मत्ती 15

रिती रीवाज काजे माननेन सवाल

(मरकुस 7:1-23)

1तेत्यार यरुशलेममा काहनास फरुशी एने शास्त्री येसुनचा आवीन कोयने बाज गोया, 2“तारा चेला जूनला वाराण रिती काहा टावतेला छे, कि बिना हात धुवनेन खातला छे?” 3येसु तीनु काजे कोयू, “तुमु बी तुमरा रिती रीवाजोन वजेसी काहा परमेश्वरोन आग्या काजे टावतेला?” 4काहाकि परमेश्वर कोयलु छे, “तुमरा बाबाण एने तुमरा आयान मान कोरजू,” एने जो कुदू बास नीती आया काजे भुंडो कोये, तिनाक मारनेमा आवे. 5बाकीन तुमुक कोये कि कोबी कुदू आपना बास नीती आया काजे कोये, “जू काहीन तुसेक तारे जुव गोथो लाभ पुग सोकतू होतु, चू परमेश्वर काजे भेट चोळाय जाय” 6ती चू आपना बासोन मान नी कोरे, इना रितीसी तुमु आपनी रितीन वोजेसी परमेश्वरोन वचन टाव देदू 7हे कोपट्या यशयाह तुमरे बारामा जी भविष्यवाणी ठीकुत कोरलु छे.

8जे माणसे हुटोसी ते मारू मान कोरतेला छे,

बाकीन तिंदरो मोन मारेसी नांबे रोयतलो छे.

9एने चे वायबार मारी आराधना कोरतेला छे,

काहाकि माणसोन विधी काजे धर्मान वाते कोरीन सिकाळतला छे.

भुंडली कोरणे वावी वाते

10तेत्यार येसु माणसो काजे तेरेनचा बुलावीन तीनु काजे कोयू, “सोमवू, एने सोमजू 11जो मुयोमा जातलो छे, चो माणसो काजे वीटाव नी कोरतेला, बाकीन जो मुयोमा गोथो निकोवतलो छे, चो माणसो काजे विटाव कोरतेला छे.” 12तेत्यार चेला आवीन तीना काजे कोया, “काय तू जानतलु छे कि फरुशी यो वचन सोमवीन ठूकर खादा?” 13चू जोवाब आप्यू, “बाकीन झाड जो मारा सोरगो मायलु बास नी लागाळयु, उखाडणेमा आवसे.” 14तीनुक जाणे देवू; चे आंदवा वाट देखाळने वावू छे एने आंदवू आंदवा काजे वाट देखाळसे ती दुयू खाडामा पोड जासे.

15यो सोमजीन पतरस येसु काजे कोयू, “यु दाखलू आमुक सोमजाड दे.” 16येसु तीनुक जवाब आप्यू, “काय तुमु बी हिमी तोक नासोमोज छे?” 17काय तुमु नी जानतला कि यो काहीन मुयोमा जातलो चो पेटोमा पोळतेलो छे, एने हागनेमा निकवी जातलो छे? 18बाकीन जो काहीन मुयोमा गोथो निकवतलो छे चो मोनोमा गोथो निकोवतलो छे, एने चोत माणसो काजे विटाव कोरतेला छे. 19काहाकि भुंडला विचार, खुन, सिनावो, भुंडला विचार, चुरी, झुटी गोवायी एने बुराई, मोनोसी निकवतली छे. 20जीत छे जी माणसो काजे विटाव कोरतेली छे, बाकीन हात बिना धुवीन खाणे माणसो काजे विटोव नी कोरतेला.

