Levítico 8
8
A'bot yich' ya'telic Aarón soc snich'nab
1Te Jehová la yalbe te Moisés: 2Ic'a tal te Aarón soc snich'nab, soc ich'a tal te c'u'uletic, te aceite yu'un ch'ultesel, te jcolel toro scuenta mahtanil yu'un stojel mulil, te cha'coht stat tuminchijetic, soc te stut mochil pan ma ba yich'oj levadura; 3soc tsoba spisil te pueblo ta stojol te yochibal te Nahilpac' Templo yu'un tahojibal, xchi.
4Te Moisés hich la spas te bin halbot yu'un te Jehová, la stsob spisil te pueblo ta stojol te yochibal te Nahilpac' Templo yu'un tahojibal. 5Te Moisés hich la yalbe te pueblo: Hich ay te smandar Jehová te ya sc'an pasel, xchi.
6Te Moisés la yic' tal te Aarón soc snich'nab, la spocticlan ta ha'. 7La ya'be slap te smuc'ul-c'u', la schuc ta schuhquil sch'uht, la ya'be slap te snahtil-c'u', ta sba la ya'be te efod, la schuc ta schuhquil scuenta lec chucbil c'oht. 8Ta sba la ya'be te bolsa ya xc'oht ta stahn, tey la yotses a te Urim soc Tumim. 9Patil la ya'be ta sjol te spixjol pac', ta stojol sti'ba la ya'be te jayal pehchel oro, ha te ch'ul corona, hich te bin ut'il halbot yu'un Jehová te Moisés.
10Te Moisés la stsac te aceite scuenta ch'ultesel, la smal a te Nahilpac' soc ta sba spisil te bintic ayic ta yutil, hich la sch'ultes; 11la stsihtsin huqueb buelta a te scajtajib ta chiq'uel mahtanil, la smalbe ta sba te scajtajib ta chiq'uel mahtanil soc ta sba spisil te biluquetic yu'un, soc te yawil ha' soc scajtajib, yu'un ya sch'ultes. 12La smalbe ta sjol Aarón te aceite yu'un ch'ultesel scuenta yu'un ya sch'ultes.
13Patil te Moisés la yic'ticlan tal ta stojol te snich'nab Aarón, la yac'ticlambe slap te smuc'ul-c'u'ic, la schucticlambe ta schuhquil sch'uht soc la schucticlambe ta sjolic te spixjol paq'uic, hich te bin ut'il halbot yu'un Jehová te Moisés.
14Patil la sticon ta iq'uel tal te jcolel toro scuenta mahtanil yu'un mulil. Te Aarón soc te snich'nab la scajan sc'abic ta sjol te jcolel toro. 15Te Moisés la smil, la yich'be te sch'ich'el, ta yal sc'ab la sjaxbe ta xulubiletic soc ta sjoyobal te scajtajib ta chiq'uel mahtanil, yu'un ya slecubtes. Te ch'ich' te hile, la smalbe ta yoc te scajtajib, hich la sch'ultes scuenta yu'un tey ya yich' pasel a te stojel mulile.
16Patil te Moisés la yich'be spisil sjuhp'el te macal a te sbiquil, te sjuhp'el ta sba te sehcub, schebal te sriñon soc te sjuhp'ele, la schic' spisil ta scajtajib ta chiq'uel mahtanil. 17Pero te jcolel toro, te snuhculel, sbaq'uetal soc stsa', la schic' ta c'ahc' ta fuera yu'un te campamento, hich te bin ut'il halbot yu'un Jehová te Moisés.
18Patil la yac' ta iq'uel tal te tat tuminchij yu'un scohtol chic'bil mahtanil; te Aarón soc te snich'nab la scajan sc'abic ta sjol te tuminchije. 19Te Moisés la smil, la smalbe sch'ich'el ta sjoyobal ta sba te scajtajib ta chiq'uel mahtanil. 20La sjecticlan te tuminchij, la schic'be te sjol, te jecticlambil soc te sjuhp'ele. 21La spoc ta ha' te sbiquil soc te ya', la schic' scohtol te tat tuminchij ta scajtajib ta chiq'uel mahtanil, ha scohtol chic'bil mahtanil te sumet yic', ha mahtanil te ya yich' chiq'uel ta stojol Jehová, hich te bin ut'il halbot yu'un Jehová te Moisés.
