Éxodo 34

Ya yich' chahpanel ta yach'il te chapbil-c'op

1Te Jehová la yalbe te Moisés: Wahluya cha'pehch tonetic pajal soc te yantique, ya jts'ihbay tey a te c'opetic ay ta yan tonetic te la awuye. 2Chahpana aba hiche, yu'un pajel ya xmohat tal ta wits Sinaí; ya me atehc'an aba ta jtojol ta sba te witse. 3Ma me ayuc mach'a ya sjoquinat mohel tal, ma me ayuc mach'a ya xchicnaj ta bayuc te witse, ni ha'uc tuminchijetic o wacaxetic te ya sle swe'elic ta wits, xchi.

4Te Moisés la swaluy cha'pehch ton pajal soc te yantique, hahch ta sab, mo bahel ta wits Sinaí, hich te bin ut'il halbot yu'un Jehová, yich'oj mohel ta sc'ab te cha'pehch ton. 5Potsol cohel tal ta tocal te Jehová, tey c'oht sta sba soc a, soc la yal te sbihil te Jehová. 6Te Jehová c'ax bahel ta stojol Moisés soc hich la yal: ¡Jehová! ¡Jehová! te ay bayel sc'uxul yo'tan soc te ay yutsil yo'tan, ma orahuc ya x'ilin, mero muc' sc'uxul yo'tan soc stalel jun yo'tan, 7ay sc'uxul yo'tan ta stojol bayel ta mil, ya spas perdón yu'un te bin chopol, te toybahil, soc te mulile; pero ma ba ya yal te mayuc smul te mach'a ay smul, ha ya ya'be stoj smul te me'iltatiletic te yal-snich'nabic soc smamatac c'alal ta yoxcajal soc schancajal te sts'umbalique, xchi.

8Ha yu'un te Moisés ora nax la snijan sba c'alal ta lum soc la sch'uhuntay. 9Hich la yal: Cajwal, teme melel lec c'ohemon ta atojol, ac'a sjoquinotcotic bahel te Cajwaltique. Aunque tulan yo'tanic te pueblo ini, pasbotcotic perdón yu'un te jchopolilcotic soc te jmulcotic, soc ic'awotcotic te ha awu'un ya xc'ohotcotique, xchi.

Ma me sch'uhuntayic te diosetic ta Canaán

10Hich la yal te Jehová: Ilawil, ya jchap jc'op ta stojol spisil te pueblo awu'un; ya jpas jchahp a'teliletic te mayuc banti hich pasbil ta junuc nación ta swohlol bahlumilal. Spisil te ants-winiquetic te ayat ta yohlilic ya me yilbeyic te ya'tel te Jehová, como mero yan ta ilel a te bin ya xbaht jpas ta atojol.

11Pasa te bin ya calbat ta mandar yo'tic. Ya jtenticlan loq'uel ta atojolic te amorreo, cananeo, heteo, ferezeo, heveo soc te jebuseo. 12Tsahtaya aba te manchuc yac achap ac'op soc te mach'atic ya xnahinic tey ta q'uinal banti ya x'ochat, scuenta yu'un ma ha'uc ayacol ya xc'ohtic ta awohlil. 13Ya me ajinticlambeyic te scajtajib ta chiq'uel mahtaniletic yu'unic, ya me awuyticlambeyic te ch'ultesbil tonetic yu'unic, soc ya me ats'eticlambeyic te sloc'ombahic Asera.#34.13 Te lotil antsil dios yu'unic. 14Ma me xanijan aba ta stojol junuc yan dios, como te Jehová, te ha Xut'et te sbihile, ha Dios te xut'et yo'tan.

15Ha yu'un ma me xachap ac'op soc te mach'atic nahinemic tey ta q'uinal, como te c'alal ya yantsin sbahic c'ohem soc te diosetic yu'unic soc te ya ya'beyic milbil smahtan, ya yic'at, soc yac awe' te milbil mahtaniletic ac'bilic yu'unic, 16o yac awa'be yic' yihnamin te aquerem-nich'nab te yantsil-nich'nabic, soc te c'alal te yantsil-nich'nabic ya yac' sbahic ta antsinel c'ohem yu'un te diosetic yu'unic, ya me yaq'uic te ha nix ya yantsin sbahic c'ohem te aquerem-nich'anic soc te diosetic yu'unique.

17Ma me xapas diosetic ta uhltesbil taq'uin.

