ଲୁକ 15
15
ଜାଙ୍ଗ୍ତି ମେଣ୍ଢାନି କାତା
(ମାଥି. ୧୮:୧୨-୧୪)
1ଦିନେକ୍ କେତେକ୍ ସିସ୍ତୁଏନ୍ନାକାର୍ ଆରେ ପାପି ମାନାୟାର୍ ଯୀଶୁ କାତା ୱେଞ୍ଜେଙ୍ଗ୍ ୱାତାର୍। 2ଇଦାଙ୍ଗ୍ ହୁଡ଼୍ଜି ପାରୁସିଦଳ୍ ଆରେ ପଣ୍ଡିତାର୍ ଇନସ୍ତାକିଜି ୱେଚ୍ଚେଙ୍ଗ୍ ଆରମ୍ କିତାର୍, “ହୁଡ଼ାଟ୍ ଇୱାନ୍ ପାପିରିଙ୍ଗ୍ କୁକ୍ନାନା ଆରେ ଏଲେଙ୍ଗ୍ ବାର୍ତି ମାନାୟାର୍ ହୁଦାଙ୍ଗ୍ ତିନାନା।”
3ଯୀଶୁ ହେୱାରିଙ୍ଗ୍ ଇ କାତା ୱେଚ୍ନିଲେକେ କିଜି ୱେଚ୍ଚାନ୍। 4“ମାନେ କିୟାଟ୍ ମି ବିତ୍ରେତାଙ୍ଗ୍ ରକାନିଙ୍ଗ୍ ଶହେଗଟା ମେଣ୍ଢାଙ୍ଗ୍ ମାନିକ୍, ମାତର୍ ହେବେତାଙ୍ଗ୍ ରଞ୍ଜାଙ୍ଗ୍ ଜାଙ୍ଗ୍ନାତ୍। ଲାଗିଙ୍ଗ୍ ହେୱାନ୍ ନବେନଗଟା ମେଣ୍ଢାକାଙ୍ଗ୍ ର ଟାଙ୍ଗ୍ରାବାହାତାକେ ପିସ୍ତି ଜାଙ୍ଗ୍ତି ମେଣ୍ଢାତିଙ୍ଗ୍ ଦାସ୍ତେଙ୍ଗ୍ ହାନାନ୍। ଆରେ ହେ ମେଣ୍ଢାତିଙ୍ଗ୍ ଗାଟାଆନି ପାତେକ୍ ଡେକ୍ତେଙ୍ଗ୍ ଲାଗାନାନ୍। 5ହେୱାନ୍ ଜାଙ୍ଗ୍ତି ମେଣ୍ଢାତିଙ୍ଗ୍ ଗାଟାଆତିସ୍ ବେସି ୱାରି ଆନାନ୍। ଆରେ ହେ ମେଣ୍ଢାତିଙ୍ଗ୍ ନିପିତାକେ ପିଣ୍ଜି ଇଞ୍ଜ ତାନାନ୍।
6ତାପାଚେ ହେୱାନ୍ ତା ହାଙ୍ଗ୍ଦାକାର୍ ଆରେ ପାଡ଼୍ହା ଇଞ୍ଜାକାର୍ ଲାଗାୟ୍ ହାଲ୍ଜି ୱେଚ୍ନାନ୍, ‘ଆନେଙ୍ଗ୍ ନା ଜାଙ୍ଗ୍ତି ମେଣ୍ଢାତିଙ୍ଗ୍ ଗାଟାଆତାଙ୍ଗ୍ନା। ଆନେଙ୍ଗ୍ ବେସି ୱାରି। ୱାଡ ନା ହୁଦାଙ୍ଗ୍ ଏପେଙ୍ଗ୍ ୱାରି କିୟାଟ୍।’ 7ହେଲେକେ ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏଚେପାଦ୍ନା ରକାନ୍ ପାପି ତା ପାପ୍ କାମାୟ୍ ପିସ୍ତି ମାପୃତାକେ ୱାନାନ୍, ହେପାଦ୍ନା ତା କାଜିଙ୍ଗ୍ ସରଗ୍ତାକେ ଆଦିକ୍ ୱାରିୟା