मत्ती 11
11
यूहन्ना डूबन देतो बिता चो सवाल
1जिदलदाय ईशु आपलो बारा चेलामन के हुकुम देऊन चुकलो, तेबे हुन हुनमन चो नंगरमन ने उपदेश आउर परचार करतो काजे हुताले जाते गेलो। 2यूहन्ना जयलघर ने मसीह चो काममन चो खबर सुनलो आउर आपलो चेलामन के हुनचो ले ऐ पचारूक पठालो, 3“काय ऐतो बिता तुय ची आस, नाहले आमी कोनी दुसर चो बाट दकु आंव?” 4ईशु जबाप दिलो, “जोन काई तुमी सुनसास आउर दकसास हुन सपाय जाऊन भाती यूहन्ना के सांगुन दिआस, 5कि काना दक सोत आउर खोड़ीयामन हिन्डे सोत बुलसोत, कोढ़ी शुद्ध करा जासोत आउर भयरामन सुन सोत, मुरदा जिआया जासोत, आउर कंगालमन के नगतखबर सुनाया जायसे। 6आउर धन्य आत हुन, जोन मोचो लागुन ठोकर नी खाये।”
ईशु चो यूहन्ना के मान करतोर
7जिदलदाय हुनमन हुता ले गेला, तेबे ईशु यूहन्ना चो बारे ने लोगमन के सांगुक मुरयालो, “तुमी रान ने काय दकुक जाऊ रलास? काय लेहरा ले हलतो बिती सरकंडामन के? 8फेर तुमी काय दकुक जाऊ रलास? काय गुलगुला फटीई पिन्दलो मनुक के? दका, जोन गुलगुला फटीई पिन्दु आत, हुनमन राज माहालमन ने रऊ आत। 9तेबे फेर केंव जाऊ रलास? काय कोनी अगम गिआनी के दकतो काजे? हव, मय तुमचो ले बलें सें मान्तर अगम गिआनी ले बले बड़े के। 10ऐ हुनी आय, जेचो बारे ने लिकलोर आसे,
‘दक, मय आपलो दूत के तुचो पुरे पटायेंसे,
जोन तुचो पुरे तुचो बाट तिआर करेदे।’
11“मय तुमचो ले सते बलेंसे कि जोन बायले लेकीमन ले जनमला सोत, हुनमन थानले यूहन्ना डूबन देतो बिता ले कोनी बड़े नी होला; मान्तर जोन सरग चो राज ने नानी ले नानी आय हुन हुनचो ले बड़े आय। 12यूहन्ना डूबन देतो बिता चो दिनमन ले ऐबे तक सरग चो राज ने ताकत संगे ओलते रला सोत, आउर ताकत बिता हुनके झिकुन धरे सोत। 13यूहन्ना लगले पुईतराय अगम गिआनी आउर नियम अगम गोठ करते रओत। 14आउर चाहायसास तेबे माना कि एलिया जोन ऐतो बिता रलो, हुन ऐई आय। 15जेचो सुनतोर कान आसे, हुन सुना।
16“मय ऐ समया चो लोगमन चो उदाहरन काचो ले देयेंदे? हुनमन हुन लेकामन चो असन आत, जोन हाटमन ने बोसुन भाती गोटक दुसर ले चिचयाऊन भाती बोलु आत, 17‘आमी तुमचो काजे बांवसी बजालु, आउर तुमी नी नाचलास; आमी तड़पलु, आउर तुमी छाती नी पेटलास।’ 18कसनबल्लोने यूहन्ना ना खाते ईलो आउर ना पिव ते, आउर हुनमन बोलु आत, ‘हुनचो भीतरे दुष्टआत्मा आसे।’ 19माने चो बेटा खाते पीते ईलो, आउर हुनमन बोल सोत ‘दका, पेटू आउर मतवार माने, कर धरू बितामन आउर पापीमन चो मीत!’ मान्तर गिआन आपलो काममन ले सत ठेबाया गेलीसे।”
मन नी फिरातो बितामन उपरे हाय
20तेबे हुन-हुन नंगरमन चो लोग के टेचराउन जबाप देऊक मुरयालो, जोन थाने हुन खुबे असन सामरत चो कामकरू रलो, कसनबल्लोने हुनमन आपलो मन नी फिराऊ रला। 21“हाय, खुराजीन! हाय, बैतसैदा! जोन सामरत चो काम तुमचो थाने करा गेली, अगर हुनमन सूर आउर सयदा ने करा जाति, तेबे टाट ओडून भाती, आउर लाकड़ी ने बोसुन भाती हुनमन केबे मन फिराऊ रता। 22मान्तर मय तुमचो ले बलें सें कि नियाय चो दिने तुमचो हालत ले सूर आउर सयदा चो हालत जादा कटलातो लायक होयदे। 23हे कफरनहूम, काय तुय सरग लगले डेंग करा जासे? तुय तो अधलोक लगले खाले जासे! जोन सामरत चो काम तुचो थाने करा गेलीसे, अगर सदोम ने करा जाति, तो हुन आजी ले बनुन रती। 24मान्तर मय तुमचो ले बलेंसे कि नियाय चो दिने तुचो हालत ले सदोम चो हालत जादा कटलातो लायक होयदे।”
ईशु चो लगे आराम
25हुदलीदाय ईशु बल्लो, “हे बुआ, सरग आउर धरतनी चो परबु, मय तुचो धन्यबाद करेंसे कि तुय ऐ गोठमन के गिआनिमन आउर समजदारमन ले लुकाऊन संगालीस, आउर लेकामन उपरे उजागर करली सीस। 26हव, हे बुआ, कसनबल्लोने तुके ऐई अच्छा लागली।
27“मोचो बुआ मोके सब कुछ सोपलो से; आउर कोनी बेटा के नी जानोत, मात्र बुआ; आउर कोनी बुआ के नी जानोत, मात्र बेटा; आउर हुन जेचो उपरे बेटा हुनके उजागर करूक चाहाओ।
28“हे सपाय मसागत करतो बितामन आउर बोजा ले चेपाय होलो लोगमन, मोचो लगे ईआ; मय तुमके आराम देयेंदे। 29मोचो जुआंड़ी आपलो उपरे उठाआ; आउर मोचो ले सिका; कसनबल्लोने मय सोज आउर मन ने दिन आंय: आउर तुमी आपलो मन ने आराम पाहासे। 30कसनबल्लोने मोचो जुआंड़ी सरल आउर मोचो बोजा पोयंग आय।”
Currently Selected:
मत्ती 11: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
