मत्ती 15
15
रीति आउर हुकुम नी मानतो उपरे सवाल
1तेबे यरूशलेम ले कितरो फरीसी आउर शास्तरी ईशु चो लगे ऐऊन भाती बोलुक मुरयाला, 2“तुचो चेलामन सियानमन चो रीति बिदी के केंव टरकाय सोत, कि हाथ नी धोऊन भाती रोटी खाऊ आत?” 3ईशु हुनमन के जबाप दिलो, “तुमी बले आपलो रीति बिदी चो लागुन केंव माहापुरू चो हुकुम टालसास? 4कसनबल्लोने माहापुरू बल्लो से, ‘आपलो बुआ आउर आपलो आया चो ईजीत कर’, आउर ‘जोन कोनी बुआ नाहले आया के खराप बोलो, हुन मारा जाओ।’ 5मान्तर तुमी बलेसास कि अगर कोनी आपलो बुआ नाहले आया ले बोलो, ‘जोन काई तुके मोचो ले लाब मिरूक सकते रली, हुन माहापुरू के भेट चेगाऊन चुकलो’ 6तेबे हुन आपलो बुआ चो ईजीत नी करो, ऐ परकार तुमी आपलो रीति बिदी चो लागुन माहापुरू चो बचन टालुन दिलास। 7हे कपटीमन, यशाया तुमचो बारे ने ऐ अगम गोठ ठीक करलो से:
8‘ऐ लोग ओट ले तो मोचो ईजीत करू आत,
मान्तर हुनमन चो मन मोचो ले लापी आसे।
9आउर ऐ फकाहा मोचो उपास करू आत,
कसनबल्लोने मानेमन चो बिदीमन के धरम उपदेश करून सिकाऊ आत।’”
अशुद्ध करतो बिती गोठमन
10तेबे ईशु लोगमन के आपलो लगे हाग देऊन भाती हुनमन ले बल्लो, “सुना, आउर समजा 11जोन मुंह ने जाऊ आय, हुन माने के अशुद्ध नी करे, मान्तर जोन मुंह ले बाहरे निकरू आय हुनी माने के अशुद्ध करू आय।” 12तेबे चेलामन ऐऊन भाती हुनचो ले बल्ला, “काय तुय जानीस कि फरीसीमन ऐ बचन सुनुन भाती ठोकर खादला?” 13ईशु जबाप दिलो, “सपाय बुटा जोन मोचो सरग चो बुआ नी लगालो, उकना जाय दे। 14हुनमन के जाऊक दिआस; हुनमन काना बाट दकाऊ आत आउर काना अगर काना के बाट दकाओ, तेबे दुनो खोदरा ने घसरुन पड़दे।”
15ऐ सुनुन भाती पतरस हुनचो ले बल्लो, “ऐ कहनी आमके समजाऊन देस।” 16हुन बल्लो, “काय तुमी बले ऐबले ओबुझ आसास? 17काय तुमी नी जानास कि जोन काई मुंह ने जाये से हुनी पेट ने पडु आय, आउर झाड़ा बाटले निकरून जाऊ आय? 18मान्तर जोन काई मुंह ले निकरू आय, हुन मन ले निकरू आय, आउर हुनी माने के अशुद्ध करू आय। 19कसनबल्लोने खराप बिचार, हत्या, दुसर चो बायले के नेतोर, बेबीचार, चोरी, झूठा गवा आउर निन्दा मन ले निकरू आय। 20ऐई आय जोन माने के अशुद्ध करू आय, मान्तर हाथ नी धोहलोर भात खातोर माने के अशुद्ध नी करे।”
कनानी जाति बायले लेकी चो बिश्वास