ଆନାନ୍। ଇମ୍ଣାକାର୍ ତା ପାପ୍ କାମାୟ୍ ପିସ୍ତି ମାପୃତାକେ ୱାନି ଦର୍କାର୍ ଆକାୟ୍, ହେଲେକେ ନବେନ ଜାଣ୍ ଦରମ୍ମାନାୟ୍ତାଙ୍ଗ୍ ରକାନ୍ ପାପି ମାନାୟ୍ ତା ପାପ୍ କାମାୟ୍ ପିସ୍ତି ମାପୃତାକେ ୱାତିସ୍ ଈଶ୍ୱର ଆଦିକ୍ ୱାରିୟା ଆନାନ୍।
ଜାଙ୍ଗ୍ତି ରୁପା ଡାବୁନି କାତା
8ମାନେ ଇଟାଟ୍ ର କଗ୍ଲେତିଙ୍ଗ୍ ଦଶ୍ଗଟା ରୁପା ଡାବୁଙ୍ଗ୍ ମାନିକ୍। ଯଦି ରଞ୍ଜାଙ୍ଗ୍ ଜାଙ୍ଗ୍ତାତ୍। ଲାଗିଙ୍ଗ୍ ହେ କଗ୍ଲେ ବଇଟା ଆହିକିଜି ୱିଜୁ ଇଲ୍ଗାଣ୍ ହାର୍ କିଜି ହିପ୍ନାତ୍, ଆରେ ରୁପାଡାବୁ ଗାଟାଆନି ପାତେକ୍ ଚାରିବେଣ୍ତାଙ୍ଗ୍ ଡେକ୍ନାତ୍। 9ହେ ଜାଙ୍ଗ୍ତି ରୁପାଡାବୁ ଗାଟାଆତିସ୍ ତା ହାଙ୍ଗ୍ଦାକାରିଙ୍ଗ୍ ଆରେ ତା ପାଡ଼୍ହା ଇଞ୍ଜାକାରିଙ୍ଗ୍ କୁକ୍ନାତ୍ ଆରେ ୱେଚ୍ନାତ୍, ‘ଆନେଙ୍ଗ୍ ବେସି ୱାରି। ୱାଡ ନା ହୁଦାଙ୍ଗ୍ ୱାରି କିୟାଟ୍। ଇନେସ୍କି ନା ଜାଙ୍ଗ୍ତି ରୁପାଡାବୁ ଗାଟାଆତ୍ତାତ୍।’ 10ହେଲେକେ ରକାନ୍ ପାପି ତା ପାପ୍ କାମାୟ୍ ପିସ୍ତି ଈଶ୍ୱରତାକେ ୱାତିସ୍, ସରଗ୍ନି ଦୁତ୍କୁ ବେସି ୱାରି ଆନିକ୍।”
ଜାଙ୍ଗ୍ଜି ମାଚି ହିମ୍ଣାନି କାତା
11ଯୀଶୁ ଆରେରଗ କାତା ୱେଚ୍ନିଲେକେ କିଜି ୱଚ୍ଚାନ୍, “ରକାନିଙ୍ଗ୍ ରିକାର୍ ହିମ୍ଣାଙ୍ଗ୍ ମାଚାର୍। 12ଦିନେକ୍ ହିରୁ ହିମ୍ଣା ତାଞ୍ଜିବାଙ୍ଗ୍ ୱେଚ୍ଚାନ୍, ‘ଆବା, ଏନେଙ୍ଗ୍ ନାଙ୍ଗେଙ୍ଗ୍ ନି ୱିଜୁ ସମ୍ଫତିତାଙ୍ଗ୍ ନା ବାଗ୍ଦାକା ହିଦା।’ ଲାଗିଙ୍ଗ୍ ଲାତ୍ରାହି ତା ୱିଜୁ ସମ୍ଫତିତିଙ୍ଗ୍ ରିକାର୍ ହିମ୍ଣାରିଙ୍ଗ୍ ବାଟାକିଜି ହିତାନ୍।
