यूहन्ना 21
21
तिबिरियास झील चो रेटे चेलामन लगे परकट होतोर
1ऐ गोठमन चो पाचे ईशु आपन खुद के तिबिरियास झील चो रेटे चेलामन उपरे उजागर करलो आउर ऐ रीति ले उजागर करलो। 2शिमोन पतरस, आउर थोमा जोन दिदुमुस बलाया जाऊ आय, आउर गलील चो काना नंगर चो नतनएल, आउर जबदी चो बेटा, आउर हुनचो चेलामन थानले दुई आउर झान रून्डून रवत। 3शिमोन पतरस हुनमन ले बल्लो, “मय मछरी धरूक जाये से।” हुनमन हुनचो ले बल्ला, “आमी बले तुचो संगे ऐऊ आंव।” आउर हुनमन निकरून भाती ड़ोंगा थाने चेगला, मान्तर हुन राती काई नी धरला। 4बिहान पावते ची ईशु रेटे ऐऊन उबा होलो; तेबले बले चेलामन नी चिताला कि ऐ ईशु आय। 5तेबे ईशु हुनमन ले बल्लो, “हे लेकामन, काय तुमचो लगे काई मछरीमन आसोत?” हुनमन जबाप दिला, “नाई।” 6हुन हुनमन ले बल्लो, “ड़ोंगा चो उजा घाई झारी पकाहा तेबे पाहा से।” आउर हुनमन झारी पकाला, आउर अदायं मछरीमन चो खुबे ले खुबे चो कारन हुनके झिकुक नी सकला। 7तेबे हुन चेला जेचो ले ईशु मया संगाते रये, पतरस ले बल्लो, “ऐ तो परबु आय!” शिमोन पतरस ऐ सुनुन भाती कि हुन परबु आय करांड ने तुआल पिन्दलो, कसनबल्लोने हुन बीन फटीई रये, आउर झील ने डगालो। 8मान्तर दुसर चेलामन डोंगा थाने मछरीमन ले भरलो बिती झारी के झिकते-झिकते ईला, कसनबल्लोने हुनमन खंडी ले जुगे दूर नाई, मान्तर कोनी दुय सव हाथ थाने रवत। 9जिदलदाय हुनमन रेटे भूईं थाने उतरला, तो हुनमन मोस चो आईग आउर हुन थाने मछरी संगालोर, आउर रोटी दकला। 10ईशु हुनमन ले बल्लो, “जोन मछरीमन तुमी ऐबे धरलासास, हुन थानले खिन्डिक आना।” 11तेबे शिमोन पतरस ड़ोंगा थाने चेगुन भाती एक सव तिरपन बड़े मछरीमन ले भरलोर झारी के खंडी थाने झिकला, आउर ईतलो मछरीमन रलो थानले बले झारी नी फाटली। 12ईशु हुनमन ले बल्लो, “ईआ, भोजन करा।” चेलामन थानले कोकीई हिम्मत नी होली कि हुनचो ले पचारोत, “तुय कोन आस?” कसनबल्लोने हुनमन जानते रवत कि ऐ परबु ची आय। 13ईशु ईलो आउर रोटी धरून भाती हुनमन के दिलो, आउर असने ची मछरी बले। 14ऐ तीसर हार आय कि ईशु मरलो बितामन थानले जीव उठलोर पाचे चेलामन के दका दिलो।
ईशु चो पतरस ले गोठ बात
15भोजन करलो पाचे ईशु शिमोन पतरस ले बल्लो, “ऐ शिमोन, यूहन्ना चो बेटा, काय तुय ऐ मन ले बडुन भाती मोचो ले मया संगाऊ आस?” हुन हुनचो ले बल्लो, “हव, परबु; तुय तो जानीस कि मय तुचो ले मया संगाऊ आंय।” हुन हुनचो ले बल्लो, “मोचो मेमनामन के चराव।” 16हुन फेर दुसरहार हुनचो ले बल्लो, “हे शिमोन, यूहन्ना चो बेटा, काय तुय मोचो ले मया संगाऊ आस?” हुन हुनचो ले बल्लो, “हव, परबु; तुय तो जानीस कि मय तुचो ले मया संगाऊ आंय।” हुन हुनचो ले बल्लो, “मोचो मेंडामन चो राका कर।” 17हुन तीसर हार हुनचो ले बल्लो, “हे शिमोन, यूहन्ना चो बेटा, काय तुय मोचो ले मया संगाऊ आस?” पतरस मुरमुरा होलो कि हुन हुनके तीसर हार असने ची बल्लो, “काय तुय मोचो ले मया संगाऊ आस?” आउर हुनचो ले बल्लो, “हे परबु, तुय तो सपाय काई जान सीस; तुय ऐ जानीस कि मय तुचो ले मया संगाऊ आंय।” ईशु हुनचो ले बल्लो, “मोचो मेंडामन के चराव। 18मय तुचो ले सत-सत बलें सें, जिदलदाय तुय जुआन रलीस तेबे आपलो करांड बान्दुन भाती जोन थाने चाहते रलीस हुता फिरते रलीस; मान्तर जिदलदाय तुय डोकरा हो से तेबे आपलो हाथ फयला से, आउर दुसर तुचो करांड बान्दुन भाती जोन थाने तुय नी मन कर सीस हुता तुके नेदे।” 19हुन ऐ गोठमन ले ईसारा दिलो कि पतरस कसन मरना ले माहापुरू चो महिमा करे दे। आउर तेबे हुन हुनचो ले बल्लो, “मोचो पाटे हो।”
ईशु आउर हुनचो लाड़रा चेला
20पतरस पलटून भाती हुन चेला के पाट-पाट ऐतोर दकलो, जेचो ले ईशु मया संगाते रलो, आउर जेचो ले खातो समया हुनचो छाती चो बाटे लोऊन भाती पचारलो, “हे परबु, तुचो धरातो बिता कोन आय?” 21हुनके दकुन भाती पतरस ईशु ले बल्लो, “हे परबु, ऐचो काय हाल होये दे?” 22ईशु हुनचो ले बल्लो, “अगर मय चाहायें कि हुन मोचो ऐ ओत ले ठेबुन रओ, तो तुके ऐचो ले काय? तुय मोचो पाटे हो।” 23ऐईकाजे भाईमन ने ऐ गोठ फयलुन गेली कि हुन चेला नी मरे दे; तेबले बले ईशु हुनके ऐ नी बल्लो कि हुन नी मरे दे, मान्तर ऐ कि “अगर मय चाहायें कि हुन मोचो ऐ ओत ले ठेबुन रओ, तो तुके ऐचो ले काय?”
सरासरी
24ऐ हुनी चेला आय जोन ऐ गोठमन चो गोहई देऊ आय आउर जोन ऐ गोठमन के लिकलो से, आउर आमी जानु से कि हुनचो गोहई सते आय। 25आउर बले खुबे असन काम आसे, जोन ईशु करलो; अगर हुनमन गोटक-गोटक करून लिका जाति, तो मय समजे से कि किताबमन जोन लिका जाति हुनमन संवसार ने बले नी समाती।
Currently Selected:
यूहन्ना 21: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
