आपतालु एतो, यीशु ताहरी थोबील. 41जादा माणहे ताहेऱ्यो आवा एने ताह कियेल, “यूहन्ना ने जुलुम आश्चर्य कामे केरील नाहं, पुण ज्याह व्यक्तीनबाराम यूहन्ना ने जे कियील एता, ता आखा खेरीच निकेलना.” 42ओवतो ताजागेन जादा माणहान यीशुवर विश्वास किरील.

Currently Selected:

यूहन्ना 10: NLXNT

Highlight

Copy