1 Samuel 8
8
Israel la sc'anic ajwalil
1Te c'alal mamalub te Samuel la yotses ta juecetic ta stojol Israel te snich'nab. 2Te sba-nich'an, Joel sbihil, te schebal ha Abías; ha juecetic ta Beerseba. 3Pero te snich'nab ma ha'uc la st'unic te be yu'un te statique, la yihquitayic hilel scaj sbic'sitayel c'ulejalil; la yich'ic taq'uin soc la sbohlobtesic te stojil chahpanel. 4Ha yu'un spisil te mamaletic yu'un Israel la stsob sbahic tal ta Ramá ta stojol Samuel, 5hich c'oht yalbeyic: Mamalatix soc ma ba ya st'unic te be awu'un te anich'nabe; ha yu'un lehbotcotic jtuhl ajwalil te ya scuentahinotcotic, hich te bin ut'il spisil te nacionetique, xchihic.
6Pero ma lecuc la ya'iy te Samuel te hich halbot yu'unic: A'botcotic jtuhl ajwalil te ya scuentahinotcotic, te xchihique, ha yu'un la sc'opon te Jehová. 7Te Jehová hich la yalbe te Samuel: A'iya me awa'iy spisil bintic ya yalbat te pueblohe; como ma ha'ucat te ma sc'anat, ho'on me te ma sc'anonic te ya jcuentahinic. 8Hich ya spasbat te bin ut'il la spasbonic c'alal bin ora la jloq'uesic tal ta Egipto c'alal ora ini, ha te la yihquitayonic soc la yac' sbahic ta a'batinel yu'un yantic diosetic. 9Ha yu'un ich'beya ta cuenta te sc'opique; pero halbeya ya'iyic ta lec soc a'beya sna'ic te bin ya xpasbotic yu'un te ajwalil te ya xcuentahinotic yu'une, xchi.
10Hich te Samuel la yal spisil te c'opetic yu'un Jehová ta stojol te pueblo te la sc'anic ajwalil. 11Hich la yal: Hich me ya spasbeyex te ajwalil te ya scuentahinex: ya yic'beyex aquerem-nich'nabic, ha ya ya'be scuentahinic te carretahetic yu'un soc ha jmohel ta cawuhetic ya xc'ohtic, soc ahnimal ya xnahilijic bahel yu'un te scarretahe. 12Ya ya'be ya'telic ta jtsobawetic yu'un j'ohlil yoxbahc' (1,000) ta tuhl soc ta lajuneb yoxwinic (50) ta tuhl; soc ya ya'be ya'telic ta tuclum soc ta c'ajoj, ta a'tel ta spasel a'tejibaletic yu'un guerra soc te bintic ya xtuhun yu'un te carretahetic yu'une. 13Soc ya me yic'beyex awantsil-nich'nabic scuenta jpas-perfumehetic, jpas-we'eliletic soc jpas-panetic. 14Soc ya yu'untaybeyex te banti lequil q'uinal, te ts'usubiletic soc olivohetic awu'unic, yu'un ya ya'be te a'batetic yu'une. 15Ya yich'beyex jun ta slajunebal ta spisil te sit ats'unub-awawalic soc te ats'usubilic scuenta yu'un ya yac'ticlambe te mach'atic ay ya'telic soc te a'batetic yu'une. 16Ya yic'beyex te a'batetic, criadahetic awu'unic, te banti lequil queremetic awu'unic,#8.16 lequil queremetic awu'unic: hich ya yal ta hebreo; ta griego (LXX) ya yal: lequil wacaxetic soc te burrohetic awu'unic scuenta yu'un ya xpasbot ya'tel a. 17Soc ya yic'beyex te jun ta slajunebal ta spisil te tuminchijetic soc tentsunetic awu'unic, soc ya me smosohinex. 18Ta hich ora ya me xhahchex ta aw yu'un te ajwalil te yac atsahic, pero te Jehová ma ba ya sjac'beyex ac'opic, xchi.
19Pero te pueblo ma ba la sc'an la yich'ic ta cuenta te bin halbotic yu'un te Samuel, hich la yalbeyic: Ma'uc. Ya jc'ancotic ajwalil te ya scuentahinotcotic, 20hich pajal ya xc'ohotcotic soc spisil te nacionetique. Ya me scuentahinotcotic te ajwalil cu'uncotic, ha ya xnahilij ta yaq'uel guerrahetic cu'uncotic, xchihic.
21Te Samuel la ya'iybe spisil sc'op te pueblo, la yalbe ya'iy te Jehová. 22Te Jehová la yalbe te Samuel: A'iya me awa'iy te sc'opique, a'beya ajwalil yu'unic, xchi.
Ha yu'un te Samuel hich la yalbe te winiquetic yu'un Israel: Suhtanic bahel ta pueblohetic awu'unic, xchi.
Currently Selected:
1 Samuel 8: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