13କେତ୍ଦିନ୍ ପାଚେ ହିରୁ ହିମ୍ଣା ତା ବାଗ୍ଦି ୱିଜୁ ସମ୍ଫତିତିଙ୍ଗ୍ ପସି ଡାବୁଙ୍ଗ୍ ଆସ୍ତି ର ଦେହାନି ଦେସ୍ତ ହାଚାନ୍। ହେବେ ହେୱାନ୍ ର ମୁର୍କ ଲେକେ ଆଜି କରାପ୍ କାମାୟ୍ କିଜି ତା ୱିଜୁ ଦନ୍ସମ୍ଫତି ଖର୍ଚ କିଜି ୱିସ୍ତାନ୍। 14କେତ୍ଦିନ୍ ପାଚେ ତା ଡାବୁଙ୍ଗ୍ ୱିସ୍ତି ପାଚେ, ହେ ଦେସ୍ତ ୱିଜୁ ନିପଣ୍ କାତାର୍ ଆର୍ତାତ୍। ହେୱାନିଙ୍ଗ୍ ନାସ୍କି ମାଞ୍ଜେଙ୍ଗ୍ ଆତାତ୍। ହେୱାନିଙ୍ଗ୍ ଡାବୁଙ୍ଗ୍ ଦର୍କାର୍ ଆତିକ୍। ହେପାଦ୍ନା ହେୱାନିଙ୍ଗ୍ ଚିଞ୍ଜେଙ୍ଗ୍ ପା ହିଲାତାତ୍।
15ଲାଗିଙ୍ଗ୍ ହେୱାନ୍ ହେ ଦେସ୍ତ ରକାନ୍ତାକେ କାମାୟ୍ କିଦେଙ୍ଗ୍ ହାଚାନ୍। ହେୱାନ୍ ହେୱାନିଙ୍ଗ୍ ତା ବାଟାତାକେ ପାଞ୍ଜିଙ୍ଗ୍ ହାରାଇ କିଦେଙ୍ଗ୍ ପକ୍ତାନ୍। 16ହେୱାନିଙ୍ଗ୍ ଏଚେକ୍ ନାସ୍କି କିଜି ମାଚାତ୍ ଯେ, ହେୱାନ୍ ପାଞ୍ଜିଙ୍ଗ୍ ତିନିକାଦି ଇଚ୍କେ ଚିଞ୍ଜେଙ୍ଗ୍ ମାନ୍କିତାନ୍। ମାତର୍ ଇନେର୍ ପା ହେୱାନିଙ୍ଗ୍ ଚିଞ୍ଜେଙ୍ଗ୍ ହିୱାତାର୍।
17ନଙ୍ଗୟ୍ ହେୱାନ୍ ବୁଜା ଆତାନ୍ ଯେ, ହେୱାନ୍ ବେସି ମୁର୍କ କାମାୟ୍ କିତାନ୍ନା। ହେୱାନ୍ ବାବିକିତାନ୍ ମାଞ୍ଜ୍ବା କୁଲିୟାର୍ ତିନିକାଦି କେତେକ୍ ଉବ୍ରା ଆନାତା। ଆରେ ଆନେଙ୍ଗ୍ ଇବେ ନାସ୍କିତିଙ୍ଗ୍ ହାଃନାଙ୍ଗା। 18ଆନେଙ୍ଗ୍ ଇବାହା ପିସ୍ତି ମାଞ୍ଜ୍ବା ଲାଗାୟ୍ ହାନାଙ୍ଗ୍। ଆନେଙ୍ଗ୍ ଆବାଙ୍ଗ୍ ୱେଚ୍ନାଙ୍ଗ୍, ‘ଆବା, ଆନେଙ୍ଗ୍ ଈଶ୍ୱର ବିରୁଦ୍ତାକେ ଆରେ ନି ବିରୁଦ୍ତାକେ ପାପ୍ କାମାୟ୍ କିତାଙ୍ଗ୍ନା। 19ଆନେଙ୍ଗ୍ ନି ହିମ୍ଣା ଆଦେଙ୍ଗ୍ ଆଦିକାର୍ ଆକାୟ୍। ମାତର୍ ଏନେଙ୍ଗ୍ ନାଙ୍ଗେଙ୍ଗ୍ ଦୟାକିଜି ନି ଜେକନି କୁଲିୟାର୍ ଲେକେ ମେହାଇ କିଦା।’
