Efesios 1
1
Spatil-o'tanil
1Pablo, jpuc-c'opon yu'un te Jesucristo ta scuenta sc'anojel yo'tan Dios, ta stojol te mach'atic ayic ta Éfeso te ch'uhltesbilic soc te jun yo'tanic ta stojol Cristo Jesús: 2Ayuc me yutsil-o'tanil soc lamal q'uinal ta atojolic yu'un te Jtatic Dios soc yu'un te Cajwaltic Jesucristo.
Bendicionetic ta scuenta Cristo
3Bayeluc me yutsil sc'oblal Dios
te Stat te Cajwaltic Jesucristo,
te ha ta scuenta Cristo
ya'beyejotic spisil ta chahp bendicionetic
te ayic ta ch'ulchan.
4Ha la stsahotic ta scuenta Cristo
te c'alal ma to ayuc a te bahlumilal,
scuenta yu'un ch'ultesbil ya xc'ohotic
soc mayuc cabalquiltic ta stojol a.
5Ta scuenta te sc'uxul yo'tan
namey chapal yu'un
te ya yal-snich'aninotic ta scuenta te Jesucristo,
hich te bin ut'il la sc'an
te yutsil sc'anojel yo'tan,
6scuenta yu'un hich ya yich' halbeyel yutsil sc'oblal
te yutsil yo'tan te la sc'uxultayotic a
ta scuenta te Mach'a c'ux ta yo'tane.
7Ha ta scuenta te colotic ta libre
ta scuenta sch'ich'el,
te ay perdón yu'un mulil,
ha chican te sc'uhlejal te yutsil yo'tan
8te c'ax bayel la ya'botic
soc spisil p'ijil-o'tanil
soc bintic ay ta na'el.
9La ya'botic jna'tic te sc'anojel yo'tan
te ma ba hu' ta na'el,
yu'un hich la sc'an yo'tan,
te hich schapoj ta yo'tan ta scuenta Cristo,
10te ha ta scuenta Cristo ya stsob
spisil bintic ay ta ch'ulchan
soc spisil bintic ay ta bahlumilal
te c'alal ya sta yorahil te chapal yu'une.
11Ta scuenta Cristo ha nix hichotcotic
la yac' te ya x'ac'ot quich'cotic
bintic ay yu'un Dios,
te bin ut'il namey tsahbilotcotic
yu'un te mach'a ya yac' c'ohtuc ta pasel
spisil bin ya sc'an yo'tan stuquel,
12scuenta yu'un ya xhalbot yutsil sc'oblal
ta jcuentacotic, ho'otcotic
te nahil smuc'ulinej co'tancotic te Cristohe.
13Ha nix hichex
te c'alal la awa'iyic te smelelil c'op,
ha te lec yach'il c'op yu'un acolelic,
te c'alal la ach'uhunic la awich'ic asellohilic,
ha te Ch'ul Espíritu te halbil ya xtale.
14Te Ch'ul Espíritu ha seña te quich'ojtic
te ya yac' ta na'el te ya me x'a'botic quich'tic
te bin halbil yu'un Dios,
ha to c'alal ya sta yorahil ya xcol ta libre
te mach'atic yu'un Dios,
scuenta halbeyel yutsil sc'oblal.
Te Espíritu yu'un p'ijil-o'tanil soc te bin ac'bil ta na'el yu'un Dios
15Ha scuentahil ini, te c'alal la jca'iy te ay sch'uhunel awo'tanic ta stojol te Cajwaltic Jesús soc te c'ux ta awo'tanic spisil te mach'atic ch'uhltesbilic, 16ma ba ya jquehchan yalbeyel wocol Dios awu'unic, yac jna'belex te c'alal ya jc'opon te Diose. 17Ya jc'ambe te Dios yu'un te Cajwaltic Jesucristo, ha te Tatil yu'un utsilal, te yacuc ya'beyex espíritu yu'un p'ijil-o'tanil soc yu'un sna'el bin ac'bil ta na'el yu'un Dios, scuenta yu'un ya xhu' yac ana'beyic sba ta lec. 18Ya jc'ambe Dios te yacuc sjambeyex awo'tanic scuenta yu'un yac ana'ic bin a te yac amahlibelic te ha ic'bilex yu'une, soc yu'un yac ana'ic bin ut'il ay te yutsil sc'uhlejal te bin ya yich' hilel te Dios, ha te mach'atic ch'uhltesbilic, 19soc yu'un yac ana'ic te c'ax muc' te yu'el te ya x'a'tej ta jtojoltic ho'otic te jch'uhunejtique; ha nix te yu'el 20te a'tej ta stojol Cristo, te la scha'cuxajtes ta yohlil te mach'atic chamenic soc la yac' huhcajuc ta swa'el-c'ab Dios ta ch'ulchan, 21te ha toyol c'oht yu'un spisil ajwaliletic, te mach'atic ay ya'telic, te ay yu'elic soc jpasawetic ta mandar, soc ha toyol c'oht yu'un spisil bihililetic te ya yich'ic a'beyel, ma ha'uc nax ta ora ini, soc ta patil bahel. 22Dios la yac' ta ye'tal yoc te Cristo spisil bintic ay, soc ta scuenta te iglesia la yac' te ha jolal c'oht yu'un spisil bintic ay. 23Te iglesia ha sbaq'uetal Cristo, ha te ya sts'acay te Mach'a ts'acal ya snojes spisil.
Currently Selected:
Efesios 1: TZH
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.