1 Samuel 25

Cham Samuel

1Cham te Samuel. Spisil Israel la stsob sbahic yu'un ya yoq'uetayic; la smuquic ta sq'uinal ta Ramá. Patil te David co bahel ta jochol taquin q'uinal Parán.

David soc Abigail

2Ay jtuhl winic ta Maón te ay sq'uinal ta Carmel. Mero jc'ulej, ay lajunwinic swaxacbahc' (3,000) tuminchijetic soc lajunwinic yoxbahc' (1,000) tentsunetic yu'un. Yac ta sloq'uesbeyel stsotsel stuminchij ta Carmel. 3Nabal sbihil te winic soc Abigail sbihil te yihname. Mero p'ij yo'tan soc buen t'ujbil te antse, yan te winique tulan yo'tan soc chopol ya'tel. Ha sts'umbal te Caleb.

4Te c'alal ay ta jochol taquin q'uinal a te David, la ya'iy te yac ta sloq'uesbeyel stsotsel stuminchij. 5Ha yu'un te David la sticon bahel lajuntuhl jcolel winiquetic, hich la yalbe: Mohanic bahel ta Carmel ta banti ay te Nabal, patbeyahic yo'tan ta jcuenta. 6Hich me xawalbeyic: Lamaluc me q'uinal ta atojol soc ta stojol te mach'atic ay awu'un soc ta spisil te bintic ay awu'une. 7La jca'iy te ay jloq'uesej-stsotsel-tuminchijetic awu'un. C'alal la sjoquinotcotic te jcanan-tuminchijetic awu'une, ma ba la jcuts'incotic soc mayuc bin ch'ayem yu'unic te jayeb c'ahc'al ayic ta Carmel. 8Joc'obeya te a'batetic awu'un, hich me ya yalbat. Ha yu'un lecuc me sc'oblalic awu'un te jcolel winiquetic cu'un ini como talemotcotic ta yorahil q'uin. Awocoluc, a'beya te a'batetic awu'un soc te anich'an David biluc a te ay awu'un, xchi.

9Hich bahtic te jcolel winiquetic te ticombilic yu'un David, c'oht yalbeyic ya'iy te Nabal spisil te bintic halbotic yu'un te David; hich la smahliyic. 10Pero te Nabal hich la sjac'be sc'opic: ¿Mach'a a te David, mach'a a te snich'an Isaí? Yo'tic ayix bayel a'batetic te yacalic ta ahnel ta stojol te yajwalique. 11¿Ya bal c'an jtsac te pan, te ha' soc te ti'bal te la jchahpan yu'un ya ca'be te jloq'uesej-stsotsel-tuminchijetic cu'un, te ha ya ca'be te winiquetic te ma jna' banti talemic? xchi.

12Te jcolel winiquetic te ticombilic yu'un David suhtic bahel. C'alal c'ohtic ta stojol David la yalbeyic spisil te c'ope. 13Te David hich la yalbe te swinictac: Chuca ta ach'uhtic te espada awu'unic, xchi. Hich jujutuhl la schuc ta sch'uhtic te espada yu'unic, ha nix hich la spas te David. Ay wan jbahc' (400) ta tuhl winiquetic te la sjoquinic bahel te David, lajunwinic (200) ta tuhl hilic ta scanantayel te biluquetic yu'unique.

14Pero ay jtuhl a'bat te hich baht yalbe te Abigail te yihnam Nabal: Te David la sticon tal winiquetic c'alal ta jochol taquin q'uinal ta yalel patil-o'tanil ta stojol te cajwalcotic, pero chopol bin la sutbe bahel. 15Yan stuquelic buen lec yo'tanic ta jtojolcotic, mayuc la yuts'inotcotic soc mayuc bin ch'ayem cu'uncotic te jayeb c'ahc'al la joquincotic ta q'uinal. 16Ta c'ahc'al ahc'abal hich c'ohemic te bin ut'il ts'ahc ta jtojolcotic te jayeb ch'ahc'al la joquincotic ta scanantayel te tuminchijetique. 17Ha yu'un nopa awa'iy bin ya sc'an yac apas, como chapalix te ay bin chopol ya xc'oht ta stojol te cajwalcotic soc spisil te mach'atic ay yu'une. Como mero chopol winic, mayuc mach'a ya xhu' ya sc'opon, xchi.

18Ha yu'un te Abigail ora la yich' bahel lajunwinic (200) ta pehch pan, cheb yawil vino, ho'coht wohbil tuminchij, ho'p'is#25.18 37 litros ch'ilbil trigo, ho'winic (100) ta pehch taquijtesbil ts'usub soc lajunwinic (200) ta pehch taquijtesbil higo, la ya'be scuch bahel burrohetic. 19Hich la yalbe te a'batetic yu'un: Nahilijanic bahel, patil ya xtalon, xchi. Mayuc bin la yalbe te Nabal te smamalale. 20Cajal ta burro a muquen co bahel ta wits, yac ta talel a te David soc te winiquetic yu'un, baht sta sba soc.

21Hich yalojix te David: Tojol la jcanantaybe spisil te bintic ay yu'un ta jochol taquin q'uinal scuenta yu'un mayuc bin ch'ay te bintic ay yu'un. La suhtbon ta bin chopol te bin leque. 22Dios hich ac'a spasbe te scontratac David,#25.22 te scontratac David, hich ya yal ta hebreo, ta griego (LXX) ya yal: hich ac'a spasbe te David soc c'ax to xan hich a, teme ta sab pajel cuxul ya xhil cu'un jtuhluc te mach'a ay yu'un, xchi.

