ମାଥିଉ 14
14
ଡୁବନ୍ହିନି ଯୋହନ୍ ବିଷୟନି କାତା
(ମାର୍କ. ୬:୧୪-୨୯; ଲୁକ. ୯:୭-୯)
1ହେପାଦ୍ନା ହେରୋଦ ରାଜା ଯୀଶୁ ଇନା-ଇନା କାମାୟ୍ କିତାକା ୱେଚାନ୍। ଆରେ ହେରୋଦ ରାଜା ତା ହଲିଆରିଙ୍ଗ୍ ୱେଚ୍ଚାନ୍, 2“ଡୁବନ୍ହିନି ଯୋହନ ହାଃଜି ଆରେରଗ ଜିତାନ୍ନା, ହେଦାଙ୍ଗ୍ କାଜିଙ୍ଗ୍ ତା ସାକ୍ତି ଯୀଶୁତାକେ ମାନାତ୍ ଲାଗିଙ୍ଗ୍ ହିନା ଇୱାନ୍ ଚାନିଆଆନି କାମାୟ୍ କିନାନା।”
ଡୁବନ୍ହିନି ଯୋହନତିଙ୍ଗ୍ ଇନେସ୍କିଜି ଅସ୍ତାର୍
3ହେରୋଦ ରାଜା ତା ଟଣ୍ଡାହି ପିଲିପ ଡକ୍ରୁହିଙ୍ଗ୍ ରାଣି ହେରଦିୟାଙ୍ଗ୍ ବିବାଆଜି ମାଚାନ୍। ହେଦାଙ୍ଗ୍ କାଜିଙ୍ଗ୍ ଯୋହନ ହେରୋଦ ରାଜାଙ୍ଗ୍ ଇଞ୍ଜି ମାଚାନ୍, ନି ଟଣ୍ଡାଦି ଡକ୍ରିଙ୍ଗ୍ ବିବାଆନି ବିଦି ହିଲେତ୍। 4ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା ଯୋହନତିଙ୍ଗ୍ ଆସ୍ତି ଜଇଲ୍ ଇଞ୍ଜ ଇଡ଼୍ଜି ମାଚାନ୍। 5ହେଦାଙ୍ଗ୍ କାଜିଙ୍ଗ୍ ରାଣି ହେରଦିୟା ଯୋହନତିଙ୍ଗ୍ ରିସା ଇଡ଼୍ଜି ଅସ୍ତେଙ୍ଗ୍ ଉପାଇକିଜି ମାଚାତ୍, ଆରେ ହେରୋଦ ରାଜା ପା ରାଣି ହେରଦିୟା କାତା ଆସ୍ତି ଯୋହନତିଙ୍ଗ୍ ଅସ୍ତେଙ୍ଗ୍ ମାନ୍ କିଜି ମାଚାନ୍। ମାତର୍ ଯିହୁଦିର୍ ମାନାୟାରିଙ୍ଗ୍ ପାଣ୍ଡ୍ରାଆଜି ଅସ୍ତେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ଇନେସ୍କି ଯିହୁଦି ମାନାୟାର୍ ଯୋହନତିଙ୍ଗ୍ ଭବିଷ୍ଯତବକ୍ତା ଇଞ୍ଜି ପାର୍ତି କିଜି ମାଚାର୍।
6ଏଚେପାଦ୍ନା ହେରୋଦ ରାଜା ଜନମ୍ଦିନ୍ ୱାତିଲେ, ହେୱାନ୍ ର ବଜି କିଜି ମାଚାନ୍। ହେ ବଜିତାକେ ରାଣି ହେରଦିୟା ଗାଡ଼୍ହି ବିତ୍ରେ ୱାଜି ଏନ୍ତାତ୍। ଆରେ ହେରୋଦ ରାଜା ହୁଦାଙ୍ଗ୍ କୁଚ୍ଚି ମାଚି ମାନାୟାର୍ ୱାରିୟା ଆତାର୍। 7ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା ପାର୍ମାଣ୍ କିଜି ଗାଡ଼୍ଚେଙ୍ଗ୍ ୱେଚ୍ଚାନ୍, “ନିଙ୍ଗେଙ୍ଗ୍ ଇନାକା ଦରକାର୍ ନାଙ୍ଗେଙ୍ଗ୍ ୱେଚ୍ଚା ଆନେଙ୍ଗ୍ ନିଙ୍ଗେଙ୍ଗ୍ ହିଦ୍ନାଙ୍ଗ୍।”