21ईशु हुता ले निकरून भाती, सूर आउर सयदा चो परदेश चो बाटे गेलो। 22हुन परदेश ले गोटक कनानी बायले लेकी निकरली, आउर चिचयाऊन भाती बोलुक मुरयाली, “हे परबु! दाऊद चो पिला, मोचो उपरे दया कर! मोचो बेटी के दुष्टआत्मा खुबे कन्दराय से।” 23मान्तर ईशु हुनके काई जबाप नी दिलो। तेबे हुनचो चेलामन ऐऊन भाती ईशु ले गुहार करला, “ऐके बिदा कर, कसनबल्लोने हुन आमचो पाटे चिचयाते-चिचयाते ऐये से।” 24ईशु जबाप दिलो, “इस्राएल चो घरमन चो हाजलोर मेंडामन के छांडुन भाती मय काचीई लगे नी पटाया गेले।” 25मान्तर हुन ईली, आउर ईशु के जुहार करून बोलुक मुरयाली, “हे परबु, मोचो सायता कर।” 26ईशु जबाप दिलो, “लेकामन चो रोटी धरून कुकूरमन चो पुरे पकातोर अच्छा नुआय।” 27हुन बल्ली, “सते आय परबु, मान्तर कुकूर बले हुन बिरलो-बिरलो खाऊ आत, जोन हुनचो मालिकमन चो टेबुल ले घसरु आय।” 28ऐ थाने ईशु हुनके जबाप दिलो, “हे बायले लेकी, तुचो बिश्वास बड़े आय। जसन तुय मन करसीस, तुचो काजे असने ची होओ।” आउर हुनचो बेटी हुदली ची दाय ले चेंगा होऊन गेली।
खुबे रोगीमन के चेंगा करतोर
29ईशु हुता ले गलील चो झील चो लगे ईलो, आउर डोंगरी थाने चेगुन भाती बसलो। 30तेबे भीड़ उपरे भीड़ हुनचो लगे ईली। हुनमन आपलो संगे खोड़ीया, काना, कोंदा, ठुठा आउर दुसर खुबेमन के हुनचो लगे आनला, आउर हुनमन के हुनचो पाँयमन थाने डालुन दिला, आउर ईशु हुनमन के चेंगा करलो। 31जिदलदाय लोगमन दकला कि कोंदा बोल सोत, आउर ठुठा चेंगा होय सोत, आउर खोड़ीया हिन्डे सोत, आउर काना दक सोत तेबे अकचकित होऊन इस्राएल चो माहापुरू चो बड़ाई करला।
चार हजार लोगमन के खुआतोर
32ईशु आपलो चेलामन के हाग दिलो आउर बल्लो, “मोके ऐ भीड़ उपरे जीव दुके से, कसनबल्लोने हुनमन तीन दिन ले मोचो संगे आसोत आउर हुनमन चो लगे काई खातो काजे निआय। मय हुनमन के भुके बिदा करूक नी चाहायें, काहांय असन नी होओ कि बाट ने थाकुन भाती हुताय रओत।” 33चेलामन ईशु ले बल्ला, “आमके ऐ रान ने काहां ले ईतलो रोटी मिरेदे कि आमी ईतलो बड़े भीड़ के संतुष्ट करूंदे?” 34ईशु हुनमन ले पूछलो, “तुमचो लगे कितलो रोटी आसे?” हुनमन बल्ला, “सात, आउर खिन्डिक असन नानी मछरी।” 35तेबे ईशु लोगमन के भूईं थाने बसतोर हुकुम दिलो। 36आउर ईशु सात रोटी आउर मछरी के धरलो, धन्यबाद करून टुटालो, आउर आपलो चेलामन के देते गेलो, आउर चेला लोगमन के। 37ऐ परकार सपाय खाऊन भाती संतुष्ट होला आउर चेलामन बाचलो गोंदा ले भरलो सात टुकना उठाला। 38खातो बिती बायले लेकीमन आउर लेकामन के छांडुन चार हजार माने रवत। 39तेबे हुन भीड़ के बिदा करून डोंगा थाने चेगलो, आउर मगदन देश चो संदी ने ईलो।
Currently Selected:
मत्ती 15: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
