मत्ती 22
22
बिआ-भोज चो कहनी
1ईशु फेर हुनमन ले कहनीमन ने बोलुक मुरयालो, 2“सरग चो राज हुन राजा चो समान आय, जोन आपलो बेटा चो बिहा करलो। 3आउर हुन आपलो दासमन के पठालो कि हाग दिलो लोगमन के बिहा चो भोज ने हाग देओत; मान्तर हुनमन ऐऊक नी चाहला। 4फेर हुन आउर दासमन के ऐ बोलुन भाती पठालो, ‘हाग दिलो लोगमन ले बला: दका, मय भोज तिआर करले से, मोचो बयला आउर पोसलो बिती पशु मारा गेली से, आउर सपाय काई तिआर आसे; बिहा चो भोज ने ईआ।’ 5मान्तर हुनमन मुंह फेरून जाते गेला: कोनी आपलो बेड़ा बाटे, कोनी आपलो बेबार बाटे। 6दुसर लोगमन जोन बाचते रवत हुनचो दासमन के धरून भाती हुनमन चो बेईजित करला आउर मारला। 7तेबे राजा के रीस ईली, आउर हुन आपलो सेना पटाऊन भाती हुन हत्यारामन चो नाश करलो, आउर हुनमन चो नंगर के जला लो। 8तेबे हुन आपलो दासमन ले बल्लो, ‘बिहा चो भोज तिआर आसे मान्तर हाग दिलो लोग लायक नी ठेबला। 9ऐईकाजे जोड़ानमन थाने जाआ आउर जितरो लोग तुमके मिर दे, सपाय के बिहा चो भोज ने हाग देऊन आना।’ 10आउर हुन दासमन सड़कमन थाने जाऊन भाती काय खराप काय अच्छा, जितरो मिरला, सपाय के रूंड़ा करला; आउर बिहा चो घर सगामन ले भरली।
11“जिदलदाय राजा सगामन के दकुक भीतरे ईलो, तेबे हुन हुता गोटक माने के दकलो, जोन बिहा चो फटीई नी पिन्दुन रलो। 12हुन हुनचो ले पचारलो, ‘हे मित; तुय बिहा चो फटीई पिन्दलोर बीना ऐथा केंव ईलीस?’ हुनचो मुंह बंद होऊन गेली। 13तेबे राजा सेवकमन ले बल्लो, ‘ऐचो हाथ पाँय बान्दुन भाती हुनके बाहरे अंधार ने पकाऊन दिआस, हुता गागतोर आउर दात कड़रतोर होये दे।’ 14कसनबल्लोने हाग दिलोर तो खुबे आसोत मान्तर चुनलोर खिन्डिक आसोत।”
राजा के कर देतोर
15तेबे फरीसीमन जाऊन भाती आपस ने बिचार करला कि हुनके कसन परकार गोठमन ने फसांवा। 16आउर हुनमन आपलो चेलामन के हेरोदीमन चो संगे हुनचो लगे ऐ बोलुक पठाला, “हे गुरू, आमी जानु कि तुय सत आस, आउर माहापुरू चो बाट सत धरम ले सिकाऊ आस, आउर काचीई फिकर नी करीस, कसनबल्लोने तुय मानेमन चो थोमना दकुन भाती गोठ नी गोठयाईस। 17ऐईकाजे आमके सांग कि तुय काय समज सीस? राजा के कर देतोर नगत आय कि नुआय।” 18ईशु हुनमन चो दुष्टता जानुन भाती बल्लो, “हे कपटीमन, मोके केंव परके सास? 19कर चो सिक्का मोके दकाआ।” तेबे हुनमन हुनचो लगे गोटक दीनार धरून ईला। 20हुन हुनमन ले पचारलो, “ऐ छाप आउर नाव काचो आय?” 21हुनमन हुनचो ले बल्ला, “राजा चो।” तेबे हुन हुनमन ले बल्लो, “जोन राजा चो आय, हुन राजा के; आउर जोन माहापुरू चो आय, हुन माहापुरू के दिआस।” 22ऐ सुनुन भाती हुनमन भक्याला, आउर हुनके छांडुन भाती गेला।
फेर जीव उठतोर आउर बिआ
