ଯୋହନ 20
20
ଯୀଶୁ ଆରେରଗ ଜିବୁନ୍ଆତି କାତା
(ମାଥି. ୨୮:୧-୮; ମାର୍କ. ୧୬:୧-୮; ଲୁକ. ୨୪:୧-୧୨)
1ରଇବାର୍ ଦିନ୍ ନାଣାଙ୍ଗେ ମଗ୍ଦଲିନି ସହର୍ନି ମରିୟମ ଯୀଶୁ ଦୁଗେର୍ ଲାଗାୟ୍ ୱାତାତ୍। ହେପାଦ୍ନା ମାଜ୍ଗା ମାଚାତ୍। ହେଦେଲ୍ ହୁଡ଼୍ତାତ୍ ଯେ, ହେ ଦୁଗେର୍ ମୁମ୍ଦି ଗାଜାକାଲ୍ ଦେହା ଗୁଚାଆତାତ୍ନା। 2ଲାଗିଙ୍ଗ୍ ମରିୟମ, ଶିମୋନ ପିତର ଆରେ ଜେକନି ଚେଲାହି ଇନେରିଙ୍ଗ୍ ଯୀଶୁ ଲାଡ୍କିଜି ମାଚାନ୍, ହେୱାର୍ ଲାଗାୟ୍ ହନ୍ଚି ହାଲ୍ଜି ହେୱାରିଙ୍ଗ୍ ୱେଚ୍ଚାତ୍, “ହେୱାର୍ ଯୀଶୁ ହାଃତି ମାଡ଼ାତିଙ୍ଗ୍ ଦୁଗେର୍ତାଙ୍ଗ୍ ଅତାର୍ନା। ହେୱାର୍ ହେୱାନିଙ୍ଗ୍ ଇମେତାକେ ଇଡ଼୍ତାର୍ନା ଆପେଙ୍ଗ୍ ପୁନ୍ୱାତାପ୍ନା।”
3ଲାଗିଙ୍ଗ୍ ପିତର ଆରେ ଜେକନି ଚେଲାହିର୍ ଦୁଗେର୍ ଲାଗାୟ୍ ହାଞ୍ଜେଙ୍ଗ୍ ହତାର୍। 4ହେୱାର୍ ରିକାର୍ ହନ୍ଚି ମାଚାର୍, ମାତର୍ ପିତରତିଙ୍ଗ୍ ପାଚେ କିଜି ଜେକନି ଚେଲାହିର୍ ହନ୍ଚି ଆଗେ ଦୁଗେର୍ ଲାଗାୟ୍ ଇକାତାର୍। 5ହେୱାନ୍ ଟଡ଼୍ଜି ଦୁଗେର୍ ବିତ୍ରେ ପାତାଡ଼୍ ଣିଞ୍ଜ୍ନି ହେନ୍ଦ୍ରା ହେବେ ମାଚାକା ହୁଡ଼୍ତାନ୍। ମାତର୍ ହେୱାନ୍ ବିତ୍ରେ ହାଲ୍ୱାତାନ୍। 6ତାପାଚେ ହେୱାନ୍ ପାଚ୍ବାଗାୟ୍ ଶିମୋନ ପିତର ୱାଜି ଇକାତାନ୍। ପିତର ଦୁଗେର୍ ବିତ୍ରେ ହାଚାନ୍, ଆରେ ହେୱାନ୍ ପା ହେବେ ପାତାଡ଼୍ ଣିଞ୍ଜ୍ନି ହେନ୍ଦ୍ରା ମାଚାକା ହୁଡ଼୍ତାନ୍। 7ଇମ୍ଣି ହେନ୍ଦ୍ରା ଯୀଶୁ କାପ୍ଡ଼ାତାକେ ହୁର୍ପି ମାଚାର୍, ହେଦାଙ୍ଗ୍ ହେୱାନ୍ ହୁଡ଼୍ତାନ୍। ହେଦାଙ୍ଗ୍ ପାତାଡ଼୍ ଣିଞ୍ଜ୍ନି ହେନ୍ଦ୍ରା ଲାଗାୟ୍ ମାନ୍ୱାଦାଙ୍ଗ୍, ଜେକତାକେ ହୁର୍ପି ଆଜି ମାଚାତ୍। ପାତାଡ଼୍ ଣିଞ୍ଜ୍ନି ହେନ୍ଦ୍ରା ହୁଦାଙ୍ଗ୍ ହେଦାଙ୍ଗ୍ ହିଲ୍ୱାତାତ୍। 