मत्ती 20

अंगुर बनवाड़ी चो भुतियारमन चो कहनी

1“सरग चो राज कोनी घर चो मालिक चो असन आय, जोन बिहाने निकरलो कि आपलो दाख चो बनवाड़ी ने भुतियारमन के लगा ओ। 2हुन भुतियारमन ले गोटक दीनार रोजी थाने ठेबालो आउर हुनमन के आपलो दाख चो बनवाड़ी ने पठालो। 3फेर गोटक पाहार दिन चेगली हुन निकरून भाती दुसर लोगमन के हाट ने बेकार उबा दकलो, 4आउर हुनमन ले बल्लो, ‘तुमी बले दाख चो बनवाड़ी ने जाहा, आउर जोन काई ठीक आसे, तुमके देयें दें।’ आउर हुनमन बले गेला। 5फेर हुन दुसर आउर तीसर पाहार चो लगे निकरून भाती असने ची करलो। 6गोटक घंटा दिन रली हुन फेर निकरून भाती दुसरमन के उबा पावलो, आउर हुनमन ले बल्लो, ‘तुमी केंव ऐथा दिनभर बेकार उबा रलास?’ हुनमन हुनचो ले बल्ला, ‘ऐईकाजे कि कोनी बले आमके भुती थाने नी लगाला।’ 7हुन हुनमन ले बल्लो, ‘तुमी बले दाख चो बनवाड़ी ने जाहा।’”

8“सांज के दाख चो बनवाड़ी चो मालिक आपलो भण्डारी ले बल्लो, ‘भुतियारमन के हाग देऊन भाती पाटे चो लोग ले धरून भाती पयले चो लोग तक हुनमन के भुती देऊन देस।’ 9जिदलदाय हुनमन ईला जोन घंटा भर दिन रली आउर लगाया जाऊ रओत, तेबे हुनमन के गोटक-गोटक दीनार मिरली। 10जोन पयले ईला हुनमन ऐ समजला कि आमके खुबे मिरेदे, मान्तर हुनमन के बले गोटक-गोटक दीनार ची मिरली। 11जिदलदाय मिरली तेबे हुनमन घर चो मालिक उपरे गुरमुरुन भाती बोलुक मुरयाला, 12‘ऐ पाटे चो लोगमन गोटक ची घंटा काम करला, आउर तुय हुनमन के आमचो बराबर करून दिलीस, जोनमन दिनभर चो बोजा उठाला आउर घाम कटलाला?’” 13हुन हुनमन थानले गोटक के जबाप दिलो, “ऐ मीत, मय तुचो ले काई अनियाय नी करे। काय तुय ची मोचो ले गोटक दीनार नी ठेबाऊ रलीस? 14जोन तुचो आय, उठाव आउर जाते जा; मोचो इच्छा ऐ आय कि जितरो तुके देयें दें हुतलीई ची ऐ पाटे चो के बले देयेंदे। 15‘काय ऐ नगत नुआय कि मय आपलो माल ले जोन चाह ले हुन करेंदे काय तुय मोचो अच्छा होतोर लागुन तुय खराप नजर ले दकसीस?’ 16ऐई रीति ले जोन पाटकुती चो आत, हुनमन पुरे होदे; आउर जोन पुरे चो आत, हुनमन पाटकुती होदे।”

आपलो मरना आउर जीव उठतोर बारे ने फेर अगम गोठ

17ईशु यरूशलेम ने जाते-जाते बारा चेलामन के चिमचाम जगा ने नीलो, आउर बाट ने हुनमन ले बोलुक मुरयालो, 18“दका, आमी यरूशलेम ने जाऊँ से; आउर माने चो बेटा परधान याजकमन आउर शास्तरीमन चो हाथे धराया जाये दे, आउर हुनमन हुनके घात चो लायक ठेबा दे। 19आउर हुनके दुसर जातिमन चो हाथे सोप दे कि हुनमन हुनके मजाक उड़ा ओत, आउर कोड़ा मारोत, आउर कुरूस उपरे चेगा ओत, आउर हुन तीसर दिने जीवऊन जायेदे।”

गोटक आया चो आपलो पिलामन काजे गुहार

20तेबे जबदी चो बेटामन चो आया, आपलो बेटामन चो संगे ईशु चो लगे ऐऊन भाती जुहार करली, आउर हुनचो ले काई मांगुक मुरयाली। 21हुन हुनचो ले बल्लो, “तुय काय चाहय सीस?” हुन हुनचो ले बल्ली, “ऐ बचन देस कि मोचो ऐ दुनो बेटा तुचो राज ने गोटक तुचो उजा घाई आउर गोटक तुचो डेबरी घाई बोसोत।” 22ईशु जबाप दिलो, “तुमी नी जानास कि काय मांगेसास। जोन बटका थानले मय पिवतो थाने आसे, काय तुमी पिऊक सकास?” हुनमन हुनचो ले बल्ला, “पिऊक सकु।” 23हुन हुनमन ले बल्लो, “तुमी मोचो बटका थानले तो पिआ से, मान्तर आपलो उजा घाई आउर डेबरी घाई कोकीई बसातोर मोचो काम नुआय, मान्तर जेचो काजे मोचो बुआ चो बाटले तिआर करा गेली, हुनीमन चो काजे आय।”

24ऐ सुनुन भाती दसों चेलामन हुन दुनो भाईमन उपरे रीस होला। 25ईशु हुनमन के लगे हाग देऊन भाती बल्लो, “तुमी जानास कि दुसर जातिमन चो अधिकारी हुनमन उपरे राज करू आत; आउर जोन बड़े आत, हुनमन-हुनमन उपरे हक चलाऊ आत। 26मान्तर तुमचो थाने असन नी होये दे; मान्तर जोन कोनी तुमचो ले बड़े होऊक चाहा ये दे, हुन तुमचो सेवक बनो; 27आउर जोन तुमचो थाने परधान होऊक चाहाय दे, हुन तुमचो दास बनो; 28जसन कि माने चो बेटा; हुन ऐईकाजे नी ईलो कि हुनचो सेवा शासन करा जाओ, मान्तर ऐईकाजे ईलो कि खुद सेवा शासन करो, आउर खुबे लोगमन के छंड़ातो काजे आपलो जीव देओ।”

दुय झान कानामन के दकातोर

29जिदलदाय हुनमन यरीहो ले निकरते रवत, तेबे गोटक बड़े भीड़ हुनचो पाट-पाट होली। 30आउर दुय झान कानामन, जोन सड़क चो रेटे बसुन रवत, ऐ सुनुन भाती कि ईशु जाये से, चिचयाऊन भाती बोलुक मुरयाला, “हे परबु, दाऊद चो पिला, आमचो उपरे दया कर।” 31लोगमन हुनमन के खिजला कि ओगाय रा; मान्तर हुनमन आउर बले चिचयाऊन भाती बल्ला, “हे परबु, दाऊद चो पिला, आमचो उपरे दया कर।” 32तेबे ईशु उबा होऊन भाती, हुनमन के हाग दिलो आउर बल्लो, “तुमी काय मन करसास कि मय तुमचो काजे करेंदे?” 33हुनमन हुनचो ले बल्ला, “हे परबु, ऐ कि आमचो आँईकमन खुलुन जाओ।” 34ईशु जीव दुकाऊन भाती हुनमन चो आँईक के छिंवलो, आउर हुनमन तुरते दकुक मुरयाला; आउर हुनचो पाट-पाट गेला।

Currently Selected:

मत्ती 20: HLBNT

Highlight

Copy