23हुनी दिने सदूकी जोन बोलु आत कि मरलो बितामन चो जीव उठतोर आसे ची नाई, हुनचो लगे ईला आउर हुनचो ले पचारला, 24“हे गुरू, मूसा बोलु रलो कि अगर कोनी माने बिना बेटा चो मरो, तेबे हुनचो भाई हुनचो बायले ले बिहा होऊन आपलो भाई काजे बंश जनमाओ। 25अदायं आमचो थाने सात भाई रवत; पयला बिहा करून मरलो, आउर बेटा नी होतोर कारन आपलो बायले के आपलो भाई चो काजे छांडुन गेलो। 26ऐ परकार दुसर आउर तीसर बले करला, आउर सातो ले ऐई होली। 27सपाय चो पाचे हुन बायले लेकी बले मरली। 28आउर जीव उठलो ने हुन सातो झान ले काचो बायले होये दे? कसनबल्लोने हुन सपाय चो बयाले होऊ रली।” 29ईशु हुनमन के जबाप दिलो, “तुमी पवितर शास्त्र आउर माहापुरू चो सामरत नी जानास; ऐई कारन भुल ने पड़ला सास। 30कसनबल्लोने जीव उठलो ने हुनमन ना बिहा करदे आउर ना बिहा ने दिया जादे मान्तर सरग ने माहापुरू चो दूतमन चो असन होदे। 31मान्तर मरलोमन चो जीव उठतोर बारे ने काय तुमी ऐ बचन नी पड़लास जोन माहापुरू तुमचो ले बल्लो: 32‘मय अब्राहाम चो माहापुरू, आउर इसाक चो माहापुरू, आउर याकूब चो माहापुरू आंय’? हुन मरलोमन चो नाई, मान्तर जीवतामन चो माहापुरू आय।” 33ऐ सुनुन भाती लोग हुनचो उपदेश ले चकित होला।
सबले बड़े हुकुम
34जिदलदाय फरीसीमन सुनला कि ईशु सदूकीमन चो मुंह बन्द करून दिलो, तेबे हुनमन रूंड़ा होला। 35हुनमन थानले गोटक नियमकारी हुनके परकतो काजे हुनचो ले पचारलो, 36“हे गुरू, नियम ने कोन बिती हुकुम बड़े आय?” 37हुन हुनचो ले बल्लो, “तुय माहापुरू आपलो परबु ले आपलो पुईतराय मन आउर आपलो पुईतराय जीव आउर आपलो पुईतराय अकल चो संगे मया संगाव। 38बड़े आउर मुख्य हुकुम तो ऐई आय। 39आउर हुनचेई असन ऐ दुसर बले आय कि तुय आपलो अड़स-पड़स चो लोग ले आपलो समान मया संगाव। 40ऐई ची दुय हुकुममन पुईतराय नियम आउर अगम गिआनीमन चो आधार आय।”
मसीह दाऊद चो बेटा नाहले दाऊद चो परबु आय?
41जिदलदाय फरीसी रूंड़ा रवत, तेबे ईशु हुनमन ले पचारलो, 42“मसीह चो बारे ने तुमी काय बिचारे सास? हुन काचो बेटा आय?” हुनमन हुनचो ले बल्ला, “दाऊद चो।” 43हुन हुनमन ले पचारलो, “तेबे दाऊद आत्मा ने होऊन भाती हुनके परबु केंव बोलु आय? 44‘परबु, मोचो परबु ले बल्लो, मोचो उजा बाटे बस, जिदलदाय ले कि मय तुचो बयरीमन के तुचो पाँयमन चो खाले नी निकरून देयें।’ 45अच्छा, जिदलदाय दाऊद हुनके परबु बोलु आय, तेबे हुन हुनचो बेटा कसन ठेबलो?” 46ऐचो जबाप ने कोनी बले गोटक गोठ नी बोलुक सकला। हुन दिन ले कोकीई फेर हुनचो ले काई पचारतोर साहास नी होली।
Currently Selected:
मत्ती 22: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
