Malaquías 4
4
Te sc'ahc'alel Jehová
1Ya me xtal te sc'ahc'alel,
yac ta tihlel hich te bin ut'il horno,
spisil te jtoybahetic
soc te mach'atic chopol bin ya spasic,
ha ac ya xc'ohtic.
Te c'ahc'alil te ya xtal
ya me schic'ticlan,
xchi te Jehová te scuentahinej spisil,
ma ba ya xhil yu'un te slohp' o te sc'abe.
2Yan te ha'ex te awich'ojic ta muc' te jbihile,
ya me xtihl ta atojolic te bin stojil ta pasel
hich te bin ut'il sts'anabul te c'ahc'ale,
soc ya yich' talel ta xic' te colele.
Ya me xloq'uex bahel soc ya me xwihlawetex
hich te bin ut'il tut wacaxetic
te ya xloq'uic bahel ta snahic.
3Ta sc'ahc'alel te ay bin ya jpas,
yac ats'o'ic ta teq'uel te mach'atic chopolic,
hich ya xc'ohtic te bin ut'il stanul c'ahc'
ta ye'tal awoquic,
xchi te Jehová te scuentahinej spisil.
4Na'ahic me te ley yu'un te ca'bat Moisés,
te la jca'be ta Horeb,
ha te halbil mandariletic
soc te leyetic yu'un spisil Israel.
5Ilawil, ya jticombeyex te jalwanej Elías
te c'alal ma to xc'oht a te sc'ahc'alel yu'un Jehová,
te ha muc' soc xiweltic sba.
6Ha ya yac' suhtuc yo'tanic
te tatiletic ta stojol te snich'nabic,
soc te yo'tanic te yal-snich'nabic
ta stojol te tatiletique,
teme ma'uque, ya xtalon
soc ya ca'be castigo te q'uinale,
xchi te Jehová.
Currently Selected:
Malaquías 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
