Zacarías 4
4
Yawil c'ahc' pasbil ta oro soc cheb olivohetic
1Cha'tal te ch'ul a'bat te yac sc'opombelon, la stijon hahchel hich te bin ut'il ya yich' tijel hahchel te mach'a wayele. 2La sjoc'obon: ¿Bin yac awil? xchi.
La jac'be: Ya quil jun scajtajib c'ahc' pasbil ta oro te ay yawil aceite ta yahc'olal soc huqueb yawil c'ahc', soc huqueb tubohetic yu'un te yawil c'ahc' ayic ta sba. 3Ta sts'ehl te yawil c'ahc' ay cheb olivohetic, jun ta swa'el, yan ta sq'uexam, xchihon. 4La joc'obe te ch'ul a'bat te yac sc'opombelon: Tatil, ¿bin a ini? xchihon.
5Hich la sjac' te ch'ul a'bat te yac sc'opombelon: ¿Yu'un bal ma xana' bin a? xchi.
Ma'uc, tatil, la jcut.
6Ha yu'un hich la yalbon: Ha te sc'op Jehová ini ta stojol Zorobabel, te hich ya yal:
Ma ta scuentahuc soldadohetic
soc ma ta scuentahuc yipic,
ha ta scuenta te espíritu cu'un,
xchi te Jehová te scuentahinej spisil.
7Ha'at muc'ul witsat, ¿mach'ayat a?
Ya xc'atp'ujat ta spamlej ta stojol Zorobabel.
Ha ya sloq'ues te ton te bayel sc'oblal
te c'alal hich yacalic ta aw:
¡Mero t'ujbil! ¡Mero t'ujbil! te xchihique.
8Patil tal ta jtojol te sc'op Jehová te hich ya yal:
9Te sc'ab Zorobabel ya yotses te yich'o-ip te Na ini,
soc ha nix te sc'ab te ya shu'tes.
Hich yac ana'ic a te ticombilon
yu'un te Jehová te scuentahinej spisil.
10Te mach'atic la sp'ajic
te sc'ahc'alel te tut shahchibal te ya'tele,
tse'el me yo'tanic yu'un
c'alal ya yilic te plomo ta sc'ab te Zorobabel.
(Te huqueb sit ini, ha sit te Jehová te ya yil spisil te q'uinale.)
11La joc'obe xan: ¿Bin sc'oblal te cheb olivohetic ini te ayic ta swa'el soc ta sq'uexam te yawil c'ahc'? xchihon.
12Soc la joc'obe xan: ¿Bin sc'oblal te cha'chej olivohetic te ya smalic bahel te aceite yu'un oro ta scuenta te cheb tubohetic pasbilic ta oro? xchihon.
13Hich la sjac'bon: ¿Yu'un bal ma xana' bin a? xchi.
Ma'uc, tatil, la jcut.
14Hich la sjac'bon: Ha te cha'tuhlic ini te tsahbilic te ayic ta stojol te Ajwalil yu'un swohlol bahlumilal, xchi.
Currently Selected:
Zacarías 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.