1 Samuel 10

1Hich te Samuel la stsac jun yawil aceite, la smalbe ta sjol te Saúl, la yuhts'uy, soc hich la yalbe: Te Jehová la smalbat aceite scuenta jtsobaw ya xc'ohat yu'un te pueblo Israel yu'une.#10.1 Hich ya yal ta hebreo; ta griego (LXX) ya yal xan: ...te pueblo Israel yu'une. Ha'at me yac acuentahin te pueblo yu'un Jehová soc ya me acoltayic ta sc'ab te scontra te ay ta sjoyobalic. Hich yac ana' te bin ut'il te Jehová la stsahat scuenta príncipalat ya xc'ohat yu'un te mach'atic ay yu'une: 2Yo'tic te c'alal ya xloc'at bahel ta jtojol, ya me ata cheb winiquetic nopol ta smuquenal Raquel te ay ta Selsa, ta sq'uinal Benjamín, hich me ya yalbat: Chicnajix te burrahetic yac alehbel; mayuquix sc'oblal ta yo'tan atat, yaquix ta mel-o'tan ta acuentahic, hich ya yal te atate: ¿Bin ya jpas yu'un te jnich'ane? xchihic. 3Ya xbehenat xan bahel, te c'alal ya xc'ohat ta jihte' yu'un Tabor, ya me xtal stahat oxeb winiquetic te yacalic ta mohel bahel ta Bet-el ta stojol Dios, te jtuhle yic'oj oxeb tentsunetic, te yane yich'oj oxeb pan, te yoxebal yich'oj yawil vino. 4Ya spatbat awo'tan soc ya ya'bat cheb pan, te yac atsacbeye. 5Patil ya xc'ohat ta Gabaa yu'un Dios ta banti ya xnahinic jchahp soldadohetic yu'un te filisteohetique. Te c'alal ya x'ochat ta pueblo, ya me ata aba soc jchahp jalwanejetic te yaquic ta cohel tal ta toyol awilal, nahilijem bahel yu'unic te salterio, pandero, flauta soc arpa, soc yaquic ta aw ta sc'op-jalwanej. 6Hich te espíritu yu'un Jehová ya me yu'untayat soc yu'el, hich yac ajoquinlan ta aw ta sc'op-jalwanej, soc ya xc'atp'ujat ta yan winic c'ohem. 7Te c'alal c'ohemix ta pasel ta atojol a te señahiletic ini, pasa te bin ya sc'an awo'tan, yu'un sjoquinejat te Diose. 8Patil ya me xnahilijat cohel cu'un ta Gilgal; ya xtal joquinat ta yaq'uel scohtol chic'bil mahtaniletic soc milbil mahtaniletic scuenta lamal q'uinal. Mahliyawon huqueb c'ahc'al ha to teme ya xc'ohon ta atojol soc ya ca'bat ana' te bin ya sc'an yac apas, xchi.

9Te c'alal la sut loq'uel sba te Saúl yu'un ya xloc' bahel ta stojol Samuel, jelbot yo'tan yu'un Dios te Saúl; c'oht ta pasel spisil te señahiletic ta hich ora. 10C'alal c'ohtic ta Gabaa, tahot yu'un te jchahp jalwanejetic. Te espíritu yu'un Dios hul ta stojol soc yu'el, te Saúl la sjoquin ta aw ta sc'op-jalwanej. 11Spisil te mach'atic ya sna'beyic sba, te c'alal la yilic te pajal yac ta aw ta sc'op-jalwanej soc te jalwanejetique, hich la yalbe sbahic: ¿Bin la spas te snich'an Cis? ¿Ha balix jalwanej ec te Saúl? xchihic.

12Ay mach'a hich la yal: ¿Mach'a a te tatil yu'unic? xchi. Ha scuentahil te chicnaj te bin ay ta halel: ¿Ha balix jalwanej ec te Saúl? te xchihe.

13C'alal laj yo'tan ta aw ta sc'op-jalwanej te Saúl, c'oht ta toyol awilal.#10.13 O: baht ta sna. 14Jtuhl stajun te Saúl la sjoc'obe soc te ya'bat: ¿Banti c'ohex? xchi.

C'ohotcotic ta slehel te burrahetic. Te c'alal la jquilcotic te ma ba chican, baht quilcotic te Samuel, xchi te Saúl.

15La yal te stajun Saúl: Awocoluc, halbon ca'iy bin la yalbeyex te Samuel, xchi.

16Te Saúl la sjac'be sc'op te stajun: Jamal la yalbotcotic te tahotix te burrahetique, xchi. Pero ma ba la yalbe stuquel te halbot yu'un Samuel te ya x'och ta ajwalil.

17Patil te Samuel la stsob te pueblo ta stojol Jehová ta Mizpa. 18Hich la yalbe te snich'nab Israel: Hich la yal te Jehová, te Dios yu'un Israel: Ho'on la jloq'ues tal ta Egipto te Israel, soc la jcoltayex loq'uel ta sc'ab te egipciohetic soc ta sc'ab spisil yantic ajwaliletic te la yuts'inex, xchi. 19Pero yo'tic mayuquix sc'oblal ta awo'tanic te Dios awu'unic, te ya scoltayex te c'alal ayex ta wocol soc ta mel-o'tan. Soc la awalic: Ma'uc, ya me awa'botcotic ajwalil, xchihex. Ha yu'un, yo'tic tehc'ana abahic ta stojol Jehová ta jujuchahp ats'umbalic soc ta jujuchahp te mach'atic ay awu'unic, xchi te Samuel.

20Te Samuel la yac' nohpojuc tal spisil ta chahp te sts'umbal Israel, ha tsahbil c'oht te sts'umbal Benjamín. 21La yac' nohpojuc tal te sts'umbal Benjamín ta scuenta jujuchahp na, ha tsahbil c'oht schahpal te mach'atic ay yu'un te Matri; tey tsahot loq'uel a te Saúl snich'an Cis. La slehic, pero ma ba la stahic. 22Ha yu'un la sjoc'obeyic xan te Jehová teme ma to ba talem te winique. La yal te Jehová: Li' ayi, snac'oj sba ta yohlil te biluquetic, xchi. 23Ha yu'un ahnimal baht yiq'uic tal ta banti snac'oj sba. Te c'alal la stehc'an sba ta yohlil te pueblo, ha toyol mohel snehquel c'ax hich snahtil a te bin ut'il spisil te yantique. 24Hich la yal te Samuel ta stojol spisil te pueblo: ¿La bal awilic te mach'a tsahbil yu'un Jehová? Mayuc mach'a pajal soc ta spisil te pueblo, xchi. Ha yu'un hahchic ta aw spisil te pueblo: ¡Viva ajwalil! xchihic.

25Te Samuel la yalbe ya'iyic te leyetic ya xtuhun yu'un te ajwalil, la sts'ihbay ta hun soc la sq'uej ta stojol Jehová. Patil te Samuel la sticonlan bahel ta snahic spisil te pueblo. 26Ha nix hich te Saúl baht ta sna ta Gabaa, soc joquinot bahel yu'un winiquetic te ay yip yo'tanic te tijbot yo'tanic yu'un te Diose. 27Pero ay mach'atic te chopol yo'tanic, te hich la yalic: ¿Bin ut'il ya xhu' ya scoltayotic te winic ini? xchihic. Mayuc sc'oblal c'oht ta yo'tanic soc ma ba la yich'beyic tal smahtan. Pero mayuc bin la yal yu'un te Saúl.

Currently Selected:

1 Samuel 10: TZH

Highlight

Copy