1 Corintios 10
10
Ya'beyel sna'ic te ma lecuc sch'uhunel loc'ombahetic
1Quermanotac, ya jc'an te yac ana'ic te spisil te jme'jtatic axintesotic ta tocal soc c'axic ta Mar; 2spisilic jun c'ohtic soc Moisés ta scuenta ich'-ha' ta tocal soc ta mar, 3soc spisilic pajal la swe'ic te we'elil scuenta espíritu 4soc pajal la yuch'ic te ha' scuenta espíritu; como la yuch'be ya'lel te muc'ul ton scuenta espíritu te joquimbilic yu'une. Te muc'ul ton ha te Cristo. 5Pero ay tsobolic te ma lecuc yo'tan Dios yu'unic, ha scuentahil tey chamic hilel ta jochol taquin q'uinal a.
6Scuenta quich'o-q'uehltic te hich c'oht ta pasel, scuenta yu'un ma ba ya xbic'taj co'tantic yu'un bintic chopol, hich te bin ut'il bic'taj yo'tanic stuquel. 7Ma me xach'uhunic loc'ombahetic, hich te bin ut'il ay la spasic stuquelic; hich te bin ut'il ts'ihbabil: Te pueblo la shuhcan sbahic ta we'el uch'el, patil hahch spasic q'uin, te xchihe. 8Soc ma me xca'iytic antsiwej, hich te bin ut'il ay la spasic stuquelic, te ta junax c'ahc'al lajic cha'pic soc swaxaclajunbahc' (23,000) yu'un. 9Soc ma me jtsajtic te Cajwaltic, hich te bin ut'il ay la stsajic stuquelic, hich lajic ta ti'el ta chan. 10Soc ma me xawa'iyic wulwul-c'op, hich te bin ut'il ay la ya'iyic wulwul-c'op stuquelic, hich lajinotic yu'un te jlajinwaneje.
11Hich c'oht ta pasel scuenta ich'o-q'uehl, soc hich ts'ihbabil hilel yu'un ya stsitsotic ho'otic te la stahotic te slajibal c'ahc'ale. 12Ha yu'un te mach'a ya scuy te ay yip ta tec'lej, ac'a stsahtay sba te ma ba ya xyahle. 13Mayuc c'ohem ta acuentahic sujel ta mulil te ma hichuc ya xc'oht ta scuenta spisil ants-winiquetic; pero stalel jun yo'tan ta jtojoltic te Diose, ma ba ya yac' te yac awich'ic tsajel te ma xcuhch awu'unic, ha pajal ya yac' soc te tsajel te bin ut'il ya xhu' ya xloq'uex ta stojol te tsajel, scuenta yu'un ya xcuhch awu'unic a.
14Ha yu'un, ha'ex te c'uxex ta co'tan, ahnanic loq'uel ta stojol sch'uhunel loc'ombahetic. 15Hich ya jc'oponex te bin ut'il ha'ex yac ana'ic q'uinal; nopa awa'iyic teme lec o teme ma lecuc te bin ya calbeyexe. 16Te copa yu'un bendición te ya calbe wocol Dios yu'un, c'alal ya cuch'tic ¿ma bal ha'uc jun co'tan ya xc'ohotic soc a te sch'ich'el Cristo? Soc te pan ya jxet'tic, ¿ma bal ha'uc jun co'tan ya xc'ohotic soc a te sbaq'uetal Cristo? 17Te bin ut'il junax te pan, ha nix hichotic te bin ut'il tsobolotic, junax baq'uet ayotic, como junax pan ya jwe'tic jpisiltic.
18Ilawil te Israel ta scuenta ch'ich'-baq'uet: Te mach'atic ya swe'ic te milbil mahtaniletic, ¿ma bal ha'uc jun yo'tan ya xc'ohtic soc a te scajtajib ta chiq'uel mahtanil? 19¿Bin ya cal yu'un? ¿Ha bal ay sc'oblal te loc'omba o ha ay sc'oblal te milbil mahtanil ac'bil ta stojol te loc'ombahetique? 20Ma'uc, pero te c'alal ya yaq'uic te milbil mahtaniletic te jyanlumetic, ha ya ya'beyic te pucujetic, ma ha'uc ya ya'beyic te Diose. Ma jc'an te jun awo'tanic ya xc'ohex soc te pucujetique. 21Ma xhu' yac awuch' te copa yu'un Cajwaltic soc te copa yu'un te pucujetique; ma xhu' ya xwe'at ta smesa te Cajwaltic soc ta smesa te pucujetique. 22¿Ya bal sc'an te ya cac'tic chicnajuc te xut'et yo'tan te Cajwaltique? ¿Yu'un bal c'ax bayel xan quiptic a te bin ut'il ay stuquele?
Pasahic spisil scuenta yich'el ta muc' Dios
23Libre ayon ta spasel spisil, pero ma spisiluc lec. Libre ayon ta spasel spisil, pero ma spisiluc ya xlecubteswan. 24Ma me ayuc mach'a te stuquel nax ya sle yutsil slequil, ac'a slehbe yutsil slequil te yantique.
25Te bintic ya xchonot ta banti ya yich' chonel ti'bal, we'an me, ma xajoc'oy, scuenta yu'un ma x'ochat na'etel yu'un, 26como ha yu'un Cajwaltic te bahlumilal soc spisil bintic ay tey a.
27Teme ay ya yiq'uex ta we'el te mach'a ma ba sch'uhunej Dios, teme yac ac'an ya xbahex, we'anic spisil bintic ya xpahchambotex, ma me xajoc'oyic scuenta yu'un ma ba ya x'ochat na'etel yu'un. 28Yan teme ay mach'a ya yalbeyex: Ha ini a'bot scuenta milbil mahtanil yu'un te loc'ombahetic, teme xchihe, ma me xawe'ic ta scaj te mach'a hich la yal soc scuenta yu'un ma ba ya x'och na'etel yu'un, como ha yu'un Cajwaltic te bahlumilal soc spisil bintic ay tey a. 29Ha ya cal te na'etel yu'un te yane, ma ha'uc te na'etel awu'une. ¿Bin yu'un ya quich' ich'el ta c'op ta scaj te na'etel yu'un te yane, te bin ut'il libre ayon te ho'one? 30Teme ya calbe wocol Dios yu'un te bin ya jwe', ¿bin yu'un te ya quich' bohlc'optayel yu'un te bin la jcalbe wocol Dios yu'une?
31Ha yu'un teme ya xwe'ex o ya x'uch'ex o biluc yac apasic, pasahic spisil ta scuenta yich'el ta muc' te Diose. 32Ma me ha'uc sc'ohchinojibal ya xc'ohex yu'un te judíohetic, jyanlumetic o te iglesia yu'un Dios. 33Ha nix hichon, ta spisil ya jle bin ut'il lec yo'tanic yu'un spisil bintic ya jpas, ma jtuqueluc ya jle cutsil jlequil, ha ya jlehbe yutsil slequil tsobol yantic, scuenta yu'un hich ya xcolic a.
Currently Selected:
1 Corintios 10: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
