पठालोबितामन 20
20
मकिदुनिया, यूनान आउर त्रोआस ने पौलुस
1जिदलदाय कोलार थेबली तेबे पौलुस चेलामन के हाग देऊन भाती समजालो, आउर हुनमन ले बिदा होऊन भाती मकिदुनिया चो बाटे जाते गेलो।
2हुन सपाय परदेश थानले होऊन भाती आउर चेलामन के खुबे हुच हुचाऊन हुन यूनान ने ईलो।
3जिदलदाय तीन मयना रऊन भाती हुन हुता ले जाहाज थाने सीरिया चो बाटे जातो थाने रलो, तेबे यहूदी हुनचो घत ने भीड़ला, ऐईकाजे हुन ऐ तय करलो कि मकिदुनिया होऊन भाती बोहडून जाओ।
4बिरीया चो पुरूर्स चो बेटा सोपत्रुस आउर थिस्लुनिकीमन थानले अरिस्तर्खुस आउर सिकुन्दुस, आउर दिरबे चो गयुस, आउर तीमुथियुस, आउर आसिया चो तुखिकुस आउर त्रुफिमुस आसिया लगले हुनचो संगे होला।
5हुनमन पुरे जाऊन भाती त्रोआस ने आमचो बाट टाकते रवत।
6आउर आमी अखमीरी रोटी चो दिनमन चो पाचे फिलिप्पी ले जाहाज थाने चेगुन भाती पांच दिन ने त्रोआस ने हुनचो लगे पोंचलु, आउर सात दिन ले हुताय रलु।
यूतुखुस के जीवदान देतोर
7सपता चो पयला दिने जिदलदाय आमी रोटी टुटातोर काजे रूंड़ा होलु, तेबे पौलुस जोन दुसर दिने जाते जातो बिता रलो, हुनमन चो ले गोठयालो; आउर अधघर राती ले गोठयाते रलो।
8जोन अटारी ने आमी रूंड़ा रलु, हुन थाने खुबे दीया बरते रये।
9आउर यूतुखुस नाव चो गोटक जुआन खिड़की थाने बोसुन भाती घोर झुमा ले लोअते रलो। जिदलदाय पौलुस बेर ले गोठयाते रलो तेबे हुन झुमा चो भर ने तीसर अटारी थानले घसरुन पढ़लो, आउर मरी होलोर उठाया गेलो।
10मान्तर पौलुस उतरून भाती हुनके पटारी होलो, आउर पोटारून भाती बल्लो, “घबराहा नाई; कसनबल्लोने हुनचो जीव हुनचेई थाने आसे।”
11आउर उपरे जाऊन भाती रोटी टुटालो आउर खाऊन भाती ईतलो बेर ले हुनमन चो संगे गोठयाते रलो कि बिहान पावली। फेर हुन जाते गेलो।
12आउर हुनमन हुन जुआन के जीवता धरून आनला आउर खुबे शान्ति पावला।
त्रोआस ले मीलेतुस चो यातरा
13आमी पयले ची जाहाज थाने चेगुन भाती अस्सुस बाटे ऐ बिचार ले पुरे गेलु कि हुता ले आमी पौलुस के चेगाऊं, कसनबल्लोने हुन ऐ ऐईकाजे ठेबाऊ रलो कि खुद ची हिन्ड़ते जातो बिता रलो।
14जिदलदाय हुन अस्सुस ने आमके मिललो तेबे आमी हुनके चेगाऊन भाती मितुलेने ने ईलु।
15हुता ले जाहाज ढ़िलुन भाती आमी दुसर दिने खियुस चो पुरे पोंचलु, आउर पाचे चो दिने सामुस ने जाऊन अमरलु; फेर दुसर दिने मीलेतुस ने ईलु।
16कसनबल्लोने पौलुस इफिसुस चो लगे ले होऊन भाती जातोर तय करू रलो कि काहांय असन नी होओ कि हुनके आसिया ने बेर होओ; कसनबल्लोने हुन चांड ने रलो कि अगर होऊक सको तो हुन पिन्तेकुस्त चो दिने यरूशलेम ने रओ।
इफिसुस चो सियानमन के उपदेश
17हुन मीलेतुस ले इफिसुस ने खबर पठालो, आउर कलीसिया चो सियानमन के हाग दिआलो।
18जिदलदाय हुनमन हुनचो लगे ईला, तेबे हुनमन के बल्लो, तुमी जानास कि पयले ची दिन ले जिदलदाय मय आसिया ने पोंचले, मय हर समया तुमचो संगे कोन परकार रले।