Oxeb q'uinetic yu'un jujun ha'bil

18Ya me apas te Q'uin yu'un Pan te ma ba yich'oj levadura. Huqueb c'ahc'al yac awe' pan te ma ba yich'oj levadura, hich te bin ut'il la jcalbat, ta sc'ahc'alel ta u Abib, como ha ta u Abib te loq'uex tal ta Egipto.

19Spisil te ba-alal ya x'ayin, ho'on cu'un, soc spisil te sba-quelmal awacax o atuminchij. 20Yan te sba-quelmal burro ya me ajeltay ta jcoht tut tuminchij; teme ma ba yac ajeltay, ya me awac'be snuc'. Ya me ajeltay spisil te aba-nich'anique. Soc ma me ayuc mach'a ya xtal ta jtojol te mayuc bin yich'oj ta sc'ab.

21Waqueb c'ahc'al ya x'a'tejat, yan te shuquebal c'ahc'al ya me acux awo'tan; aunque yorahil joc'-lum o yorahil c'ajoj, ya me acux awo'tan.

22Soc ya me apas te Q'uin yu'un te Semanahetic, ha te sba sit te trigo, soc te Q'uin yu'un C'ajoj te ay ta slajel te ha'bile.

23Oxeb buelta ta jujun ha'bil spisil te winiquetic awu'unic ya me stehc'an sbahic ta stojol Jehová, te Cajwaltic Dios yu'un Israel. 24Ya jten loq'uel ta atojol te nacionetic soc ya jmuc'ubtesbat te aq'uinale. Mayuc mach'a ya sbic'tal-o'tantaybat aq'uinal te c'alal ya xtal atehc'an aba oxeb buelta ta jujun ha'bil ta stojol Jehová te Dios awu'une.

25Ma me xawa'bon te sch'ich'el te milbil jmahtan soc te bin yich'oj levadura, soc ma me ayuc bin ya xhil yu'un pajel yu'un te milbil mahtanil yu'un te Q'uin Pascua.

26Te banti mero lec yu'un te sba sit te ya xloc' ta aq'uinal ya me awich' bahel ta sna Jehová te Dios awu'une.

Ma me xapay te alal tentsun ta ya'lel schu' te sme'e, xchi te Jehová.

Moisés soc te cha'pehch ton yu'un mandariletic

27Te Jehová la yalbe te Moisés: Ts'ihbaya te c'opetic ini, como ta scuenta te c'opetic ini la jchap jc'op ta atojol soc ta stojol Israel, xchi.

28Te Moisés la sjoquin te Jehová tey a cha'winic c'ahc'al soc cha'winic ahc'abal; ma ba la swe' pan soc ma ba la yuch' ha'. La sts'ihbay ta pehchel tonetic te c'opetic yu'un te chapbil-c'op, ha te lajuneb mandariletique.

29Te c'alal co tal ta wits Sinaí te Moisés soc yich'oj ta sc'ab te cha'pehch ton yu'un te Testigo-c'op, ma ba la sna' te Moisés teme ay sts'anabul te sit yelaw yu'un te la sjuc sba ta c'op te Diose. 30Te Aarón soc spisil te snich'nab Israel, c'alal la yilic ay sts'anabul te sit yelaw, la xi'ic te ya xnohpojic ta stojol. 31Ha yu'un te Moisés la yic'ticlan tal; hich te Aarón soc spisil te príncipaletic yu'un te pueblo suhtic talel ta stojol, hich c'oponotic yu'un te Moisés. 32Patil nohpojic tal spisil te snich'nab Israel, hich te Moisés la spasic ta mandar spisil te bintic halbot yu'un Jehová ta wits Sinaí.

33Te Moisés te c'alal laj yo'tan ta c'op, la smuc ta pac' te sit yelawe. 34Te c'alal ya x'och bahel te Moisés ta stojol Jehová yu'un ya xc'opoj soc, ya sloq'ues te pac' ha to c'alal ya xloc' talel. Te c'alal ya xloc' tal ya yalbe ya'iyic te snich'nab Israel te bin halbot ta mandar. 35Te snich'nab Israel c'alal ya yilic te sit yelaw Moisés, ya yilic te ay sts'anabul, hich ya scha'muc xan ta pac' te sit yelaw ha to c'alal ya xcha'och xan ta c'op soc te Diose.

Currently Selected:

Éxodo 34: TZH

Highlight

Copy