8ତାପାଚେ ଜେକନି ଚେଲାହି ରକାନ୍ ବିତ୍ରେ ହାଚାନ୍, ହେ ଚେଲାହି ରକାନ୍ ଦୁଗେର୍ ଲାଗାୟ୍ ଆଗେ ଇକାତାନ୍। ହେୱାନ୍ ୱିଜୁଗଟ୍ନା ହୁଡ଼୍ତାନ୍ ଆରେ ପାର୍ତି କିତାନ୍। 9ଦରମ୍ ସାସ୍ତର୍ ନିୟମ୍ତାଙ୍ଗ୍ ଯୀଶୁ ହାଃତିତାଙ୍ଗ୍ ଆରେରଗ ଜିବୁନ୍ ଆନାନ୍, ଇ କାତାନି ଅର୍ତ ହେ ଚେଲାହିର୍ ନଙ୍ଗୟ୍ ବୁଜାଆତାର୍। 10ଦୁଗେର୍ ହୁଡ଼୍ଜି ତାପାଚେ ଚେଲାହିର୍ ଇଞ୍ଜ ହାଚାର୍।
ମଗ୍ଦଲିନି ମରିୟମତିଙ୍ଗ୍ ଯୀଶୁ ଚଞ୍ଜିଆତାନ୍
(ମାଥି. ୨୮:୯-୧୦; ମାର୍କ. ୧୬:୯-୧୧)
11ମାତର୍ ମରିୟମ ଦୁଗେର୍ ବାର୍ତ ନିଲ୍ଚି ଆଡ଼୍ବିସ୍ ମାଚାତ୍। ହେଦେଲ୍ ଆଡ଼୍ବିନିହିଙ୍ଗ୍ ଟଡ଼୍ଜି ଦୁଗେର୍ ବିତ୍ରେ ହୁଡ଼୍ତାତ୍। 12ଣିଞ୍ଜ୍ନି ହେନ୍ଦ୍ରା ଉସ୍ପିସ୍ ରିକାର୍ ସରଗ୍ଦୁତ୍କୁ ଯୀଶୁ ହାଃତି ଗାଗାଡ଼୍ ଇମେତାକେ ମାଚାତ୍, ତା ଲାଗାୟ୍ ରକାନ୍ ଦୁତ୍ କାପ୍ଡ଼ା ମାଚି ବାହାତାକେ ଆରେ ରକାନ୍ ତା କାଲ୍କୁ ମାଚି ବାହାତାକେ କୁଚ୍ଚି ମାଚିକ୍। 13ହେ ସରଗ୍ଦୁତ୍ ରିୟାର୍ ମରିୟମତିଙ୍ଗ୍ ୱେନ୍ବିତିକ୍, “ଏନେଙ୍ଗ୍ ଇନା କିଦେଙ୍ଗ୍ ଆଡ଼୍ବାନାୟା?” ମରିୟମ ୱେଚ୍ଚାତ୍, “ନା ମାପୃ ହାଃତି ଗାଗାଡ଼୍ତିଙ୍ଗ୍ ଏଚେଜାଣ୍ ଅତାର୍ନା। ହେୱାର୍ ହେୱାନିଙ୍ଗ୍ ଇମେତାକେ ଇଡ଼୍ତାର୍ନା, ହେଦାଙ୍ଗ୍ ଆନେଙ୍ଗ୍ ପୁନ୍ୱାତାଙ୍ଗ୍ନା।”
