यूहन्ना 18
18
बनवाड़ी ने ईशु चो धराय जातोर
1ईशु ऐ गोठमन बोलुन भाती आपलो चेलामन संगे किद्रोन नाला चो हुनपाट गेलो। हुता गोटक बारी रये, जोन थाने हुन आउर हुनचो चेलामन गेला। 2हुनचो धरातो बिता यहूदा बले हुन जगा के जानते रये, कसनबल्लोने ईशु आपलो चेलामन संगे हुन थाने जाते रलो। 3तेबे यहूदा, पलटनमन चो गोटक दल के आउर परधान याजकमन आउर फरीसीमन चो बाटले जगवारमन के धरून भाती, दियामन आउर मशालमन आउर हत्यारमन के धरून भाती हुता ईला। 4तेबे ईशु हुन सपाय गोठमन के जोन हुनचो उपरे ऐतो बिती रये जानुन भाती, निकरलो आउर हुनमन ले बल्लो, “काके डगरायसास?” 5हुनमन हुनके जबाप दिला, “ईशु नासरी के।” ईशु हुनमन ले बल्लो, “मय आंय।” हुनचो धरातो बिता यहूदा बले हुनमन चो संगे उबु रये। 6हुनचो ऐ बोलते ची, “मय आंय,” हुनमन पाटे गुचुन भाती भुईं थाने घसरुन पड़ला। 7तेबे हुन फेर हुनमन ले पचारलो, “तुमी काके डगरायसास।” हुनमन बल्ला, “ईशु नासरी के।” 8ईशु जबाप दिलो, “मय तो तुमचो ले सांगुन चुकले से कि मय आंय, अगर मोके डगरायसास तेबे ऐ मन के जाऊक दिआस।” 9ऐ ऐईकाजे होली कि हुन बचन पुरा होओ जोन हुन बोलुन रये: “जोनमन के तुय मोके दिलीस हुनमन थानले मय गोटक के बले नी हजाले।” 10तेबे शिमोन पतरस खंडा, जोन हुनचो लगे रली, झिकलो आउर माहायाजक चो दास उपरे चलाऊन भाती हुनचो उजा कान काट लो। हुन दास चो नाव मलखुस रये। 11तेबे ईशु पतरस ले बल्लो, “आपलो खंडा मयान ने संगाव। जोन बटका बुआ मोके दिलो से, काय मय हुनके नी पियें?”
हन्ना चो पुरे ईशु
12तेबे पलटनमन आउर हुनचो सुबेदार आउर यहूदीमन चो जगवारमन ईशु के धरून भाती बान्दला, 13आउर पयले हुनके हन्ना चो लगे नीला, कसनबल्लोने हुन-हुन बरक चो माहायाजक कैफा चो सतरा रये। 14ऐ हुनी कैफा रये, जोन यहूदीमन के सला देऊ रलो कि आमचो लोगमन चो काजे गोटक मनुक चो मरतोर अच्छा आय।
पतरस चो ईशु के चितातोर ले इन्कार
15शिमोन पतरस आउर गोटक दुसर चेला बले ईशु चो पाटे होला। ऐ चेला माहायाजक चो जान-पयचान बिता रलो, ऐईकाजे हुन ईशु चो संगे माहायाजक चो दुआर ने गेलो, 16मान्तर पतरस बाहरे दुआरे उबा रलो। तेबे हुन दुसर चेला जोन माहायाजक चो जान-पयचान रये, बाहरे निकरलो आउर बाट राका करू ले बोलुन भाती पतरस के भीतरे धरून आनलो। 17हुन दासी जोन बाट राका करू रये, पतरस ले बल्ली, “काहांय तुय बले ऐ माने चो चेलामन ले तो नुआस?” हुन बल्लो, “मय नुआय।” 18दास आउर जगवारमन सीत चो लागुन मोस के धधकाऊन भाती उबा आईग छेकते रओत, आउर पतरस बले हुनमन चो संगे उबा होऊन आईग छेकते रये।
माहायाजक चो पुरे ईशु
19तेबे माहायाजक ईशु ले हुनमन चो चेलामन चो बारे ने आउर हुनचो उपदेश चो बारे ने पुच-पचार करलो। 20ईशु हुनके जबाप दिलो, “मय संवसार ले खुलुन भाती गोठयाले; मय आराधना घरमन ने आउर मंदिर ने, जाहां सपाय यहूदी रूंड़ा होऊ आत, हरमेशा उपदेश करले आउर गुपत ने काई बले नी बल्ले। 21तुय मोचो ले केंव पचार सीस? सुनतो बितामन ले पुच कि मय हुनमन के काय बल्ले। दक, हुनमन जानोत जोन कि मय काय-काय बल्ले से।” 22जिदलदाय हुनमन ले ऐ बल्लो, तेबे जगवारमन ले गोटक जोन लगे उबा रये, ईशु के थापड़ मारून बल्लो, “काय तुय माहायाजक के ऐ परकार जबाप देऊ आस?” 23ईशु हुनके जबाप दिलो, “अगर मय खराप बल्ले, तेबे हुन खराप चो गोहई देस; मान्तर अगर अच्छा बल्ले, तो मोके केंव मारे सीस?” 24हन्ना हुनके बान्दलोर कैफा माहायाजक चो लगे पटाऊन दिलो।
