Éxodo 37
37
Te bintic ya xtuhun ta Nahilpac' Templo
1Ha nix hich te Bezaleel la spas te scaxahul te chapbil-c'op ta acacia-te', j'ohlil yoxeb xuhc'ubil#37.1 1.10 metros snahtil, j'ohlil scheb xuhc'ubil#37.1 65 centímetros sjamalil soc j'ohlil scheb xuhc'ubil stoyolil. 2La spots ta puro oro ta yutil soc ta spat, soc la spasbe sch'ahlel ta pimil oro ta sjoyobal. 3La spasbe chaneb sch'ocowil ta uhltesbil oro ta schanebal te yoque, cheb ch'ocow ta jehch soc cheb xan ta yan jehch. 4Soc la spasbe sq'uechojibal ta acacia-te', la spots ta oro; 5la sohltesbe ta ch'ocowetic ta jujujehch te scaxahul te chapbil-c'op yu'un ya yich' q'uechel bahel a.
6Soc la spas ta puro oro te yawil stahel perdón, j'ohlil yoxeb xuhc'ubil snahtil soc j'ohlil scheb xuhc'ubil sjamalil. 7La spas cheb querubinetic ta oro tembil ta martillo, la yac' ta jujujehch te yawil stahel perdón; 8jujun querubín ta jujujehch; junax la spas soc te yawil stahel perdón. 9Te querubinetic slich'oj mohel xiq'uic ta yaxintesel te yawil stahel perdón; snuhp'usitayej sbahic, yaquic ta yilel te yawil stahel perdón.
10La spas te mesa ta acacia-te', cheb xuhc'ubil#37.10 90 centímetros snahtil, jun xuhc'ubil#37.10 45 centímetros sjamalil soc j'ohlil scheb xuhc'ubil#37.10 65 centímetros stoyolil; 11la spots ta puro oro soc la spasbe sch'ahlel ta oro ta sjoyobal. 12La ya'be tut tabla ta sjoyobal sti'il te jtahn-c'abal#37.12 7 centímetros sjamalil, soc la spasbe sch'ahlel ta oro. 13La spasbe chaneb sch'ocowil ta uhltesbil oro, la yac'ticlan ta jujuxuhc ta banti ay te schanebal yoc. 14Te ch'ocowetic ayic ta ye'tal te tabla te banti ya yich' sohltesel te sq'uechojibal te ya yich' q'uechel bahel a te mesahe.
15La spas ta acacia-te' te sq'uechojibal te ya yich' q'uechel bahel a te mesa, soc la spots ta oro. 16Soc la spas ta puro oro te bintic ya xtuhun ta sba te mesa, ha te platohetic, cucharahetic, muc'ul tazahetic soc yawil te mahtaniletic ya yich' malele.
Te scajtajib c'ahc'
17Soc la spas te scajtajib c'ahc' ta puro oro tembil ta martillo; junax ayic te yoc, ste'el, svasohil, swolnich soc snich. 18Waqueb sc'ab loq'uem ta ste'el, oxoxeb sc'ab ta jujujehch. 19Ta jch'ix sc'ab ay oxeb vaso te pajal yilel soc snich almendro, ay swolnich soc snich, soc ta yan sc'ab ay oxeb vaso te pajal yilel soc snich almendro, ay swolnich soc snich; hich ta swaquebal te sc'ab te ya xloc' ta scajtajib c'ahc'. 20Soc ta ste'el te scajtajib c'ahc' ay chaneb vaso te pajal yilel soc snich almendro, soc te swolnich soc snich; 21ay swolnich ta ye'tal te cheb sc'ab, soc ay yan swolnich ta ye'tal te cheb xan sc'abe, hich ta hich ta jujuch'ix sc'ab te loq'uemique. 22Te swolnich soc te sc'abic junax ayic soc te scajtajib c'ahc', tembilic ta martillo ta puro oro. 23Soc la spas ta puro oro te huqueb yawil c'ahc', te tenazahetic soc te platohetic yu'une. 24Ta jun talento oro#37.24 33 kilos la spas te scajtajib c'ahc' soc spisil te bintic ya xtuhun tey a.
25La spas ta acacia-te' te scajtajib ta chiq'uel pom, jun xuhc'ubil#37.25 45 centímetros snahtil soc jun xuhc'ubil sjamalil, pajal ta schanxuhcul, soc cheb xuhc'ubil stoyolil. Te xulubiletic junax ayic soc. 26La spots ta puro oro te sba, te schanxuhcul soc te xulubiletic yu'une, soc la spasbe sch'ahlel ta oro ta sjoyobal. 27Soc la spas cheb sch'ocowil ta oro ta ye'tal te sch'ahlel ta schebal xuhc ta jujujehch te banti ya xc'ax te sq'uechojibal te ya yich' q'uechel bahel a. 28Soc la spas ta acacia-te' te sq'uechojibal soc la spotsticlan ta oro.
29La spas te ch'ultesbil aceite yu'un ch'ultesel soc te lequil pom te buen sumet yic', hich te bin ut'il ya spas te mach'a ya spas perfume.
Currently Selected:
Éxodo 37: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.