8ତାପାଚେ ଗାଡ଼୍ହି ତେହି ଲାଗାୟ୍ ହାଲ୍ଜି ୱେନ୍ବାତାତ୍, “ଆୟା ଇନାକା ଏନ୍ନାଙ୍ଗ୍?” ସାଙ୍ଗେ-ସାଙ୍ଗେ ତା ତେହି ହେରଦିୟା ଗାଡ଼୍ହିଙ୍ଗ୍ ୱେଚ୍ଚାତ୍, “ଡୁବନ୍ହିନି ଯୋହନ୍ କାପ୍ଡ଼ା ଏନା।” ହେଦାପ୍ରେ ଗାଡ଼୍ହି ହନ୍ଚି ହାଲ୍ଜି ରାଜା ହେରୋଦତିଙ୍ଗ୍ ୱେଚ୍ଚାତ୍, “ନଙ୍ଗୟ୍ ଡୁବନ୍ହିନି ଯୋହନ୍ କାପ୍ଡ଼ା ହଣ୍ଜି ର ତାଡ଼ିଆତାକେ ନାଙ୍ଗେଙ୍ଗ୍ ହିଦା।” 9ଇବେଣ୍ ୱେନ୍ଞ୍ଜି ରାଜା ବେସି ଦୁଃକ୍ ଆତାନ୍, ମାତର୍ ତା ଗତାଙ୍ଗ୍ ମୁମ୍ଦ ପାର୍ମାଣ୍ କିଜି ମାଚାନ୍ ହେଦାଙ୍ଗ୍ କାଜିଙ୍ଗ୍ ରାଜା ମୁନା କିଦେଙ୍ଗ୍ ଆଡ୍ୱାତାନ୍।
10ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା ତା ର ହଲିଆଙ୍ଗ୍ ପକ୍ତାନ୍। ହାଲା ଯୋହନ୍ କାପ୍ଡ଼ା ହଣ୍ଜି ନାବେ ତାହିୱା। 11ହେୱାନ୍ ଜଇଲ୍ ଇଞ୍ଜ ହାଲ୍ଜି ଯୋହନତିଙ୍ଗ୍ କାପ୍ଡ଼ା ହଣ୍ଜି ର ତାଡ଼ିଆତାକେ ତାହିୱାଜି ରାଜା ଗାଡ଼୍ହିଙ୍ଗ୍ ହିତାନ୍, ଗାଡ଼୍ହି ଯୋହନ୍ କାପ୍ଡ଼ା ଅଜି ତେହିଙ୍ଗ୍ ହିତାତ୍। 12ଡୁବନ୍ହିନି ଯୋହନ ହାଃତାନ୍ ଇଞ୍ଜି କାବୁର୍ ୱେନ୍ଞ୍ଜି ତା ଚେଲାହିର୍ ୱାତାର୍, ଆରେ ତା ମାଡ଼ାତିଙ୍ଗ୍ ଦୁଗେର୍ତାକେ ଅଜି ମୁଚ୍ଚାର୍। ଆରେ ହେୱାର୍ ହାଲ୍ଜି ଯୀଶୁଙ୍ଗ୍ ୱେଚ୍ଚାର୍।
ପାଞ୍ଚ୍ଗଟା ରୁଟିଙ୍ଗ୍ ରିଣ୍ଡାଙ୍ଗ୍ ମିନ୍କୁ
(ମାର୍କ. ୬:୩୦-୪୪; ଲୁକ. ୯:୧୦-୧୭; ଯୋହନ. ୬:୧-୧୪)