पतरस चो ईशु के चितातोर ले दुसरहार इन्कार
25शिमोन पतरस उबा होऊन आईग छेकते रलो। तेबे हुनमन हुनचो ले बल्ला, “काहांय तुय बले हुनचो चेलामन थानले तो नुआस?” हुन इन्कार करून बल्लो, “मय नुआय।” 26माहायाजक चो दासमन ले गोटक, जोन हुनचो कुटुम ले रलो जेचो कान पतरस काटून रलो, बल्लो, “काय मय तुके हुनचो संगे बारी ने नी दकले?” 27पतरस फेर इन्कार करलो, आउर तुरते कुकड़ा बासली।
ईशु के पिलातुस चो पुरे धरून आनतोर
28तेबे हुनमन ईशु के कैफा चो लगे ले किला बाटे नीला, आउर बड़े बिहान चो समया रये, मान्तर हुनमन खुद किला चो भीतरे नी गेला बल्ले अशुद्ध नी होओत मान्तर फसह खाऊक सकोत। 29तेबे पिलातुस हुनचो लगे बाहरे निकरून ईलो आउर बल्लो, “तुमी ऐ मनुक उपरे काय गोठ चो दोष लगायसास?” 30हुनमन हुनके जबाप दिला, “अगर हुन गलत करू नी होतो तेबे हुनके तुचो हाथे नी सोपतु।” 31पिलातुस हुनमन ले बल्लो, “तुमी ची ऐके नेऊन भाती आपलो नियम चो अनुसार हुनचो नियाय करा।” यहूदीमन हुनचो ले बल्ला, “आमके अधिकार निआय कि काचीई जीव धरू।” 32ऐ ऐईकाजे होली कि ईशु चो हुन गोठ पुरा होओ जोन हुन ऐ ईसारा देते-देते बोलु रये कि हुनचो मरना कसन होये दे। 33तेबे पिलातुस फेर किला चो भितरे गेलो, आउर ईशु के हाग देऊन भाती हुनचो ले पचारलो, “काय तुय यहूदीमन चो राजा आस?” 34ईशु जबाप दिलो, “काय तुय ऐ गोठ आपलो बाटले बोल सीस नाहले दुसरमन मोचो बारे ने तुचो ले ऐ बल्ला से?” 35पिलातुस जबाप दिलो, “काय मय यहूदी आंय? तुचो ची जाति आउर परधान याजकमन तुके मोचो हाथे सोपला सोत। तुय काय करली सीस?” 36ईशु जबाप दिलो, “मोचो राज ऐ संवसार चो नुआय; अगर मोचो राज ऐ संवसार चो होती, तो मोचो सेवक लड़ता कि मय यहूदीमन चो हाथे सोपा नी जाते: मान्तर मोचो राज ऐथा चो नुआय।” 37पिलातुस हुनचो ले बल्लो, “तो काय तुय राजा आस?” ईशु जबाप दिलो, “तुय बोल सीस कि मय राजा आंय। मय ऐईकाजे जनम धरले आउर ऐईकाजे जगत ने ईले से कि सत चो गोहई देयें दें। जोन कोनी सत चो आत, हुन मोचो शब्द सुनु आय।” 38पिलातुस हुनचो ले बल्लो, “सत काय आय?” ऐ बोलुन भाती हुन फेर यहूदीमन चो लगे निकरून गेलो आउर हुनमन ले बल्लो, “मय तो हुनचो ने काई दोष नी पायें।”
ईशु नाहले बरअब्बा
39“मान्तर तुमचो ऐ रीति आय कि मय फसह ने तुमचो काजे गोटक माने के छांडुन देयें दें। आउर काय तुमी मन करसास कि मय तुमचो काजे यहूदीमन चो राजा के छांडुन देयें दें?” 40तेबे हुनमन फेर चिचयाऊन भाती बल्ला, “ऐके नाई मान्तर आमचो काजे बरअब्बा के छांडुन देस।” आउर बरअब्बा डाकु रलो।
Currently Selected:
यूहन्ना 18: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