20ଲାଗିଙ୍ଗ୍ ହେ ବାହା ପିସ୍ତି ଲାତ୍ରାହି ଲାଗାୟ୍ ହାଚାନ୍। ହିମ୍ଣା ବେସି ଦେହା ମାନିହିଙ୍ଗ୍ ଲାତ୍ରାହି ହେୱାନିଙ୍ଗ୍ ହୁଡ଼୍ତାନ୍। ହେୱାନ୍ ହିମ୍ଣା କାଜିଙ୍ଗ୍ ଦୁକ୍ କିତାନ୍। ଆରେ ତା ଲାଗାୟ୍ ହନ୍ଞ୍ଚି ହାଚାନ୍। ଲାତ୍ରାହି ହିମ୍ଣାତିଙ୍ଗ୍ ପମ୍ତାନ୍ ଆରେ ଚୁମା ହିତାନ୍। 21ହିମ୍ଣା ତାଞ୍ଜିବାଙ୍ଗ୍ ୱେଚ୍ଚାନ୍, ‘ଆବା, ଆନେଙ୍ଗ୍ ଈଶ୍ୱର ବିରୁଦ୍ତାକେ ଆରେ ନି ବିରୁଦ୍ତାକେ ପାପ୍ କିତାଙ୍ଗ୍ନା। ଆନେଙ୍ଗ୍ ନି ହିମ୍ଣା ଆନି ଆଦିକାର୍ ଆକାୟ୍।’
22ମାତର୍ ଲାତ୍ରାହି କୁଲିୟାରିଙ୍ଗ୍ କୁକ୍ଚି ୱେଚ୍ଚାନ୍, ‘ବେଗି ହାଲାଟ୍, ହିମ୍ଣା କାଜିଙ୍ଗ୍ ହାର୍ଦି ହେନ୍ଦ୍ରାପାଟା ତାଡ। ତା ୱାଚ୍କାତାକେ ୱାତୁସ୍ ତୁଜି କିୟାଟ୍। ଆରେ ହାର୍ଦି ପାଣ୍ଡାଇଙ୍ଗ୍ ତୁଜି କିୟାଟ୍। 23ମା ୱିଜୁତାଙ୍ଗ୍ ସଣ୍ଡ୍ ବାଡ଼୍ଦୁତିଙ୍ଗ୍ ତାଡ। ହେଦେଲିଙ୍ଗ୍ ଅହ୍ନାସ୍, ଆରେ ଆସେଙ୍ଗ୍ ର ବଜି କିନାସ୍। 24ନା ହିମ୍ଣା ହାଃଜି ମାଚାନ୍, ନଙ୍ଗୟ୍ ହେୱାନ୍ ଜିତାନ୍ନା। ହେୱାନ୍ ଜାଙ୍ଗ୍ଜି ମାଚାନ୍। ନଙ୍ଗୟ୍ ଗାଟାଆତ୍ତାନ୍ନା।’ ଲାଗିଙ୍ଗ୍ ହେୱାର୍ ବଜି କିଦେଙ୍ଗ୍ ଇଚାକିତାର୍।
25ହେପାଦ୍ନା ତା ଗାଜା ଟଣ୍ଡାହି ଜମିତ ମାଚାନ୍। ହେୱାନ୍ ତା ଇଲ୍ ଲାଗାୟ୍ ୱାଜି ହୁଡ଼୍ତାନ୍ ଯେ, ତାଞ୍ଜ ଏନ୍ଦ୍ନାକା କେର୍ନାକା ୱେଚାନ୍। 26ଲାଗିଙ୍ଗ୍ ତା ଗାଜା ଟଣ୍ଡାହି ରକାନ୍ କୁଲିୟାରିଙ୍ଗ୍ କୁକ୍ଚି ୱେନ୍ବାତାନ୍, ‘ଇୱିଜୁ ଇନାକା ଆନାତା?’ 27କୁଲିୟାହି ୱେଚ୍ଚାନ୍, ‘ନି ହିରୁ ଟଣ୍ଡାଦି ୱାତାନ୍। ମିଞ୍ଜ୍ବା ବଜି କାଜିଙ୍ଗ୍ ସଣ୍ଡ୍ ବାଡ଼୍ଦୁ ଅସ୍ତାନ୍ନା। ନି ଟଣ୍ଡାଦି ହାର୍ଦାଙ୍ଗ୍ ୱାତିଲେ ମିଞ୍ଜ୍ବା ବେସି ୱାରି ଆନାନା।’