22Patil te Moisés la yac' ta iq'uel tal te yan tat tuminchij, ha te tat tuminchij scuenta mach'a ya x'a'bot yich' ya'tel. Te Aarón soc te snich'nab la scajan sc'abic ta sjol te tuminchij. 23Te Moisés la smil, la yich'be jtebuc te sch'ich'el, la sjaxbe ta sc'unil swa'el chiquin te Aarón, ta swa'el sme' sc'ab soc ta swa'el sme' yoc. 24La yic'ticlan tal te snich'nab Aarón, la sjaxbe ch'ich' ta sc'unil swa'el chiquinic, ta swa'el sme' sc'abic soc ta swa'el sme' yoquic. Soc la stsihtsin ta ch'ich' ta sjoyobal ta sba te scajtajib ta chiq'uel mahtanil.
25Patil la yich'be te sjuhp'el, te sne, spisil te sjuhp'el ay ta sbiquil, te sjuhp'el ay ta sba te sehcub, schebal te sriñon soc te sjuhp'el, soc te swa'el ya'. 26Soc ta stut mochil pan te ma ba yich'oj levadura, te ay ta stojol Jehová, la stsac loq'uel jpehch pimil pan te ma ba yich'oj levadura, jpehch pimil pan te wots'bil ta aceite, soc jpehch jayal pan, la ya'be sjoquin te sjuhp'el soc te swa'el ya'. 27Spisil la ya'be ta sc'ab te Aarón soc ta sc'ab te snich'nab, la yac' ta tuchilanel scuenta tuchilambil mahtanil ta stojol Jehová. 28Te Moisés la yich'be ta sc'abic spisil, la schic' ta scajtajib ta chiq'uel mahtanil ta sba te scohtol chic'bil mahtanil; ha'ic te mahtaniletic yu'un yich'el a'tel te sumet yic', ha chic'bil mahtanil ta stojol Jehová.
29Te Moisés la stsacbe te stahn, la stuchilan scuenta tuchilambil mahtanil ta stojol Jehová; ha yu'un Moisés te stahn te tuminchij scuenta yich'el a'tel, hich te bin ut'il halbot yu'un Jehová te Moisés.
30Patil te Moisés la yich' jtebuc te aceite scuenta ch'ultesel, soc jtebuc te ch'ich' ay ta scajtajib ta chiq'uel mahtanil, la stsihtsin a te Aarón soc te sc'u', te snich'nab soc te sc'u'ique. Hich la sch'ultes te Aarón soc te sc'u', te snich'nab soc sc'u'ic te snich'nabe.
31Te Moisés la yalbe te Aarón soc te snich'nab: Payahic te ti'bal ta stojol te yochibal te Nahilpac' Templo yu'un tahojibal, tey yac awe'ic soc a te pan ay ta tut moch scuenta yich'el a'tel, hich te bin ut'il la jcal ta mandar,#8.31 O: hich te bin ut'il halboton, te ha ya swe'ic te Aarón soc te snich'nab, te xchihone. 32Ya me achiq'uic te bin ya xhil yu'un te ti'bal soc te pane. 33Huqueb c'ahc'al ma me xloq'uex bahel ta stojol te yochibal te Nahilpac' Templo yu'un tahojibal, ha to c'alal ya sts'acay te sc'ahc'alel te ya x'a'botex awich'ic awa'telic, como ya xhalaj huqueb c'ahc'al te ya x'a'botex awich'ic awa'telic. 34Te bin la yich'ix pasel ta ora ini, ha te bin la yal ta mandar te Jehová scuenta stojel amulic. 35Ya x'ayinex huqueb c'ahc'al soc huqueb ahc'abal ta stojol te yochibal te Nahilpac' Templo yu'un tahojibal soc ya me ach'uhunic spasel te bin la yal ta mandar te Jehová, scuenta yu'un ma ba ya xchamex; como hich pasbilon ta mandar yu'un, xchi.
36Te Aarón soc te snich'nab la spasic spisil te bintic la yal ta mandar te Jehová ta scuenta Moisés.
Currently Selected:
Levítico 8: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
