मत्ती 24
24
ईशु बाटले मंदिर चो नाश चो अगम गोठ
1जिदलदाय ईशु मंदिर ले निकरून भाती जाते रलो, तेबे हुनचो चेलामन हुनके मंदिर चो बनावटी दकातो काजे हुनचो लगे ईला। 2हुन हुनमन ले बल्लो, “तुमी ऐ सपाय दक सास काय! मय तुमचो ले सते बलें सें, ऐथा पकना उपरे पकना बले नी बाचे जोन घसराया नी जाये।”
ईशु चो आपस ऐतोर चिना
3जिदलदाय हुन जैतून डोंगरी थाने बसुन रलो, तेबे चेलामन अलगे हुनचो लगे ऐऊन भाती बल्ला, “आमके सांग कि ऐ गोठमन केबे होये दे? तुचो ऐतोर आउर जगत चो आखरी चो काय चिना होये दे?” 4ईशु हुनमन के जबाप दिलो, “खबड़दार राहा! कोनी तुमके नी भरमाऊक सकोत, 5कसनबल्लोने खुबे असन असन हो दे जोन मोचो नाव ले ऐऊन भाती बल दे, ‘मय मसीह आंय’, आउर खुबे के भरमादे। 6तुमी लड़ीईमन आउर लड़ीईमन चो चरचा सुना से, तेबे घबराऊन नी जाआ कसनबल्लोने ऐ मन चो होतोर जरूरी आय, मान्तर हुदलदाय आखरी नी होये। 7कसनबल्लोने जाति उपरे जाति, आउर राज उपरे राज चड़ाई करे दे, आउर जगा-जगा अकाल पड़े दे, आउर भुईं डोल होये दे। 8ऐ सपाय गोठमन डण्डमन चो मुर होये दे। 9तेबे हुनमन कलेश देतो काजे तुमके धरा दे, आउर तुमके मारून पका दे, आउर मोचो नाव चो कारन सपाय जातिमन चो लोग तुमचो ले बईर संगा दे। 10तेबे खुबे असन ठोकरना खादे, आउर गोटक दुसर के धरा दे, आउर गोटक दुसर ले बईर संगा दे। 11खुबे असन फंदी अगम गिआनी उठून उबा हो दे, आउर खुबेमन के भरमादे। 12अधरम चो बड़लोने खुबेमन चो मया सितर होऊन जाये दे, 13मान्तर जोन आखरी तक धीरज धरून रये दे, हुनचेई मुक्ति होये दे। 14आउर राज चो ऐ नगतखबर पुईतराय जगत ने परचार करा जाये दे, कि सपाय जातिमन उपरे गोहई होओ, तेबे आखरी होये दे।”
माहासंकट चो मुर
15“ऐईकाजे जिदलदाय तुमी हुन उजरातो बिती खराप तीज के जेचो चरचा दानिय्येल अगम गिआनी चो बाटले होऊ रली, पवितर जगा ने उबा होलोर दका (जोन पढ़ो, हुन समजो), 16तेबे जोन यहूदिया ने रओ हुन डोंगरी उपरे परा ओत। 17जोन छानी उपरे रओ, हुन आपलो घर थानले सामान धरूक नी उतरो; 18आउर जोन बेड़ा ने रओ, हुन आपलो फटीई धरतो काजे पाटकुती नी बाहड़ो।
19“हुन दिनमन ने जोन देंहबारी आउर गोरस खुआते रदे, हुनमन चो काजे हाय, हाय। 20पारथना करा कि तुमके सीत ने नाहले सब्त चो दिने पराऊक नी पड़ो। 21कसनबल्लोने हुन समया असन भारी कलेश होये दे, जसन जगत चो मुर ले ना ऐबे तक होली आउर ना केबीई होये दे। 22अगर हुन दिन घटाया नी जाति तेबे कोनी जीव जन्तु नी बाचता, मान्तर चुनलो बितामन चो लागुन हुन दिन घटाया जाये दे। 23हुदलदाय अगर कोनी तुमचो ले बलदे, दका, मसीह ऐथा आसे! नाहले हुता आसे! तेबे बिश्वास नी करा।
24“कसनबल्लोने झूठा मसीह आउर फंदी अगम गिआनी उठून उबा हो दे, आउर बड़े चिना, आउर भयंकर काम दका दे कि अगर होऊक सको तो चुनलो बितामन के बले भरमादे। 25दका, मय पयले ले तुमचो ले ऐ सपाय काई बोलुन दिले से। 26ऐईकाजे अगर हुनमन तुमचो ले बोल दे, ‘दका, हुन रान ने आसे’, तेबे बाहरे नी निकरून जाआ; नाहले ‘दका, हुन बाकरामन ने आसे’, तेबे बिश्वास नी करा।
27“कसनबल्लोने जसन बिजली बेर उदया ले निकरून भाती बेर पढ़ती तक बरू आय, असने ची माने चो बेटा चो बले ऐतोर होये दे। 28जोन थाने मोड़ी रओ, हुता गिदाहा रूंड़ा हो दे।