13ଯୀଶୁ ଡୁବନ୍ହିନି ଯୋହନ୍ ବିଷୟରେ ୱିଜୁ ୱେଚି ପାଚେ ହେୱାନ୍ ହେ ବାହା ପିସ୍ତାନ୍ ଆରେ ରକାନ୍ ନେ ଡଙ୍ଗାତାକେ କୁଚ୍ଚି ର ଟାଙ୍ଗ୍ରାବାହାତାକେ ହାଚାନ୍। ମାନାୟାର୍ ଯୀଶୁ ହାଚି କାବୁର୍ ୱେନ୍ଞ୍ଜି ଜାର୍ ସହର୍ ପିସ୍ତି ତାପାଚେ-ପାଚେ ହାଚାର୍। ହେୱାନ୍ ଇମେତାକେ ହାନାକା ହେୱାର୍ ତାଙ୍ଗ୍ଜି-ତାଙ୍ଗ୍ଜି ହେବେ ଏକି ମାଚାର୍। 14ଡଙ୍ଗାତାଙ୍ଗ୍ ଜୁଜି ଯୀଶୁ ହୁଡ଼୍ତାନ୍, ହେବେ ବେସିହେନି ମାନାୟାର୍ ରୁଣ୍ଡା ଆତାର୍ନା। ମାନାୟାରିଙ୍ଗ୍ ହୁଡ଼୍ଜି କାର୍ମାଆଜି କେତେକ୍ ରଗିୟାରିଙ୍ଗ୍ ହାର୍କିତାନ୍।
15ୱେଡ଼ାଆର୍ଜି ୱାନିହିଙ୍ଗ୍ ଚେଲାହିର୍ ଯୀଶୁ ଲାଗାୟ୍ ୱାଜି ୱେଚ୍ଚାର୍, ବେସି ବିଲମ୍ ଆତାତେ ଆରେ ଇବାହା ବେସି ଟାଙ୍ଗ୍ରାବାହା। ଇଦାଙ୍ଗ୍ କାଜିଙ୍ଗ୍ ଇୱାରିଙ୍ଗ୍ ପକାମ୍ଦେ, ହେୱାର୍ ଲାଗେନି ହିରୁ ନାସ୍କୁକାଙ୍ଗ୍ ହାଲ୍ଜି କାଦି କଡ଼୍ଜି ତିନେର୍।
16ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇୱାର୍ ହାନି ଦର୍କାର୍ ଆକାୟ୍ ଏପେଙ୍ଗ୍ ନିଜେ ହେୱାରିଙ୍ଗ୍ ଇଚ୍କେ ତିନାକା ହିୟାଟ୍।”
17ତାପାଚେ ଚେଲାହିର୍ ଯୀଶୁଙ୍ଗ୍ ୱେଚ୍ଚାର୍, ମା ତାକେ ଆପ୍କା ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡି ମିନ୍କୁ ମାନିକ୍।
18ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ରୁଟିଙ୍ଗ୍ ଆରେ ରିଣ୍ଡି ମିନ୍କୁ ନାବେ ତାଡ।”
19ଯୀଶୁ ହେବେ ରୁଣ୍ଡାଆତି ମାନାୟାରିଙ୍ଗ୍ କାଚ୍ରା ଜପି କୁଚ୍ଚେଙ୍ଗ୍ ଆଦେସ୍ ହିତାନ୍। ତାପାଚେ ହେ ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁକାଙ୍ଗ୍ ଆସ୍ତି ବାଦାଡ଼୍ଜପି ହୁଡ଼୍ଜି ଈଶ୍ୱରତିଙ୍ଗ୍ ଦନ୍ଯବାଦ୍ କିତାନ୍ ଆରେ ରୁଟିଙ୍ଗ୍ ଡ୍ରିପ୍କି ତା ଚେଲାହିରିଙ୍ଗ୍ ହିତାନ୍। ଚେଲାହିର୍ ଅଜି ମାନାୟାରିଙ୍ଗ୍ ବାଟାକିଜି ହିତାର୍। 