Zacarías 6
6
Te chaneb carretahetic
1Yan buelta la jquil mohel, la jquil chicnaj chaneb carretahetic te yacalic ta loq'uel tal ta yohlil cheb witsetic te pasbilic ta bronce. 2Te shahchibal carreta nitbil ta tsajal cawuhetic, te schebal carreta nitbil ta ihc'al cawuhetic, 3te yoxebal nitbil ta saquil cawuhetic, soc te schanebal nitbil ta pinto cawuhetic.
4Hich la joc'obe te ch'ul a'bat te yac sc'opombelon: Tatil, ¿bin a ini? la jcut.
5Hich la sjac'bon te ch'ul a'bat: Ha te chaneb iq'uetic yu'un te ch'ulchan, te yaquic ta loq'uel tal ta stojol te Ajwalil yu'un swohlol bahlumilal. 6Te carreta nitbil yu'un te ihc'al cawuhetic ya xbaht ta q'uinal ta stojol norte, te saquil cawuhetic ya xbahtic ta q'uinal ta stojol smahlib c'ahc'al, te pinto cawuhetic ya xbahtic ta q'uinal ta stojol sur, xchi.
7Loq'uic bahel te cawuhetic te ay yipic, hich yo'tanic te ya sbehentayic spisil te q'uinale. Hich halbotic yu'un te ch'ul a'bat: Bahanic, behentayahic te q'uinale, xchi. Hich la sbehentayic te q'uinale.
8Patil la yic'on tal, hich la yalbon: Ilawil, te cawuhetic te bahtic ta q'uinal ta stojol norte la ya'beyic scux yo'tan te espíritu cu'un ta q'uinal ta norte, xchi.
A'bot scorona Josué
9Tal ta jtojol te sc'op Jehová, hich la yal: 10Ich'beya te mahtanil yu'un oro soc plata yu'un te mach'atic a'bot yihquitay slumalic, ha te Heldai, Tobías soc Jedaías te suhtemiquix tal ta Babilonia. Ha nix ta sc'ahc'alel a bahan ta sna Josías snich'an Sofonías. 11Ich'a te plata soc te oro, pasa corona a, a'beya ta sjol te muc'ul sacerdote Josué snich'an Josadac. 12Hich me xawalbe: Hich yaloj te Jehová te scuentahinej spisil:
Li' ay te jtuhl winic te Spuhl sbihil,
ha ya xpuhlin loq'uel tal ta slohp',
soc ya spas te templo yu'un Jehová.
13Ha ya spas te templo yu'un Jehová,
ay me yutsilal ya xc'oht,
ya shuhcan sba ta shuctajib ta cuentahinwanej,
soc ya shuhcan sba jtuhl sacerdote ta sts'ehl;
lamal q'uinal ya ya'iyic ta schebalic, xchihan me.
14Te coronahetic ya xhilic ta templo yu'un Jehová scuenta sna'ojibal yu'un te Heldai, Tobías, Jedaías soc Josías snich'an Sofonías.
15Te mach'atic namal ayic ya xtal scoltayic ta spasel te templo yu'un Jehová. Ta hich ora yac ana'ic te ticombilon tal ta atojolic yu'un te Jehová te scuentahinej spisil. Hich ya xc'oht ta pasel teme yac ach'uhumbeyic spasel te bin ya yal te Jehová te Dios awu'unique.
Currently Selected:
Zacarías 6: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