माने चो बेटा चो आउर ऐतोर
29“हुन दिनमन चो कलेश चो पाचे तुरते बेर अंधार होये दे, आउर जोन चो उजर जाते रये दे, आउर तारामन बादरी ले घसरुन पढ़दे आउर बादरी चो शक्तिमन हलाया जाये दे। 30तेबे माने चो बेटा चो चिना बादरी ने दका देये दे, आउर तेबे धरतनी चो सपाय कुलमन चो लोग छाती पेटदे; आउर माने चो बेटा के बड़े सामरत आउर सुन्दर चो संगे बादरी चो कुमरामन उपरे ऐतोर दक दे। 31हुन तुरी चो बड़े शब्द चो संगे आपलो दूतमन के पटाये दे, आउर हुनमन बादरी चो ऐ पाट ले हुनपाट तक, भोंवरक ले हुनचो चुनलो बितामन के रून्डाये दे।”
अंजीर चो रूक ले सिक्या
32“अंजीर चो रूक ले ऐ कहनी सिका जिदलदाय हुनचो खेंदा कोंवरी होऊ आय आउर पान निकरूक मुरयाऊ आय, तेबे तुमी जानु आस कि जेठ लगे आसे। 33ऐई रीति ले जिदलदाय तुमी ऐ सपाय गोठमन के दका, तेबे जाना कि हुन लगे आसे, मान्तर बाट ची थाने आसे। 34मय तुमचो ले सते बलें सें कि जिदलदाय ले ऐ सपाय गोठमन पुरा नी होओ, हुदलदाय ले ऐ पीढ़ी चो आखरी नी होये। 35बादरी आउर धरतनी टलुन जादे, मान्तर मोचो गोठमन केबीई नी टले।”
चेता राहा
36“हुन दिन आउर हुन घड़ी चो बारे ने कोनी नी जानोत, ना सरग चो दूत ना बेटा, मान्तर मात्र बुआ। 37जसन नूह चो दिन रये, असने ची माने चो बेटा चो ऐतोर बले होये दे। 38कसनबल्लोने जसन जल परलय ले पयले चो दिनमन ने, जोन दिन तक कि नूह जाहाज थाने नी चेगलो, हुन दिन तक लोग खाते-पिव ते रवत, आउर हुनमन ने बिहा होते रये। 39आउर जिदलदाय ले जल परलय ऐऊन भाती हुन सपाय के बोहड़ाऊन नी निली, हुदलदाय ले हुनमन के काई बले जान नी पढ़ली; असने ची माने चो बेटा चो बले ऐतोर होये दे। 40हुन समया दुय झन बेड़ा ने हो दे, गोटक धरून निया जाये दे आउर दुसर छांडुन दिया जाये दे। 41दुय झन बायले लेकीमन जता ने रूचते रदे, गोटक धरून निया जाये दे आउर दुसर छांडुन दिया जाय दे। 42ऐईकाजे चेत ने राहा, कसनबल्लोने तुमी नी जानास कि तुमचो परबु कोन दिने ऐये दे। 43मान्तर ऐ जानुन राआ कि अगर घर चो मालिक जानते रतो कि चोर कोन पाहार ऐये दे तेबे चेता रतो, आउर आपलो घरे चोरी होऊक नी देतो। 44ऐईकाजे तुमी बले तिआर राहा, कसनबल्लोने जोन घड़ी चो बारे ने तुमी बिचारास बले नाई, हुनी समया माने चो बेटा ऐऊन जाये दे।”
बिश्वास लायक दास आउर दुष्ट दास
45“आउर हुन बिश्वास लायक आउर अकल बिता दास कोन आय, जोन के मालिक आपलो नवकर चाकरमन उपरे सरदार ठेबालो कि समया ने हुनमन के भात देओ? 46धन्य आय हुन दास, जेके हुनचो मालिक ऐऊन भाती असने ची करते पाओ। 47मय तुमचो ले सते बलें सें, हुन हुनके आपलो पुईतराय धन-माल थाने अधिकारी ठेबा ये दे। 48मान्तर अगर हुन दुष्ट दास बिचार करूक मुरयाओ कि मोचो मालिक चो ऐतोर ने बेर आसे, 49आउर आपलो संगवारी दासमन के पेटुक मुरयाओ, आउर मतवारमन चो संगे खाओ पियो। 50तेबे हुन दास चो मालिक असन दिने ऐये दे, जिदलदाय हुन हुनचो बाट दकते नी रओ, आउर असन घड़ी जोन के हुन नी जानते रओ, 51तेबे हुन हुनके भारी तकलीस देये दे, आउर हुनचो भाग कपटीमन चो संगे ठेबा ये दे: हुता गागतोर आउर दात कड़रतोर होये दे।”
Currently Selected:
मत्ती 24: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