23Te Abigail c'alal la yil te David, ora co ta sburro, la spahcan sba c'alal ta lum ta stojol te David. 24La spahcan sba ta ye'tal yoc, hich la yal: Cajwal, ho'on ac'a c'ohtuc ta jcuenta te mulile. Awocoluc, ac'a sc'oponat te a'bat awu'un, a'iybeya awa'iy te sc'op te ya yalbate. 25Ma xawich' ta cuenta te chopol winic Nabal; como hich ay stalel te bin ut'il c'ohem te sbihile. Ha Nabal#25.25 Nabal: sonso, xchi ta hebreo. te sbihile, mayuc snopojibal yu'un. Te ho'on te a'baton awu'un, ma ba la jquil te winiquetic te ticombilic awu'une. 26Yo'tic, cajwal, ¡yiloj Jehová, soc cuxulat! te Jehová la scomat ta smalel ch'ich' soc ma ba la ya'bat te yac apac ac'abal. Hich me ac'a c'ohtuc te bin ut'il Nabal te acontratac soc spisil mach'atic ya sle bin chopol ta stojol te cajwal. 27Te mahtanil te la yich' tal te a'bat awu'un ac'a yich'ic te winiquetic te ya sjoquinic te cajwal. 28Awocoluc pasbeya perdón te a'bat awu'un te bin chopol ini. Jehová ya me ya'be yip te sna te cajwal, yu'un yacat ta spasel te guerra yu'un Jehová, soc ma me ayuc bin chopol ya stahat te jayeb c'ahc'al cuxulat. 29Aunque ay mach'a ya snutsat yu'un ya sc'an ya smilat, te scuxlejal te cajwal jun ya xc'oht soc te mach'atic cuxulic ta stojol Jehová te Dios awu'une; soc ya me sch'oj bahel te scuxlejal te acontratac hich te bin ut'il ton ta jihmuch'il. 30Te c'alal ya xc'oht ta pasel yu'un Jehová spisil te bin lec yaloj ta atojol, soc te c'alal ya yac'at ta jtsobaw yu'un Israel, 31hich mayuc bin ya yac amel awo'tan yu'un, cajwal, soc ma ba ya xc'opoj awo'tan yu'un te tojol la amal ch'ich' o te ha'at nix la apac ac'abal. Te c'alal Jehová la ya'beyix te bin lec ta stojol te cajwal, na'awon a te a'baton awu'un, xchi.

32Te David hich la yalbe te Abigail: Bayel me yutsil te Jehová te Dios yu'un Israel te la sticonat tal atahbelon ta be yo'tic. 33Bayeluc me yutsil te bin anopoj soc bayeluc me awutsil te ha'ate, yu'un la acomon te ma ba ya jmal ch'ich' yo'tic soc te ma ba ya jpac-c'abal. 34Como ¡yiloj Jehová, te Dios yu'un Israel! te la scomon te mayuc bin chopol la jpasbat, te manchuc la asuj tal aba atahbelon, pajel mayuc cuxulix jtuhluc winic yu'un Nabal te hichuque, xchi.

35Te David la stsacbe te bin ich'bot tal yu'un, soc hich la yalbe: Jun awo'tan suhtan bahel ta ana. La jca'iybatix ac'op soc la jquich'bat ta cuenta te bin la ac'ambon, xchi.

36Te Abigail c'alal suht bahel ta stojol Nabal, yac ta pas-q'uin ta sna a hich te bin ut'il ajwalil. Tse'el yo'tan te Nabal soc buen yuch'oj, ha yu'un mayuc bin la yalbe ha to ta schebal c'ahc'al. 37C'alal sacub q'uinal, te cuxix yo'tan ta yacubel a te Nabal, halbot ya'iy yu'un te yihnam spisil te bin c'oht ta pasel; tup' yic' yu'un te Nabal, cham schihal yoc sc'ab. 38Lajuneb c'ahc'al ta patil, te Jehová la yehchentes te Nabal, hich cham.

39C'alal la ya'iy te David te chamix te Nabal, hich la yal: Bayel yutsil te Jehová te la spacbon jc'abal yu'un te la yac'on ta q'uexlal te Nabal, soc la scom te ya'bat ta spasel te bin chopole. Te Jehová la yac' c'ohtuc ta stojol Nabal te schopolile, xchi.

Patil te David la sticon ta halbeyel te Abigail te ya sc'an ya yic' yihnamin. 40Te a'batetic yu'un David talic ta stojol te Abigail ta Carmel, hich la yalbeyic: Te David la sticonotcotic tal ta atojol yu'un ya yic' yihnaminat, xchihic.

41Hahch te Abigail, la snijan sba ta lum, hich la yal: Li' ay te a'bat awu'un te ya spocbe yoc te a'batetic yu'un te cajwal, xchi. 42Ora hahch te Abigail, mo ta burro, baht soc ho'eb ach'ix-criadahetic yu'un, la st'un bahel te a'batetic yu'un David, hich yihnam c'oht.

43Te David ha nix hich la yic' yihnamin te Ahinoam te talem ta Jezreel, hich schebal la yic' yihnamin. 44Como te Saúl ya'beyej yic' te yantsil-nich'an Mical, ha te yihnam David ta nahil to, te Palti snich'an Lais te talem ta Galim.

Currently Selected:

1 Samuel 25: TZH

Highlight

Copy