Zacarías 9
9
Castigo ta stojol nacionetic ta sjoyobal
1Ha ini te sc'op Jehová ta stojol te q'uinal yu'un Hadrac soc ta stojol Damasco: Spisil te ants-winiquetic soc spisil te jchahp sts'umbal Israel ya sc'an ya yac' sitic ta stojol Jehová.#9.1 Spisil... ta stojol Jehová. O: Yu'un Jehová te capital yu'un Arám, soc spisil te jchahp sts'umbal Israel. 2Ha nix hich Hamat te jun smojon soc Damasco, soc te Tiro soc Sidón, aunque bayel sp'ijilic. 3Te Tiro la spas toyol ahnibal ts'ahc, soc hich la sbusan plata te bin ut'il ts'u'lum, soc hich la sbusan oro te bin ut'il ahch'al ta callehetic. 4Pero te Cajwaltic ya me spojbe sbiluc, ya smulbe yip ta mar soc ya xlajinot ta c'ahc'.
5Ya me yil te Ascalón, ya me xiw yu'un; ha nix hich te Gaza, ya me ya'iy bayel sc'uxul; soc ha nix hich te Ecrón, como ya xlaj te smuc'ul yo'tane. Ya xch'ay bahel te ajwalil yu'un Gaza, soc mayuc mach'a ya xnahin ta Ascalón. 6Ya xnahin jyanlumetic ta Asdod, soc ya jlajimbe stoybahil te filisteohetique. 7Ya jloq'uesbe te ch'ich' ta ye, soc ya jloq'uesbe te bintic ilobtic sba te ay ta yohlil te sbaquel ye. Ha nix hich yu'un Dios ya xc'ohtic te mach'atic ya xhilic yu'un; hich ya xc'ohtic te bin ut'il capitanetic yu'un Judá, soc te Ecrón hich ya xc'oht te bin ut'il te jebuseo. 8Ya cac' jcananetic ta sjoyobal te na cu'un scuenta yu'un mayuc mach'a ya x'och soc ya xloc'; ma ba ya xc'axix j'uts'inwanej ta stojol, como yacon ta yilel ta jsit nix.
Te Ajwalil te ya me xchicnaj ta Sión
9¡Tse'eluc me awo'tan, yantsil-nich'anat Sión!
¡awonanic soc yutsil q'uinal, yantsil-nich'anat Jerusalén!
Ilawil, ya xtal ta atojol te ajwalil awu'un,
toj yo'tan soc ya xcoltaywan,
peq'uel yo'tan, cajal ta burro,
ta tut burro te ha yal me' burra.
10Ya slajimbe te carretahetic yu'un guerra ta Efraín,
soc te cawuhetic ta Jerusalén,
ya yich'ic wac'ticlanel te t'ihmalte'etic yu'un guerra,
ya yalbe sc'oblal lamal q'uinal ta stojol te nacionetique.
Ya ya'iy cuentahinel c'alal ta jehch mar
ha to ta yan jehch mar,
c'alal ta muc'ul-ha' Éufrates
ha to ta sti'il te bahlumilale.
11Ha nix hichat, ta scuenta te ch'ich'
yu'un te chapbil-c'op cu'un ta atojolic,#9.11 O: chapbil-c'op awu'un,
ya jloq'uesbat te jchuqueletic awu'un
ta yawil ha' te mayuc ya'lel.
12Suhtanic talel ta ahnibal ts'ahc,
ha'ex jchuquelex te ayix smuc'ul awo'tanic;
yo'tic nix ya calbeyex
te ya jsuhtbeyex cheb buelta abiluquic.
13Como jt'imojix te Judá hich te bin ut'il t'ihmalte' cu'un
soc la jcac' te ha ya'tejibalul c'oht te Efraín.
Ya jtij hahchel awal-anich'nab, Sión,
ta scontrahinel te awal-anich'nab Grecia,
hich ya cac'at te bin ut'il espada yu'un soldado.
14Te Jehová ya yac' sba ta ilel ta stojolic,
hich ya xt'im bahel te ya'tejibal st'ihmalte'
te bin ut'il tsantsehwal;
Te Jehová, te Ajwalil,
ya yoq'uesin te corneta,
ya xbehen bahel ta guerra
ta yohlil sutu-ic' ta stojol sur.
15Te Jehová te scuentahinej spisil
ya me scanantay te mach'atic yu'un,
ya me slajinic soc ya me sts'o'ic ta teq'uel
te tonetic yu'un jihmuch'il;
ya me yuch'ic soc ay me xjuyetic
hich te bin ut'il yuch'ojic vino,
ya xnoj sch'uhtic hich te bin ut'il muc'ul taza,
hich te bin ut'il te xulubiletic
yu'un te scajtajib ta chiq'uel mahtanil.
16Ta hich ora, te Jehová te Dios yu'unic ya me scoltay
hich te bin ut'il jtsohb tuminchijetic yu'un te pueblo yu'une,
soc xlipet ya xc'ohtic ta sq'uinalic
hich te bin ut'il t'ujbil tonetic ta corona.
17¡Cax lec soc buen t'ujbil!
Te trigo ya ya'be yutsil q'uinal ya'iyic te queremetic
soc te vino ya ya'be yutsil q'uinal ya'iyic te ach'ixetique.
Currently Selected:
Zacarías 9: TZH
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.