Tito 2
2
Te bin lec ay ta nopel
1Te ha'ate, ac'a ta nopel te bin lec ta nopel. 2Te mamaletic ya sc'an ya stsahtay yo'tanic, te ya x'ich'awanic ta cuenta, ya stsahtay sbahic, te ay lec sch'uhunel yo'tanic, te ay sc'uxul yo'tanic soc te ya xcuhch yu'unic spisil. 3Ha nix hich te me'eletic ya sc'an te ya x'ich'awanic ta cuenta bin ut'il ya x'ayinic ta q'uinal, te ma xlehawanic ta c'op soc ma ba mosohimbilic yu'un vino, ha ya yaq'uic ta nopel te bin leque. 4Ac'a ya'beyic snopic te jcolel antsetic te c'uxuc ac'a ya'iy ta yo'tanic te smamalalic soc yalataquic, 5te yacuc stsahtay sbahic, te sacuc yo'tanic, yacuc yo'tantayic ya'tel ta snahic, lecuc yo'tanic, te yacuc yac' sbahic ta cuentahinel yu'un te smamalalic, scuenta yu'un hich ma xbohlob sc'oblal a te sc'op Diose.
6Ha nix hich ya me atsits te queremetic te yacuc stsahtay sbahic. 7Ta spisil ac'a ta ilel ta yohlilic te bin lec ta pasele. C'alal yac awa'iy p'ijubteswanej ac'a ta ilel te jun ay te awo'tan, te ay sc'oblal ta awo'tan, 8soc lequil c'op xawal te ma xhu' ta contrahinel, scuenta yu'un ya sta q'uexlal a te acontra soc ma xweht bin chopol ya yalbotic jc'oblaltic. 9Tsitsa te mosohetic te yacuc sch'uhumbeyic smandar te yajwalic, te lecuc yo'tanic ta stojolic, ma me sutawanic ta c'op. 10Ma me xyelc'anic te yajwalic, ac'a me yaq'uic ta ilel te jun yo'tanic ta stojol, scuenta yu'un hich me lec ya xc'oht sc'oblal yu'unic a te bin ay ta nopbeyel sc'oblal Dios, te Jcoltaywanej cu'untique.
11Como chicnajemix te yutsil yo'tan Dios scuenta yu'un ay colel ta stojol spisil ants-winiquetic, 12soc ya snohptesotic te yacuc xhil cu'untic spisil bintic chopol soc bintic mulantic sba ta pasel ta bahlumilal, te tsahtaybiluc co'tantic ya x'ayinotic ta ora ini, te tojuc ya x'ayinotic soc te ayuc ta co'tantic spisil ora te Diose, 13te c'alal yacotic ta smahliyel te bin smuc'ulinej co'tantic te bayel yutsil, ha te ya xchicnaj tal soc yutsilal te muc'ul Dios soc Jcoltaywanej cu'untic, ha te Jesucristo. 14Ha la yac' sba ta lajel cu'untic yu'un la smanotic loq'uel ta stojol spisil bintic chopol soc yu'un ya sch'ultes jun pueblo te yu'un ya xc'oht, te ya yo'tantayic spasel lequil a'teliletic.
15Ha me xawalbe ya'iyic, ya me atsits soc ya me acom ta scuenta spisil yip awa'tel. Ma me ayuc mach'a ya sp'ajat.
Currently Selected:
Tito 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
