Levítico 4
4
Mahtanil yu'un mulil
1Te Jehová la yalbe te Moisés: 2Halbeya te snich'nab Israel: Teme ay mach'a ma snopojuc a ya sta smul ta scuenta sc'axuntaybeyel te mandariletic yu'un Jehová, te ma hichuc pasel ya sc'an, teme hich ya spas te bin ut'il ini:
3Teme ha ya sta smul te sacerdote te yich'oj malel ta aceite scuenta ch'ultesel, te hich ya ya'be sta smul a te pueblo, ya me ya'be Jehová jcoht jcolel toro te mayuc bin jihnem yu'un scuenta stojel mulil yu'un te smul stahoje. 4Ya me yic' tal te jcolel toro ta yochibal Nahilpac' Templo yu'un tahojibal ta stojol Jehová, ya scajan sc'ab ta sjol te jcolel toro, soc ya smil ta stojol Jehová. 5Te sacerdote te yich'oj malel aceite ya yich' bahel jtebuc sch'ich'el te jcolel toro ta yutil te Nahilpac' Templo yu'un tahojibal. 6Ya me yahts'es te yal sc'ab ta ch'ich', ya stsihtsin huqueb buelta ta stojol Jehová ta stojol te tsalul pac' yu'un te ch'ul awilal. 7Ya me sjaxbe te ch'ich' ta xulubiletic yu'un te scajtajib ta chiq'uel pom te ay ta Nahilpac' Templo yu'un tahojibal, ta stojol te Jehová; te sch'ich'el te hilem ya smalbe ta yoc te scajtajib ta chiq'uel mahtanil te ay ta stojol te yochibal te Nahilpac' Templo yu'un tahojibal. 8Ya sloq'uesbe spisil te sjuhp'el te toro ya yich' aq'uel scuenta stojel mulil, ha spisil te sjuhp'el macal sbiquil a soc te sjuhp'el ta yutil sch'uht, 9schebal sriñon soc sjuhp'el te potsol a, soc te sjuhp'el ta sba slomo; pajal ya sloq'uesbe soc sriñon te sjuhp'el te sehcub, 10hich te bin ut'il ya yich' loq'uesbeyel sjuhp'el te toro yu'un milbil mahtanil scuenta lamal q'uinal. Te sacerdote ya schic' ta scajtajib ta chiq'uel mahtanil. 11Te snuhculel te jcolel toro, spisil sbaq'uetal, soc sjol, ya', sbiquil, soc stsa', 12ha spisil te jcolel toro te hile, ya me sloq'ues bahel ta fuera yu'un te campamento ta jun lugar te ma ba bohloben sc'oblal, te banti ya yich' ch'ayel te stanul c'ahc', ya me schic' ta sba si' ta banti ay te stanul c'ahc'.
13Teme spisil te pueblo Israel te ma snopojuc a ya sta smul, teme ma ba sna'oj te pueblo te stahoj smule, stahoj smul yu'un te la sc'axuntaybe smandar Jehová te ma hichuc ay ta pasele. 14C'alal ya sna'ic ta patil te stahoj smulic, te pueblo ya me yac' jcolel toro scuenta stojel mulil, ya me yic' tal ta stojol te Nahilpac' Templo yu'un tahojibal. 15Te mamaletic yu'un te pueblo ya scajan sc'abic ta sjol te jcolel toro ta stojol Jehová, soc tey ya smilic a te jcolel toro. 16Te sacerdote te yich'oj malel ta aceite ya yich'be ochel jtebuc te sch'ich'el te jcolel toro ta Nahilpac' Templo yu'un tahojibal, 17ya yahts'es te yal sc'ab ta ch'ich', ya stsihtsin huqueb buelta ta stojol Jehová ta stojol te tsahlul paq'ue. 18Soc ya sjaxticlan ta ch'ich' te xulubiletic yu'un te scajtajib ta chiq'uel pom te ay ta stojol Jehová, ta Nahilpac' Templo yu'un tahojibal. Spisil te ch'ich' ya xhile, ya smalbe ta yoc te scajtajib ta chiq'uel mahtanil te ay ta yochibal te Nahilpac' Templo yu'un tahojibal. 19Soc ya me sloq'uesbe spisil te sjuhp'el, ya schic' ta scajtajib ta chiq'uel mahtanil. 20Hich ya spasbe te jcolel toro te bin ut'il la spasbe te jcolel toro yu'un stojel mulil. Te sacerdote hich ya spasbe te stojel mulil yu'un te pueblo, hich ya stahic perdón a. 21Ya sloq'ues bahel te jcolel toro ta fuera yu'un te campamento, ya schic' hich te bin ut'il la schic' te yan jcolel toro; ha milbil mahtanil yu'un stojel mulil yu'un te pueblo.