20ଆରେ ୱିଜାକାର୍ ରୁଟିଙ୍ଗ୍ ତିନ୍ଞ୍ଜି ପାଞ୍ଚାର୍। ଆରେ ଡ୍ରିପ୍କି ଉବ୍ରାଆତି ରୁଟିଙ୍ଗ୍ ହେୱାର୍ ପେସ୍କି ବାରଗଟା ଟପାକାଙ୍ଗ୍ ବାର୍ତିକିତାର୍। 21ଚିଚି ମାନାୟ୍, କଗ୍ଲେ ଆରେ ହିମ୍ଣାକାଙ୍ଗ୍ ପିସ୍ତି, ବେସି ଆୱିତିସ୍ ପାଞ୍ଚ୍ ହାଜାର୍ ଆଣ୍ଡ୍ରା ହିମ୍ଣାଙ୍ଗ୍ ମାଚାର୍।
ଯୀଶୁ ଏଜୁଙ୍ଗ୍ ଜପି ତାଙ୍ଗ୍ତାନ୍
(ମାର୍କ. ୬:୪୫-୫୨; ଯୋହନ. ୬:୧୫-୨୧)
22ହେଦାପ୍ରେ ଯୀଶୁ ଚେଲାହିରିଙ୍ଗ୍ ଆରେରଗ ୱେଚ୍ଚାନ୍, “ଏପେଙ୍ଗ୍ ଡଙ୍ଗାତାକେ କୁଚ୍ଚି ବେଥ୍ସାଇଦା ସହର୍ ହାମ୍ଦୁର୍ ଆଣ୍ଟିପାଡ଼୍କା ହାଲାଟ୍।” ଯୀଶୁ ହେବେ ମାନି ମାନାୟାରିଙ୍ଗ୍ ପା ଇଞ୍ଜ ପକ୍ତାନ୍। 23ଯୀଶୁ ୱିଜାରିଙ୍ଗ୍ ପକ୍ତିପାଚେ ହେୱାନ୍ ପାର୍ତାନା କିଦେଙ୍ଗ୍ ମାଡ଼ିଜପି ହାଚାନ୍। ମିସି ୱାନିହିଙ୍ଗ୍ ଯୀଶୁ ରକାନ୍ ହାମ୍ଦୁର୍ କାଣ୍ଡିତ ମାଚାନ୍। 24ହେପାଦ୍ନା ଡଙ୍ଗା ହାମ୍ଦୁର୍ ମାଦି ପାବ୍ଦ ଆଜି ମାଚାତ୍। ଆରେ ଅପ୍ରାବଲ୍ ଡ଼ୁଇ ଆତିଲେ ଡଙ୍ଗାତିଙ୍ଗ୍ ବେସି ଲଉଡ଼ି ହେପ୍କା ଇଡ଼୍ଜି ମାଚାତ୍।
25ମାତର୍ ମିକା ଚାର୍ଟା ୱେଡ଼ାଙ୍ଗ୍ ଯୀଶୁ ହାମ୍ଦୁର୍ ଜପି ତାଙ୍ଗ୍ଜି-ତାଙ୍ଗ୍ଜି ହେୱାର୍ତାକେ ହାଚାନ୍, 26ଆରେ ଚେଲାହିର୍ ହେୱାନିଙ୍ଗ୍ ହାମ୍ଦୁର୍ ଜପି ତାଙ୍ଗ୍ଜି-ତାଙ୍ଗ୍ଜି ୱାନାକା ହୁଡ଼୍ଜି କାବା ଆତାର୍। ହେୱାର୍ ୱେଚ୍ପା ୱେଚ୍ପି ଆତାର୍, “ଇୱାନ୍ତ ବୁତ୍।” ହେୱାର୍ ବୁତ୍ ଇଞ୍ଜି ବାବିକିଜି ପାଣ୍ଡ୍ରୁତିଙ୍ଗ୍ ବିଲ୍କି ଆତାର୍। 27ମାତର୍ ଯୀଶୁ ହେଦାପ୍ରେ ହେୱାରିଙ୍ଗ୍ ବେଣ୍କିଜି ୱେଚ୍ଚାନ୍, “ଶାସ୍ ଆହାଟ୍! ଆନେଙ୍ଗ୍ କିନ୍ଦା ୱାତାଙ୍ଗ୍ନା! ପାଣ୍ଡ୍ରା ଆମାଟ୍।”
