2 Corintios 4
4
1Ha yu'un te bin ut'il quich'ojcotic te a'tel ini ta scuenta te sc'uxul yo'tan Dios, ma xpehc'aj co'tancotic. 2Ha hilix cu'uncotic te bin muquen ay ta pasel soc te bintic q'uexlaltic sba, ma ba ya ca'iycotic lo'loywanej soc ma ba ya jyanijtesbecotic sc'oblal te sc'op Dios. Yan bin ya jpascotic, te bin ut'il jamal ya cac'cotic ta ilel te bin smelelil, ta stojol Dios ya cac' jbahcotic ta na'el ta yo'tanic spisil ants-winiquetic. 3Pero teme macal to te lec yach'il c'op cu'uncotic, ha macal to ta stojol te mach'atic ch'ayel ya xbahtic; 4ha te mach'atic ma xch'uhunic, te macbibil spensaric yu'un te dios yu'un te bahlumilal ini, scuenta yu'un ma ba ya yilic te sacal q'uinal yu'un te lec yach'il c'op yu'un te yutsilal te Cristo, te ha slop'tayej sba a te Diose. 5Como ma ba ya jpucbe jc'oblalcotic, ha ya jpucbecotic sc'oblal te ha Ajwalil te Jesucristo, soc te ho'otcotic a'batotcotic awu'unic ta scuenta sc'uxul yo'tan Jesús. 6Como te Dios te la yal mandar te ac'a sacubuc q'uinal ta banti ay yihc'al q'uinal, ha nix la yac' tal sts'anabul ta co'tantic scuenta yu'un hich ya jna'tic a te yutsilal Dios ta sit yelaw te Jesucristo.
Te cuxajel ta scuenta sch'uhunel-o'tanil
7Pero quich'ojcotic te c'uhlejalil ini ta vaso pasbil ta ahch'al, scuenta yu'un ya xchicnaj te ha nix yu'un Dios te yutsil yu'el, te ma cu'uncoticuc. 8Bayel bin ay jwocolcotic yu'un, pero ma ba ya slajimbotcotic quipcotic; ma xna'baj bin ya jpascotic, pero ma ba ya xlaj yutsil co'tancotic yu'un; 9ayotcotic ta uts'inel, pero ma ba pihtesbilotcotic; lajelotcotic, pero ma ba jc'axel ya xlajotcotic. 10Spisil ora quich'ojcotic ta jbaq'uetalcotic te lajel yu'un te Jesús, scuenta yu'un ha nix hich ya xchicnaj ta jbaq'uetalcotic te scuxlejal te Jesús. 11Como ho'otcotic te cuxulotcotic, spisil ora ac'bilotcotic ta lajel ta scaj te Jesús, scuenta yu'un ha nix hich ya xchicnaj te scuxlejal Jesús ta jbaq'uetalcotic te ay ta scuenta lajel. 12Ha yu'un yac ta a'tel ta jtojolcotic te lajele, yan te ha'exe yac ta a'tel ta atojolic te cuxlejale.
13Te bin ut'il ay sch'uhunel co'tancotic pajal soc te bin ts'ihbabil: La jch'uhun, ha yu'un c'opojon, te xchihe, ha nix hich jch'uhunejcotic, ha yu'un ya xc'opojotcotic. 14Jna'ojcotic te mach'a la scha'cuxajtes tal te Cajwaltic Jesús, ha nix hich ya me scha'cuxajtesotcotic tal soc Jesús, soc pajalotic ya me stehc'anotic ta stojol. 15Ta spisil ini scuenta awutsil alequilic, scuenta yu'un te yutsil yo'tan Dios, te yac ta p'ohlel ta stojol tsobolic, ya me yac' te bayel ya yich' halbeyel wocol yu'un, ta scuenta yich'el ta muc' te Diose.
16Ha yu'un ma ba ya xlaj yip co'tantic; aunque behbe yac ta lajel yip te jbaq'uetaltic, jujun c'ahc'al behbe yich'bel yip te co'tantic, 17como te jteb nax jwocoltic ini te jc'axel nax ay, ha yac yac'belotic cutsilaltic te c'ax lec xan a soc te mayuc slajibal; 18ma ha'uc ya jt'ojan jsitic a te bintic chicanic ta ilel, ha ya jt'ojan jsitic a te bintic ma chicanuc ta ilele; como te bintic chicanic ta ilel, jc'axel nax ay, yan te bintic ma chicanuc ta ilele, sbahtel q'uinal ay stuquel.
Currently Selected:
2 Corintios 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.