रोमियों 3
3
माहापुरू चो नियाय चो राका
1आउर यहूदी चो काय बड़ाई नाहले खतना चो काय फायदा? 2हर परकार ले खुबे काई। पयले तो ऐ कि माहापुरू चो बचन हुनमन के सोपाय गेली।
3अगर आदो बिश्वासघाती निकरलो ने बले काय होली? काय हुनमन चो बिश्वासघाती होलो ने माहापुरू चो सत फकाहा होये दे? 4केबीई नाई! मान्तर माहापुरू सत आउर सपाय माने फंदी ठेबाया जादे, जसन लिकलोर आसे,
“जेचो ले तुय आपलो गोठमन ने धरमी हो से
आउर नियाय करतो समया तुय जय पाव।”
5ऐईकाजे अगर आमचो अधरम माहापुरू चो धारमिकता ठेबाऊन देऊ आय, तो आमी काय बोलवां? काय ऐ कि माहापुरू जोन रीस करू आय अनियायी आय? (ऐ तो मय माने चो रीति ले बलें सें)। 6केबीई नाई! नाहले तो माहापुरू कसन जगत चो नियाय करे दे?
7अगर मोचो फंद चो लागुन माहापुरू चो सत हुनचो महिमा चो काजे, जादा करून उजागर होली तेबे फेर केंव पापी चो असन मय डण्ड चो लायक ठेबाय जायें सें? 8“आमी केंव खराप नी करू कि भलाई निकरो? जसन आमचो उपरे ऐई दोष लगाय बले जाऊ आय, आउर कितलो बोलु आत कि ऐ मन चो ऐई बोलतोर आय। मान्तर असनमन चो दोषी ठेबातोर ठीक आय।”
सपाय पाप करला
9तेबे फेर काय होली? काय आमी हुनमन ले अच्छा आंव? केबीई नाई; कसनबल्लोने आमी यहूदीमन आउर यूनानीमन दुनो चो थाने ऐ दोष लगाऊन चुकलु से कि हुनमन सपाय पाप चो वश ने आसोत। 10जसन लिकलोर आसे:
“कोनी धरमी निआत, गोटक बले निआत।
11कोनी समजदार निआत;
कोनी माहापुरू के डगरातो बिता निआत।
12सपाय भुलकुन गेला से, सपाय चो सपाय ठग बनुन गेला से;
कोनी भलाई करतो बिता निआत, गोटक बले नाई।
13हुनमन चो टोडरा उगाढ़ी होलो कबर आय,
हुनमन आपलो जीबमन ले छंद करला सोत,
हुनमन चो होट ने सांपमन चो बीस आसे।
14हुनमन चो मुंह सराप आउर कडूपिता ले भरली से।
15हुनमन चो पाँय लऊ बहातो काजे पयले आसे,
16हुनमन चो बाट ने नाश आउर कलेश आसे,
17हुनमन हरिक चो बाट नी जानला।
18हुनमन चो आँईक पुरे माहापुरू चो भय निआय।”
19आमी जानु से कि नियम जोन काई बोलु आय हुनीमन ले बोलु आय, जोन नियम चो संगे आसोत; ऐईकाजे कि हरकोनी मुंह बंद करा जाओ आउर पूईतराय जगत माहापुरू चो डण्ड चो लायक ठेबो; 20कसनबल्लोने नियम चो काममन ले कोनी जीव हुनचो पुरे धरमी नी ठेबदे ऐईकाजे कि नियम चो बाटले पाप चो पयचान होऊ आय।
बिश्वास चो लागुन माहापुरू चो धरम
21मान्तर अदायं नियम ले अलग माहापुरू चो हुन धारमिकता उजागर होली से, जेचो गोहई नियम आउर अगम गिआनी देऊ आत, 22बल्लोने माहापुरू चो हुन धारमिकता जोन ईशु मसीह उपरे बिश्वास करलो ने सपाय बिश्वास करतो बितामन चो काजे आय। कसनबल्लोने काई भेद नियाय;
23ऐईकाजे कि सपाय पाप करला से आउर माहापुरू चो महिमा ले दूर आसोत, 24मान्तर हुनचो अनुग्रह ले हुन छुटकारा चो बाटले जोन मसीह ईशु ने आसे, सेंत मेंत धरमी ठेबाय जाऊ आत।
25हुनके माहापुरू हुनचो लऊ चो लागुन गोटक असन पशतावा ठेबालो, जोन बिश्वास करलो ले कामकरू होऊ आय, कि जोन पाप पयले करला आउर जेचो उपरे माहापुरू आपलो धीरज चो लागुन धिआन नी दिलो। हुनमन चो बारे ने हुन आपलो धारमिकता उजागर करो। 26मान्तर ऐई समया हुनचो धारमिकता उजागर होओ। कि जेचो ले हुन खुद ची धरमी ठेबो, आउर जोन ईशु चो उपरे बिश्वास करू आत हुनचो बले धरमी ठेबातो बिता होओ। 27तो घमण्ड करतोर काहां रली? हुनचो तो जगा ची निआय। कोन-बिती नियम चो कारन ले? काय करममन चो नियम ले? नाई, मान्तर बिश्वास चो नियम चो लागुन।
28ऐईकाजे आमी ऐ नतीजा थाने पहुँचु आंव कि माने नियम चो काममन ले अलग ची, बिश्वास चो बाटले धरमी ठेबु आय।
29काय माहापुरू मात्र यहूदीमन चो ची आय? काय दुसर जातिमन चो नुआय? हव, दुसर जातिमन चो बले आय।
30कसनबल्लोने गोटक ची माहापुरू आसे, जोन खतना बितामन के बिश्वास ले आउर खतना नी होलो बितामन के बले बिश्वास चो बाटले धरमी ठेबा ये दे। 31तेबे काय आमी नियम के बिश्वास चो बाटले फकाहा ठेबाऊ से? केबीई नाई! मान्तर नियम के थीर करूं से।
Currently Selected:
रोमियों 3: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
