Isaías 3
3
Castigo ta stojol Judá soc Jerusalén
1Como te Cajwaltic, te Jehová te scuentahinej spisil,
ya me sloq'ues ta Jerusalén soc ta Judá
spisil te bintic ya xtuhun soc te bintic ya xcoltaywan,
spisil te we'elil soc spisil te ha',
2te mach'a ay yip yo'tan soc te soldado,
te juez, jalwanej, jna'ojel, soc te mamal,
3te capitán yu'un lajuneb yoxwinic (50)
soc te winic ich'bil ta muc',
te j'ac'-o'tanil, te mach'a ya sna' sch'ahlel ta lec te bin ya spas,
soc te mach'a ya sna' monaw ta lec.
4Ya me yotses queremetic scuenta príncipaletic yu'unic;
ya xcuentahinotic yu'un alaletic.
5Talel c'axel me ya yuts'in sbahic,
jtuhlultuhl ya scontrahin te spat-xuhc;
te ach'ix-querem ya scontrahin te me'el-mamal,
te mach'a peq'uel ya scontrahin te mach'a ich'bil ta muc'.
6Teme ay mach'a ya stsacbe sc'ab te yermano ta sna stat,
soc te hich ya yalbe: Ha'at ay ac'u',
ha'at jcuentahinwanejat cu'untic ya xc'ohat,
cuentahina te bin jihnem ini, te xchihe,
7ha me ya yal:
¡Ma ba ya x'ochon ta jpoxtaywanej;
mayuc jwe'el ta jna soc mayuc jc'u' ya jlap!
¡Ma me xawotseson ta jcuentahinwanej yu'un te pueblo! xchi.
8Como jihnemix te Jerusalén,
yahlemix te Judá;
como te sc'opic soc te ya'telic
scontrahinejic te Jehová,
la stsal sba soc te smuc'ul yutsilale.
9Ha nix ya xchicnaj ta sit yelawic te smulique;
hich te bin ut'il Sodoma ya spuquic ta halel te smulique,
ma ba ya smuquic.
¡Ay me swocolic!
Ha nix ta scuentahic te ay swocolique.
10Halbeya te mach'a toj
te lec ya xc'oht ta loq'uel,
como ya me swe'be sit te ya'tel sc'ab.
11¡Ay me swocol te mach'a chopol!
Ma ba lec ya xc'oht ta loq'uel,
como ya x'a'bot stojol sc'ab
ha chican te bin spasojique.
12Ha queremetic te ya yuts'inic te pueblo cu'un,
ya xcuentahinotic yu'un antsetic.
Pueblo cu'un, ya slo'loyex te mach'atic ya stojobtesex bahel,
ya syanijtesbeyex te behetic awu'unique.
13Te Jehová chapalix yu'un ya ya'iy ich'aw ta c'op,
teq'uelix ta schahpanel te pueblo yu'une.#3.13 O: te pueblohetique.
14Te Jehová ya xtal schahpan te mamaletic
soc te príncipaletic yu'un te pueblo:
Ha'ex te la alajinic te ts'usubil cu'un,
soc ay ta anahic te bin la apojbeyic te pobre.
15¿Bin anopojic a te yac atenic ta uts'inel te pueblo cu'un
soc te yac atec'beyic yelaw te pobrehetic?
xchi te Jehová te scuentahinej spisil.
Castigo ta stojol antsetic yu'un Sión
16Soc ha nix hich ya yal te Jehová:
Te antsetic yu'un Sión stoyoj sbahic,
stoyoj snuq'uic a ya xbehenic,
ya xmonawan ta sitic,
ya x'ahc'otajic ta behel,
yac ta stijel sch'ahlel yoquic a.
17Ha yu'un te Cajwaltic ya me ya'be chin
ta sjolic te antsetic yu'un Sión,
te Jehová ya me schicnajtesbe sq'uexlalic, xchi.
18Ta hich ora te Cajwaltic
ya sloq'uesbe te sch'ahlel yoquic,
sch'ahlel sjolic soc sch'ahlel snuq'uic te yach'il u yilel,
19te staq'uinal schiquinic, sch'ahlel snuc' sc'abic
soc smuhquil sjolic,
20te sbehch'il sjolic soc sch'ahlel snuc' yoquic,
te schuhquil ch'uhtic, yawil perfume,
soc te smahquil bintic chopol,
21te ch'ocowetic soc sch'ocowil sni'ic,
22te t'ujbil c'u'uletic, snahtil c'u'uletic,
srebosohic soc sbolsahic,
23te espejohetic soc lequil paq'uetic,
te spohtsil sjolic soc te schuhquilique.
24Te sumet yic' perfume ya sutp'ij ta bin tu;
te schuhquil ch'uhtic ya sutp'ij ta lazo;
te buen ch'albil sjolic ya sutp'ij ta t'axjol;
te t'ujbil sc'u'ic ya sutp'ij ta ch'ixal pac';
te st'ujbilalic ya sutp'ij ta bin c'ahq'uem.
25Te winiquetic awu'unic ya me xlajic ta espada,
te soldadohetic awu'unic ya me xlajic ta guerra.
26Te ochibaletic yu'un Sión
ya me x'oq'uic soc ya me smel yo'tanic,
te bin ut'il ch'aybil ta o'tanil,
ya shuhcan sba ta lum.
Currently Selected:
Isaías 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
