पठालोबितामन 14
14
पौलुस आउर बरनबास चो इकुनियुम ने बिरोद
1इकुनियुम ने असन होली कि हुनमन यहूदीमन चो आराधना घर ने संगे-संगे गेला, आउर ऐ परकार गोठमन करला कि यहूदीमन आउर यूनानीमन दुनो थानले खुबेमन बिश्वास करला।
2मान्तर बिश्वास नी करतो बितामन यहूदीमन दुसर जातिमन चो मन भाईमन चो बिरूद ने हुच हुचाला, आउर मनमुटाव पयदा करून दिला।
3हुनमन खुबे दिन ले हुता रला, आउर परबु चो भरसा थाने हिम्मत ले गोठमन करते रवत; आउर हुन हुनमन चो हाथ ले चिना आउर भयंकर काम कराऊन भाती आपलो अनुग्रह चो बचन थाने गोहई देते रलो।
4मान्तर नंगर चो लोगमन ने फुट पडुन जाऊ रली, ऐचो ले कितलो तो यहूदीमन चो बाटे आउर कितलो पठालोबितामन चो बाटे होऊन गेला।
5मान्तर जिदलदाय दुसर जाति आउर यहूदी हुनमन चो बेईजित आउर हुनमन उपरे पखना मारतो काजे आपलो सरदार संगे हुनमन उपरे गेला,
6तेबे हुनमन ऐ गोठमन के जानुन गेला, आउर लुकाउनीया चो लुस्त्रा आउर दिरबे नंगरमन ने, आउर लगे-लगे चो परदेशमन ने पराला
7आउर हुता नगतखबर सुनाऊक मुरयाला।
लुस्त्रा ने गोटक खोड़ीया चो चेंगा होतोर
8लुस्त्रा ने गोटक माने बसु रलो, हुन जनम ले ची खोड़ीया रलो आउर केबे नी हिन्डुन रलो।
9हुन पौलुस के गोठयाते सुनते रलो। पौलुस हुनचो बाटे नंजरगड़ान दकलो कि हुनके चेंगा होऊन जातोर बिश्वास आसे,
10आउर जोर ले बल्लो, “आपलो पाँय चो बल सीदा उबा हो।” तेबे हुन उदलुन भाती हिन्डुक बुलुक मुरयालो।
11लोगमन पौलुस चो ऐ काम दकुन भाती लुकाउनीया चो भाषा ने जोर ले बल्ला, “देव माने चो रूप ने होऊन भाती आमचो लगे उतरून ईलो से।”
12हुनमन बरनबास के ज्यूस, आउर पौलुस के हिर्मेस बल्ला कसनबल्लोने हुन गोठमन करतो ने मुखिया रलो।
13ज्यूस चो हुन मंदिर चो पुजारी जोन हुनमन चो नंगर चो पुरे रली, बयला आउर फुलमन चो माला कपाटमन थाने लगाऊन भाती लोगमन चो संगे पुजुक चाह ते रलो।
14मान्तर बरनबास आउर पौलुस पठालोबितामन जिदलदाय ऐ सुनला, तेबे आपलो फटीई चिरला आउर भीड़ ने डगाला, आउर चिचयाऊन भाती बोलुक मुरयाला,
15हे लोगमन, तुमी काय करसास? आमी बले तो तुमचो असन दुक सुक भोगी माने आंव, आउर तुमके नगतखबर सुनाऊ से कि तुमी ऐ फकाहा तीज ले अलग होऊन भाती जीवता माहापुरू चो बाटे फिरा, जोन सरग आउर धरतनी आउर समुन्द आउर जोन काई हुन थाने आसे बनालो।
16हुन बितलो समयामन ने सपाय जातिमन के आपलो-आपलो बाट ने हिन्डुक दिलो।
17तेबले बले हुन आपन खुद के बिनगवा नी छांडलो; मान्तर हुन भलाई करते रलो, आउर बादरी ले बरसा आउर फरतो मोसम देऊन भाती तुमचो मन के भोजन आउर हरिक ले भरते रलो।
18ऐ बोलुन भाती बले हुनमन लोगमन के बड़े तकलीस ले थेबाला कि हुनमन काजे पुजा नी करोत।
19मान्तर कितलो यहूदीमन अन्ताकिया आउर इकुनियुम ले ऐऊन भाती लोगमन के आपलो बाटे करला, आउर पौलुस उपरे पखना मारला, आउर मरलो समजुन भाती हुनके नंगर चो बाहरे ओड़गड़ते निला।
20मान्तर जिदलदाय चेलामन हुनमन चो भोंवरक ऐऊन उबा होला, तेबे हुन उठून भाती नंगर ने गेलो आउर दुसर दिने बरनबास चो संगे दिरबे ने जाते गेलो।
सीरिया ले अन्ताकिया ने बाहाड़तोर
21हुनमन हुन नंगर चो लोगमन के नगतखबर सुनाऊन भाती, आउर खुबे असन चेला बनाऊन भाती, लुस्त्रा आउर इकुनियुम आउर अन्ताकिया ने बाहडून ईला,
22आउर चेलामन चो मन के थीर करते रला आउर ऐ उपदेश देते रला कि बिश्वास ने बनु राहा; आउर ऐ बोलते रवत, “आमके बड़े कलेश उठाऊन भाती माहापुरू चो राज ने ओलतोर होये दे।”
23आउर हुनमन हरकोनी कलीसिया ने हुनमन चो काजे सियान थेबाला, आउर उपास संगे पारथना करून हुनमन के परबु चो हाथे सोपला जेचो उपरे हुनमन बिश्वास करू रला।
24तेबे पिसिदिया ले होते-होते हुनमन पंफूलिया पोंचला;
25फेर पिरगा ने बचन सुनाऊन भाती अत्तलिया ने ईला।
26आउर हुता ले हुनमन जाहाज थाने अन्ताकिया गेला, जोन थाने हुनमन हुन काम चो काजे जोन हुनमन पुरा करू रला माहापुरू चो अनुग्रह ने सोपा जाऊ रवत।
27हुता पोंचुन भाती हुनमन कलीसिया रूंडा करलो आउर सांगला कि माहापुरू हुनमन चो संगे होऊन भाती कसन बड़े-बड़े काम करलो, आउर दुसर जातिमन चो काजे बिश्वास चो कपाट उगाढुन दिलो।
28आउर हुनमन चेलामन चो संगे खुबे दिन ले रला।
Currently Selected:
पठालोबितामन 14: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