14ହେଦେଲ୍ ଏଲେଙ୍ଗ୍ ୱେଚ୍ଚି ପାଚ୍ବାଗାୟ୍ ବୁଲାଆଜି ହେଦେଲ୍ ଯୀଶୁଙ୍ଗ୍ ହେବେ ନିଲ୍ତାକା ହୁଡ଼୍ତାତ୍। ମାତର୍ ମରିୟମ ହେୱାନିଙ୍ଗ୍ ଚିନ୍ କିଦେଙ୍ଗ୍ ଆଡ୍ୱାତାତ୍। 15ଯୀଶୁ ହେଦେଲିଙ୍ଗ୍ ୱେନ୍ବାତାନ୍, “ଏ ଗାଡ଼୍ଚେ, ଏନେଙ୍ଗ୍ ଇନା କିଦେଙ୍ଗ୍ ଆଡ଼୍ବାନାୟା? ଏନେଙ୍ଗ୍ ଇନେରିଙ୍ଗ୍ ଡେକ୍ନାୟା?” ମରିୟମ ବାବିକିତାତ୍, ଇୱାନ୍ନେ ବଗିଚାତିଙ୍ଗ୍ ଜାତୁନ୍ ଅନାକାନ୍। ଲାଗିଙ୍ଗ୍ ହେଦେଲ୍ ହେୱାନିଙ୍ଗ୍ ୱେଚ୍ଚାତ୍, “ଆଜ୍ଞା ଏନେଙ୍ଗ୍ ଇନାକା ନା ମାପୃ ଗାଗାଡ଼୍ତିଙ୍ଗ୍ ଅତାଇନା? ହେୱାନିଙ୍ଗ୍ ଏନେଙ୍ଗ୍ ଇମେତାକେ ଇଡ଼୍ତାଇନା? ନାଙ୍ଗେଙ୍ଗ୍ ୱେଚ୍ଚା, ଆନେଙ୍ଗ୍ ହାଲ୍ଜି ହେୱାନିଙ୍ଗ୍ ଅନାଙ୍ଗ୍।”
16ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ମରିୟମ,” ମରିୟମ ତାପଣ୍ ମାସ୍ଜି ଯିହୁଦି (ଏବ୍ରୀ) ବେଣ୍ତାଙ୍ଗ୍ ୱେଚ୍ଚାତ୍, “ରାବ୍ବୁନି” ତା ଅର୍ତ ଗୁରୁ।
17ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ଆସ୍ତେଦେଙ୍ଗ୍ ଉପାୟ୍ କିଦ୍ମା। ଆନେଙ୍ଗ୍ ନଙ୍ଗୟ୍ ପାତେକ୍ ଆବା ଈଶ୍ୱରତାକେ ହାଲ୍ୱାତାଙ୍ଗ୍ନା। ମାତର୍ ଏନେଙ୍ଗ୍ ହାଲ୍ଜି ନା ଟଣ୍ଡାରିଙ୍ଗ୍ ୱେଚା, ଆନେଙ୍ଗ୍ ମି ଆରେ ନା ଆବାତାକେ ହାନାଙ୍ଗା। ଆରେ ମି ଆରେ ନା ଈଶ୍ୱରତାକେ ହାନାଙ୍ଗା।”
18ମଗ୍ଦଲିନି ସହର୍ନି ମରିୟମ ଚେଲାହିର୍ ଲାଗାୟ୍ ହାଚାତ୍। “ଆନେଙ୍ଗ୍ ମାପୃତିଙ୍ଗ୍ ହୁଡ଼୍ତାଙ୍ଗ୍।” ଆରେ ହେୱାନ୍ ନାଙ୍ଗେଙ୍ଗ୍ ଇୱିଜୁ ୱେଚ୍ଚାତାନ୍ ଇଞ୍ଜି ହେଦେଲ୍ ଚେଲାହିରିଙ୍ଗ୍ ଯୀଶୁ ୱେଚ୍ଚି ବେଣ୍ ୱେଚ୍ଚାତ୍।
ଯୀଶୁ ଚେଲାହିରିଙ୍ଗ୍ ଚଞ୍ଜିଆତାନ୍
(ମାଥି. ୨୮:୧୬-୨୦; ମାର୍କ. ୧୬:୧୪-୧୮; ଲୁକ. ୨୪:୩୬-୪୯)