22Teme ha jtuhl jcuentahinwanej ya sta smul, teme ma snopojuc a ya sc'axuntaybe smandar Jehová te Dios yu'un te ma hichuc ay ta pasele, stahoj smul a. 23C'alal ya sna' ta patil te stahoj smul, ya me yac' scuenta mahtanil jcoht tat tentsun te mayuc bin jihnem yu'une. 24Ya scajan sc'ab ta sjol te tat tentsun, ya smil ta lugar te banti ya yich' milel te scohtol chic'bil mahtanil ta stojol Jehová; ha milbil mahtanil yu'un stojel mulil. 25Te sacerdote ya yich'be sch'ich'el te mahtanil, ya sjaxbe soc yal sc'ab ta xulubiletic yu'un te scajtajib ta chiq'uel mahtanil; te ch'ich' te ya xhile, ya smalbe ta yoc te scajtajib. 26Soc ya schic'be spisil te sjuhp'el ta sba te scajtajib ta chiq'uel mahtanil, hich te bin ut'il te sjuhp'el te milbil mahtanil scuenta lamal q'uinal. Te sacerdote hich ya spasbe te stojel mulil yu'un, hich ya sta perdón a.
27Teme ay mach'a ay ta pueblo te ma snopojuc a ya sta smul ta sc'axuntaybeyel smandar Jehová te ma hichuc ay ta pasele, stahoj smul a. 28C'alal ya sna' ta patil te stahoj smul, ya me yac' scuenta mahtanil jcoht yantsilel tentsun te mayuc bin jihnem yu'un, scuenta mahtanil yu'un stojel smul stahoj. 29Ya scajan sc'ab ta sjol te mahtanil yu'un stojel mulil, ya smil ta lugar te banti ya yich' milel te scohtol chic'bil mahtanil. 30Patil te sacerdote ya smul ta ch'ich' te yal sc'ab, ya sjaxbe ta xulubiletic yu'un te scajtajib ta chiq'uel mahtanil, soc te ch'ich' ya xhile, ya smalbe ta yoc te scajtajib. 31Soc ya me sloq'uesbe spisil te sjuhp'el, hich te bin ut'il la yich' loq'uesbeyel sjuhp'el te milbil mahtanil scuenta lamal q'uinal; te sacerdote ya schic' ta scajtajib ta chiq'uel mahtanil scuenta sumet yic' ta stojol Jehová. Te sacerdote hich ya spasbe te stojel mulil yu'un, soc hich ya sta perdón a.
32Teme ha ya yac' jcoht jcolel tuminchij scuenta mahtanil yu'un mulil, ya me yic' tal te yantsilel te mayuc bin jihnem yu'un. 33Ya scajan sc'ab ta sjol te mahtanil yu'un stojel mulil, ya smil scuenta mahtanil yu'un stojel mulil tey ta lugar ta banti ya yich' milel te scohtol chic'bil mahtanile. 34Te sacerdote ya yich'be sch'ich'el te mahtanil yu'un stojel mulil, ta yal sc'ab ya sjaxbe ta xulubiletic yu'un te scajtajib ta chiq'uel mahtanil; te ch'ich' te ya xhile, ya smalbe ta yoc te scajtajib. 35Ya sloq'uesbe spisil te sjuhp'el, hich te bin ut'il ya yich' loq'uesbeyel sjuhp'el te milbil mahtanil scuenta lamal q'uinal; te sacerdote ya schic'be te sjuhp'el ta scajtajib ta chiq'uel mahtanil ta sba te chic'bil mahtanil ta stojol Jehová. Te sacerdote hich ya spasbe te stojel mulil yu'un te smul stahoj, hich ya sta perdón a.
Currently Selected:
Levítico 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