कनानी जातोन बायरोन भुरसू

(मरकुस 7:24-30)

21येसु चा गोथू निकवी गोयू, सोर एने सिदोनोन प्रदेश भूनी जात रोयू. 22देखू तिना प्रदेशमा गोथी एक कोनानी बायर निकवी, एने आयळीन कोयने लागी, “हे प्रभू! राजा दाऊदन पुऱ्या, मार पोर दया कोर! मारी पुराय काजे भुंडली आत्मा जादा तोकलीत दि रोयो.” 23बाकीन चू तिनीक काहीन जोवाब नी आप्यू तेत्यार तेरा चेला आवीन तीना काजे विनता कोऱ्या कि, “इनाक मुकल दे, काहाकि ची आमरे पोछोव आयळती जायीन आवने बाज रोयी.” 24चू जोवाब आप्यू, “इस्राईलोन घोरानान खुवायला गाडराक छुळीन परमेश्वर मेसेक कुदानचा नी मूकल्यु.” 25बाकीन कनानी बायोर आवी, एने येसु काजे नोमोन कोरीन कोयने बाज गोयी, “हे प्रभू मारी मदत कोर.” 26चू जोवाब आप्यू, “पुऱ्यान खाणो लीन कुत्राण ओगोव नाखनो वारू नी होय.” 27चू कोयू, “खोरलो छे प्रभू, बाकीन कुत्रा बी चुरा चूर खातला छे, जू हिंदरा स्वामीन मेजसी पोळतेलो छे.” 28इनापोर येसु तीनाक जोवाब आप्यू, “हे बायर, तारू भुरसू मोटलु छे जोसू तुसेक जुवे, तारेन कोरता होसोत होये, एने तेरी पुराय तीनेत घोळी वारू होय गोयी.”

घोणा सोवटा बिमारी वावा काजे वारू कोरनो

29येसु चा गोथू गलीलोन दोरीयान साते आव्यु, एने बोयडा पोर चोळीन बोस गोयू. 30ती गोरदी पोर गोरदी हेरे साते आवी चे आपने पुठी लेंगळा आंदवा, गुंगा, डूंन्डा एने घोणा सोवटा जोना काजे तेरेनचा लाव्या, एने तीनुक तेरा पायो पोर मेक देदा, एने चू तीनुक वारू कोऱ्यु. 31तेत्यार माणसे देख्या कि गुंगा बुलतला एने डुंडा वारू होयतला, एने लेंगळा चालतला, एने आंदवा देखतला छे, ती वाहरायीन इस्राईलोन परमेश्वरोन महिमा कोऱ्या.

चार हजार माणसोक खावाळनो

(मरकुस 8:1-10)

32येसु तेरा चेला काजे बुलावीन कोयू, “मेसेक इनी गोरदी पोर गिन आव रोयू, काहाकि चे तीन दाहळा गोथा मारे साते छे एने तिंदरे जुवू काहीन खाणे नी होय मे इनुक भूकला मुकलने नी हिंडतू कोबी ओसो नि होये कि वाटी पोर थाकीन रोय जाय.” 33चेला येसु काजे कोया, “आमुक इना बोयळामा का गोथा ओतरा रुटा जोड्से कि आमु ओतरी मोटी गोरदी काजे आफरावजे?” 34येसु तीनु काजे पुछु, “तुमरे जुव कोतरा रुटा छे?” चेला कोया, “सात, एने थुलाक नानला माछा.” 35तेत्यार येसु माणसो काजे धोरती पोर बोसनेन आग्या आप्यू. 36एने तीनुक सात रुटा एने माछा काजे लेदू, धन्यवाद कोरीन तुड्यु, एने आपना चेला काजे आपतू गोयू, एने चेला माणसो काजे. 37इना रितीसी आखा माणसे खायलीन आफरी गोया एने चेला रुटान टुकळा भोरला सात टूपला चूट्या, 38खाणे वावा बायरा एने पुऱ्या काजे छुळीन चार होजार माणसे होता. 39तेत्यार चे भिळ काजे मुकलीन ढोंड्या पोर चोळ गोयू, एने मगदान देसोन होद्दीमा आव्यु.

Currently Selected:

मत्ती 15: BFBNT

Highlight

Copy