28ହେବେତାଙ୍ଗ୍ ପିତର ୱେଚ୍ଚାନ୍, ଏ ମାପୃ, ଏନେଙ୍ଗ୍ ନାଙ୍ଗେଙ୍ଗ୍ ନି ଲାଗାୟ୍ ଏଜୁଙ୍ଗ୍ ଜପି ତାଙ୍ଗ୍ଜି ୱାଦେଙ୍ଗ୍ ଆଦେସ୍ ହିଦା।
29ଯୀଶୁ ୱେଚ୍ଚାନ୍, “ୱା।” ହେବେତାଙ୍ଗ୍ ପିତର ଡଙ୍ଗାତାଙ୍ଗ୍ ଯୁଜି ଏଜୁଙ୍ଗ୍ ଜପି ତାଙ୍ଗ୍ଜି ଯୀଶୁ କଚଣ୍ତ ହାଚାନ୍। 30ମାତର୍ ହେୱାନ୍ ଡ଼ୁଇ ହୁଡ଼୍ଜି ପାଣ୍ଡ୍ରା ଆତାନ୍, ଆରେ ମୁଞ୍ଜ୍ନିହିଙ୍ଗ୍ ଚେରାଆଜି ୱେଚ୍ଚାନ୍, ହେ ମାପୃ, ନାଙ୍ଗେଙ୍ଗ୍ ଉଦାର୍ କିଦା।
31ଯୀଶୁ ହେଦାପ୍ରେ କେଇ ଲାମାୟ୍ କିଜି ପିତରତିଙ୍ଗ୍ ଆସ୍ତି ୱେଚ୍ଚାନ୍, “ଏ ଅଲପ୍ ପାର୍ତି କିନାକାୟ୍ ଇନା କିଦେଙ୍ଗ୍ ପାଣ୍ଡ୍ରା ଆନାୟା?” 32ଆରେ ହେୱାର୍ ଡଙ୍ଗାତାକେ ଦୁମ୍ତି ଦାପ୍ରେ ଡ଼ୁଇଟେବା ଆତାତ୍।
33ହେବେ ଡଙ୍ଗାତାକେ ମାନି ମାନାୟ୍ ହେୱାନିଙ୍ଗ୍ ଜୱାର୍କିଜି ୱେଚ୍ଚାର୍, ଏନେଙ୍ଗ୍ ହାତ୍ପା ଈଶ୍ୱର ମେହିତି।
ଗିନେସରତ ସହର୍ତାକେ ରଗିୟାରିଙ୍ଗ୍ ଯୀଶୁ ହାର୍କିତାନ୍
(ମାର୍କ. ୬:୫୩-୫୬)
34ଗାଲିଲୀ ଜିଲ୍ଲାନି ହାମ୍ଦୁର୍ ନାସି ଯୀଶୁ ଆରେ ତା ଚେଲାହିର୍ ଗିନେସରତ ସହର୍ ହାମ୍ଦୁର୍ କାଣ୍ଡିତାକେ ଇକାତାର୍। 35ହେଦାପ୍ରେ ମାନାୟାର୍ ଯୀଶୁ ୱାତାକା ପୁନ୍ଞ୍ଜି ହେୱାର୍ ଜିଲ୍ଲାନି ପାଡ଼୍ହା ପାଡ଼୍ହି ସହର୍ ନିପଣ୍ ବେଗି-ବେଗି କାବୁର୍ ପକ୍ତାର୍। ହେଦାଙ୍ଗ୍ କାଜିଙ୍ଗ୍ ମାନାୟାର୍ ରଗିୟାରିଙ୍ଗ୍ ତା ଲାଗାୟ୍ ତାହିୱାତାର୍। 36ଆରେ ହେୱାର୍ ଯୀଶୁଙ୍ଗ୍ ତା ହେନ୍ଦ୍ରାନି ଅଟିତିଙ୍ଗ୍ ଆସ୍ପେଦେଙ୍ଗ୍ ଗୁୱାରି କିଦେଙ୍ଗ୍ ଲାଗାତାର୍, ଆରେ ହେନ୍ଦ୍ରାନି ଅଟି ଆସ୍ପିତି ଦାପ୍ରେ ରଗିୟାର୍ ହାର୍ଆତାର୍।
Currently Selected:
ମାଥିଉ 14: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