19ହେ ଦିନ୍ ରଇବାର୍ ମାଚାତ୍। ମିକାହାରେସ୍ ଚେଲାହିର୍ ରବେ ଆତାର୍। ଯିହୁଦି ନେତାର୍ ପାଣ୍ଡ୍ରୁତିଙ୍ଗ୍ ଚେଲାହିର୍ ଇଲ୍ନି ୱିଜୁ କାପାଟିଙ୍ଗ୍ ଗେସ୍ତାର୍। ତାପାଚେ ଯୀଶୁ ୱାଜି ହେୱାର୍ତାକେ ନିଲ୍ତାନ୍ ଆରେ ହେୱାରିଙ୍ଗ୍ ୱେଚ୍ଚାନ୍, “ମିଙ୍ଗେଙ୍ଗ୍ ଶାନ୍ତି ଆୟେତ୍।” 20ଯୀଶୁ ଇ କାତା ୱେଚ୍ଚି ପାଚେ ଚେଲାହିରିଙ୍ଗ୍ କେଇ ଆରେ କାଲ୍ନି ଚିନାଙ୍ଗ୍ ଚଚ୍ଚାନ୍। ଚେଲାହିର୍ ମାପୃଙ୍ଗ୍ ହୁଡ଼୍ଜି ବେସି ୱାରିୟା ଆତାର୍। 21ଯୀଶୁ ଆରେରଗ ୱେଚ୍ଚାନ୍, “ଈଶ୍ୱର ମିଙ୍ଗେଙ୍ଗ୍ ଶାନ୍ତି ହିଦେନ୍। ନାଙ୍ଗେଙ୍ଗ୍ ସରଗ୍ନି ଆବା ଇନେସ୍ ଲେକେ ପକ୍ଚି ମାନ୍ଞ୍ଚାନ୍, ଆନେଙ୍ଗ୍ ହେଲେକେ ମିଙ୍ଗେଙ୍ଗ୍ ନଙ୍ଗୟ୍ ପକ୍ତାନାଙ୍ଗା।” 22ଯୀଶୁ ଇ କାତା ୱେଚ୍ଚି ପାଚେ ଚେଲାହିର୍ତାକେ ହାୟ୍ ଇଡ଼୍ଜି ହେୱାନ୍ ୱେଚ୍ଚାନ୍, “ପବିତ୍ର ଆତ୍ମାତିଙ୍ଗ୍ ଆହାଟ୍। 23ଏପେଙ୍ଗ୍ ଯଦି ମାନାୟାରିଙ୍ଗ୍ ପାପ୍ କେମା କିନାଦେର୍, ଲାଗିଙ୍ଗ୍ ହେୱାରିଙ୍ଗ୍ ଈଶ୍ୱର ପାପ୍ କେମା କିନାନ୍। ମାତର୍ ଏପେଙ୍ଗ୍ ଯଦି ମାନାୟାରିଙ୍ଗ୍ ପାପ୍ କେମା କିଉଦେର୍, ଲାଗିଙ୍ଗ୍ ହେୱାରିଙ୍ଗ୍ ପା ଈଶ୍ୱର ପାପ୍ କେମା କିଉନ୍।”
ଥୋମାଙ୍ଗ୍ ଯୀଶୁ ଚଞ୍ଜିଆତାନ୍
24ଥୋମା ଇନେରିଙ୍ଗ୍ କି ଦିଦୁମ ଇଞ୍ଜିମାଚାର୍ ଯୀଶୁ ୱାତିହିଙ୍ଗ୍ ଚେଲାହିର୍ ହୁଦାଙ୍ଗ୍ ହିଲ୍ୱାତାନ୍। ହେୱାନ୍ ବାରଜାଣ୍ ଚେଲାହିର୍ ବିତ୍ରେତାଙ୍ଗ୍ ରକାନ୍ ମାଚାନ୍। 25ଜେକନି ଚେଲାହିର୍ ଥୋମାଙ୍ଗ୍ ୱେଚ୍ଚାର୍, “ଆପେଙ୍ଗ୍ ମାପୃଙ୍ଗ୍ ହୁଡ଼୍ତାପ୍।” ଥୋମା ୱେଚ୍ଚାନ୍, “ଆନେଙ୍ଗ୍ ତା କେଇଦ କୁଟିଙ୍ଗ୍ ହୁଦାଙ୍ଗ୍ ଇଡ଼୍ତି ଚିନା ହୁଡ଼୍ୱାଦାଙ୍ଗ୍ ପାର୍ତି କିଉଙ୍ଗ୍। ଆନେଙ୍ଗ୍ ନା ୱାଚ୍କା ହେ କୁଟିଙ୍ଗ୍ ଇଡ଼୍ତି କାଣାତାକେ ଇଟ୍ୱାଦାଙ୍ଗ୍, ଆରେ ତା ନେଞ୍ଜାଡାକିତାକେ ନା କେଇ ଇଟ୍ୱାଦାଙ୍ଗ୍ ଆନେଙ୍ଗ୍ ପାର୍ତି କିଦେଙ୍ଗ୍ ଆଡୁଙ୍ଗ୍।”