19बल्लोने बड़े दिनता ले, आउर आँसु बहाऊन-बहाऊन भाती, आउर हुन परीक्षामन ने जोन यहूदीमन चो खराप उआट चो लागुन मोचो उपरे ऐऊन पड़ली, मय परबु चो सेवा करते ची रले
20आउर जोन-जोन गोठमन तुमचो फायदा चो रली, हुनमन के सांगतोर आउर लोगमन चो पुरे आउर घर-घर सिकातोर ने केबे नी झिझक ले
21मान्तर यहूदीमन आउर यूनानीमन चो पुरे गोहई देते रले कि माहापुरू चो बाटे मन फिराहा आउर आमचो परबु ईशु मसीह उपरे बिश्वास करतोर आसे।
22अदायं दका, मय आत्मा ने बन्दी होऊन यरूशलेम बाटे जाये से, आउर नी जाने कि हुता मोचो उपरे काय-काय घटे दे;
23मात्र ऐ कि पवितर आत्मा हर नंगर ने गोहई देऊन-देऊन भाती मोचो ले बोलु आय कि बान्दन आउर कलेश तुचो काजे तिआर आसे।
24मान्तर मय आपलो जीव के काई नी समजे कि हुनके लाड़ जाने, मान्तर ऐ कि मय आपलो परानी के आउर हुन सेवा के पुरा करें दें, जोन मय माहापुरू चो अनुग्रह चो नगतखबर थाने गोहई देतो काजे परबु ईशु ले पावले से।
25अदायं दका, मय जाने कि तुमी सपाय जोनमन ने मय माहापुरू चो राज चो परचार करते फिर ले, मोचो थोमना फेर नी दकास।
26ऐईकाजे मय आजी चो दिने तुमचो ले गोहई देऊन भाती बलें सें, कि मय सपाय चो लऊ ले निर्दोष आंय।
27कसनबल्लोने मय माहापुरू चो सपाय कोशिश के तुमके पुरा ढंग ले सांगतोर ने नी झिझक लें।
28ऐईकाजे आपलो आउर पुईतराय गोहड़ी चो राका करा जोन थाने पवितर आत्मा तुमके अध्यक्ष ठेबालो से, कि तुमी माहापुरू चो कलीसिया चो राका करा, जोन के हुन आपलो लऊ ले घेनलो से।
29मय जाने कि मोचो गेलो पाचे चिरतो बिती बिगवामन तुमचो ने ऐ दे जोन गोहड़ी के नी छांड दे।
30तुमचो ची मंजी ले बले असन-असन माने उठ दे, जोन चेलामन के आपलो पाटकुती झिकुन धरतो काजे टेड़ा मेड़ा गोठमन बलदे।
31ऐईकाजे चेता राहा, आउर सुरता करा कि मय तीन बरक ले रात दिन आँसु बहाऊन-बहाऊन हरकोनी के जनातोर नी छांडले।
32आउर अदायं मय तुमके माहापुरू के, आउर हुनचो अनुग्रह चो बचन के सोपुन देयें से; जोन तुमचो उन्नती करूक सके आउर सपाय पवितर करा गेलो लोगमन ने सामिल करून मीरास देऊक सके।
33मय कोचीई चाँदी, सोना नाहले फटीई चो लालच नी करले।
34तुमी खुद ची जानास कि ऐई हाथमन मोचो आउर मोचो संगवारीमन चो जरूरतमन पुरा करली।
35मय तुमके सपाय काई करून दकाले कि ऐई ढंग ले मसागत करते-करते कमजोरमन के समालतोर आउर परबु ईशु चो बचन सुरता संगातोर जरूरी आय, जोन हुन खुद ची बल्लो से: धरतोर ले देतोर धन्य आय।
36ऐ बोलुन भाती हुन मांडी पाड़लो आउर हुन सपाय चो संगे पारथना करलो।
37तेबे हुनमन सपाय खुबे गागला आउर पौलुस के पटारी होऊन भाती हुनके चुमुक मुरयाला।
38हुनमन खास करून ऐ गोठ ले दुखी रवत जोन हुन बोलु रलो कि तुमी मोचो थोमना फेर नी दकास। तेबे हुनमन हुनके जाहाज लगले अमराला।
Currently Selected:
पठालोबितामन 20: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