28ଇଦାଙ୍ଗ୍ ୱେନ୍ଞ୍ଜି ତା ଗାଜା ଟଣ୍ଡାହି ବେସି ରିସା ଆତାନ୍। ହେୱାନ୍ ଇଲ୍ ବିତ୍ରେ ହାଞ୍ଜେଙ୍ଗ୍ ଇଚା କିୱାତାନ୍। ଲାଗିଙ୍ଗ୍ ଲାତ୍ରାହି ଗାଜା ହିମ୍ଣାତିଙ୍ଗ୍ କୁକ୍ଚି ବୁଜାଇ କିତାନ୍। 29ଗାଜା ହିମ୍ଣା ତାଞ୍ଜିବାଙ୍ଗ୍ ୱେଚ୍ଚାନ୍, ‘ବାର୍ହୁ-ବାର୍ହୁ ନିଙ୍ଗେଙ୍ଗ୍ ଆନେଙ୍ଗ୍ ପୁଜା କିତିଲେକେ ହେବାକିଜି ୱାନାଙ୍ଗା। ନି ଆଦେସ୍ତିଙ୍ଗ୍ ୱିଜୁଦିନ୍ ମାନିକିନାଙ୍ଗା। ମାତର୍ ନା କାଜିଙ୍ଗ୍ ଅଡା ଇନାୱେଡ଼ାଙ୍ଗ୍ ପା ପାଗ୍ଜି ହିଦ୍ୱାତାଇନା। ଏନେଙ୍ଗ୍ ନା କାଜିଙ୍ଗ୍ ଆରେ ନା ହାଙ୍ଗ୍ଦାକାର୍ କାଜିଙ୍ଗ୍ ଇନାୱେଡ଼ାଙ୍ଗ୍ ପା ବଜି ହିୱାତାଇନା। 30ମାତର୍ ଇ ନି ହିରୁ ହିମ୍ଣାନି ୱିଜୁ ଦନ୍ସମ୍ଫତି କରାପ୍ କାମାୟ୍ କାଜିଙ୍ଗ୍ ବୁଡାଇ କିତାନ୍ନା। ତାପାଚେ ହେୱାନ୍ ଇଞ୍ଜ ଲେଉଟା ଆତାନ୍ନା। ଆରେ ତା କାଜିଙ୍ଗ୍ ଏନେଙ୍ଗ୍ ସଣ୍ଡ୍ ବାଡ଼୍ଦୁ ପାଗ୍ତାଇ!’
31ମାତର୍ ଲାତ୍ରାହି ଗାଜା ହିମ୍ଣାତିଙ୍ଗ୍ ୱେଚ୍ଚାନ୍, ‘ହିମ୍ଣା, ଏନେଙ୍ଗ୍ ତ ୱିଜୁଦିନ୍ ନା ଲାଗାୟ୍ ମାନାୟ୍। ଆରେ ନାଦାଙ୍ଗ୍ ଇନାକା ୱିଜୁ ମାନାତ୍ ହେ ୱିଜୁ ନିଦାଙ୍ଗ୍। 32ମାତର୍ ନି ହିରୁ ଟଣ୍ଡାଦି ହାଃଜି ମାଚାନ୍। ନଙ୍ଗୟ୍ ହେୱାନ୍ ଆରେରଗ ଜିବୁନ୍ ପାୟାଆତାନ୍। ଆରେ ହେୱାନ୍ ଜାଙ୍ଗ୍ଜି ମାଚାନ୍, ନଙ୍ଗୟ୍ ହେୱାନ୍ ଗାଟାଆତ୍ତାନ୍। ଇଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ୱାରିତାଙ୍ଗ୍ ଭଜିକିନି ଦର୍କାର୍।’ ”
Currently Selected:
ଲୁକ 15: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