26ଆଡ଼୍ଦିନ୍ ପାଚେ ତା ଚେଲାହିର୍ ଆରେରଗ ଇଲ୍ ବିତ୍ରେ ମାଚାର୍। ଥୋମା ହେୱାର୍ ହୁଦାଙ୍ଗ୍ ମାଚାନ୍। କାପାଟ୍ତାକେ କୁଚି ଆହିଆଜି ମାଚାତ୍। ମାତର୍ ଯୀଶୁ ୱାଜି ହେୱାର୍ତାକେ ନିଲ୍ତାନ୍। ହେୱାନ୍ ୱେଚ୍ଚାନ୍, “ଈଶ୍ୱର ମିଙ୍ଗେଙ୍ଗ୍ ଶାନ୍ତି ହିଦେନ୍।” 27ତାପାଚେ ଯୀଶୁ ଥୋମାଙ୍ଗ୍ ୱେଚ୍ଚାନ୍, “ଇବେ ନି ୱାଚ୍କା ଇଟା। ନା କେଇଦିଙ୍ଗ୍ ହୁଡ଼ା। ନା ନେଞ୍ଜାଡାକିତାକେ ନି କେଇ ଇଟା। ପାର୍ତି କିୱାଦାଙ୍ଗ୍ ପାର୍ତି କିୟା।”
28ଥୋମା ଯୀଶୁଙ୍ଗ୍ ୱେଚ୍ଚାନ୍, “ନା ମାପୃ, ନା ଈଶ୍ୱର।”
29ଯୀଶୁ ଥୋମାଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦିତିଲେ ପାର୍ତି କିତ୍ତାୟ୍। ମାତର୍ ଇମ୍ଣି ମାନାୟାର୍ ନାଙ୍ଗେଙ୍ଗ୍ ହୁଡ଼୍ଦାୱାଦାଙ୍ଗ୍ ପାର୍ତି କିଦ୍ନାର୍, ହେୱାର୍ ଆଶ୍ରିବାଦ୍ ପାୟାଆନାର୍।”
ଯୋହନ ଇ ବହି ଲେକିକିନି ବିଷୟ୍
30ଯୀଶୁ ବେସି ଜେକନି ଚାନିଆଆନି କାମାୟ୍ କିତାନ୍। ହେ ୱିଜୁ ତା ଚେଲାହିର୍ ହୁଡ଼୍ତାର୍। ହେ ଚାନିଆଆନି କାମାୟ୍ କିତାକା ଇ ସାସ୍ତର୍ତାକେ ଲେକାଆୱାତାତ୍ନା। 31ମାତର୍ ଇ ବହିତାକେ ଇୱିଜୁ ଲେକାଆତାତ୍ନା, ଇନେସ୍କି ଏପେଙ୍ଗ୍ ପାର୍ତି କିନାଦେର୍, ଯୀଶୁ ଆନାନା ଖ୍ରୀଷ୍ଟ ଆରେ ଈଶ୍ୱର ମେହି, ଏପେଙ୍ଗ୍ ତା ତର୍ଦାଙ୍ଗ୍ ଜିବୁନ୍ ପାୟାଆନାଦେର୍, ଇଦାଙ୍ଗ୍ କାଜିଙ୍ଗ୍ ଇୱିଜୁ ଲେକାଆତାତ୍ନା।
Currently Selected:
ଯୋହନ 20: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
