مارکوس 4

جینگبادپے ساون تابسکھانّی رومس۔

1یانگسکیار حضرت عیسیٰ مسیح گلِیلی تشوے تھاما لابجا سالچیس گوزوگ زادس۔ کھونگ یودسا میتشوگس مانگستیانگ مانگپو دزومپا کھونگ ٹُھوزینگی نانّگا ژونتے ژوگس، یانگ میتشانگما تشوے تھاما دُوگس۔ 2کھونگی میگونلا رومس گیُودتے لابجا مانگپو سالّا زادتے مولس، 3”نیونشیگ، جینگبادپاجیگ ساون تابّالا سونگ۔ 4جینّگا ساون تاب زانے کھاچیگ لامیکا بُود، چیپا یونگستے تیگون زوس۔ 5کھاچیگ سا مانگپو میدسے ڈاگیکا بُود، سا مانگپو میدچیسپوے ساونبو گیوگسپا سکییس۔ 6اِین نانگ نییمے تشادّی جاستے، جینگ سکییکھانبو تشیگ، یانگ پاٹاگ تینگچان مید پاسانگ، تیبو سکامستے شی۔ 7ساون کھاچیگ تشیرمانگی ٹوا بُود، یانگ تشیرمانگ سکیستے نانپا، جینگبو لدان ماتھوب، تیبوے جاستے ٹو ماسمینس۔ 8جان ساون گُون سا گیالّا یودسے ژینگیکا بودپا، تیگون سکیستے لدانتے ستونتھوگس سمین، کا بو ساون تابسکھان نی 30 60 ماتشاد 100 گیورّانگ یودپین۔“ 9تینے کھونگی مولس، ”نامچھوگ یودکھانگونّی نگے زیرکھانلا نیونشیگ۔“

10ستینگنے حضرت عیسیٰ سی چیگپو یود زانے، کھونّگا سکورتے یودکھانّی کھونگی لوبٹوگس چوگنییس تانگ جانگونّی کھونگی شادّا زادکھانّی رومسّی تونتاگپو ٹیس۔

11کھونگی لانسالّا زادس، ”خُدے گیالثیدّی سانگواگون ہاگوچیسّی سکابس کھیوجاگونلا سالّا زادتے اینوگ۔ اِین نانگ خُدے گیالثیدّی پھیلوگا یودکھانگونلا نگے، چیتشانگما رومس گیُودتے شادّاد۔ 12ہلژخمہ شوقبُو بوے نانّگا ڈیسکھانبو ڈانڈا ڈوبچیسلا نگے تیبو چواد۔ تیبو نی،

’کھونگونی نگے چوکھانگون تھونگنانگ نگا سو اینکھانبو نگوشیسّا میدوگ۔

کھونگونی نگے شادکھانگون تشورنانگ ہاگو تھوبّا میدوگ،

تے مانے کھونگونی سیمس نگے چھوگسلا گیورتے

کھونگی دِیگپاگونلا مُعافی تھوبتے یودڈو‘۔“ #4‏:12 حضرت یسعیاہ شوقبُوئ 6‏۔ 9

13تینے حضرت عیسیٰ سی کھونگونلا مولس، ”کالتیس کھیوجاگونلا ای رومسپوے تونتاگپو ہاماگونا، تینے جانیانگ رومس تشانگمے توگتاگّون کازوگی ہاگواین؟ 14جینگبادپے ساون تابچیسپو نی، خُدے حُکم شادچیسپو اینوگ۔ 15لامیکا ساون بودکھانگون نی خُدے حُکم تشورکھانگون اینوگ، اِین نانگ شیطان یونگستے کھونگونی سنینگی نانّگا تابسکھانبو کوگستے کھیرّانوگ۔ 16ڈاگیکا ساون بودکھانبو نی خُدے گیالثیدّی کا تشورّاچیگ تھادپو نیامپو ایمان چوکھانگون اینوگ۔ 17اِین نانگ تیبوا پاٹاگ تینگچان مید پاسانگ توسیونرینگ میلوس۔ کھونگونی کے نانّگا ایمان چوچیسپوے ناگس تانگ باردو تھونّگاچیگ ایمان پھانگین۔ 18تشیرمانگسّی ٹوا ساون بودکھانبو نی خُدے حُکم تشورکھانگون اینوگ، 19اِین نانگ میتشیے تشیرکھا یانگ نور تانگ دُنیائی جان دودپا گُونی نانچیسپوے تیبوا ڈاسبو سمینّا مانوگ۔ 20سا زانگپویکا ساون بودکھانبو نی خُدے حُکم نیانتے ایمان چوکھانگون اینوگ، کھونگونلا ڈاسبو، ساون تابسکھانبوے 30 60 یانگ 100 گیور سمینّانوگ۔“

اودّی رومس۔

21تینے حضرت عیسیٰ مسیح کھونگونلا ٹیا زادس، ”چی کھیوجے اوت توگستے گورمو یا مالتسے یوگا بورینّا؟ اوت پو ود ستاگس سیکا میبورّا؟ 22واستے بورکھان تشانگما جاگشیگ سنگون چوگّا زادِین، یانگ کابستے بورکھان تشانگما پھیلوگا پھینّگا زادِین۔ 23کالتیس نامچھوگ یودنا نگے زیرکھانلا نیونشیگ۔“

24کھونگی مولس، ”کھیوجے تشورکھانگونلا نانگستاگ گیالّا تونگشیگ۔ کھیوجے کولکھانّی تشادپو کھیوجاگونّی پھیانگ کولّا زادِین، یانگ تیسانگ مانّگا سالین۔ 25نگے لابجا نیانکھانگونلا مانّگا ہاگوچوگّا زادِین، اِین نانگ مانیانکھانگونّی نانگنے ہاگوتے یودکھانبوانگ کھیرّا زادِین۔“

ساون لداناین یودکھانّی رومس۔

26حضرت عیسیٰ مسیح ایبوانگ مولس، ”خُدے گیالثید نی، ساون جینّگا یوگکھانّی جینگبادپاجیگ ژوگس اینوگ۔ 27کھو نیید تانگستے یا لانگستے یودڈو، تشاننین میدپا ساونبو سکیستے لدانّانوگ، اِین نانگ تیبو کازوگی لدانّاد، کھوا چانگ گیُوس میدکیاگ۔ 28سا کھورانگی ساون سکیچوگستے جینگ لدانتے سنییمے گو بینگتے ٹوے گانگچوگّانوگ۔ 29ٹو تشوسّاچیگ، جینگبادپابو یونگستے زورا نیامپو تیبو رنگانوگ چیازیرنا، رنگابسے توسپو لیبستے اینوگ۔“

نیونگسکارّی ساونّی رومس۔

30حضرت عیسیٰ مسیح مولس، ”خُدے گیالثیدپو نگے کھیوجا کازوگی ہاگوچوگ؟ تیبو ہاگوچوگچیسّی پھیا نگے کا رومسپو کول؟ 31تیبو نی، نیونگسکارّی ساون تشانگمیسانگ چھونگون سے نانّگا تابسکھانبو ژوگس اینوگ۔ 32اِین نانگ ، تابّاچیگ لدانتے تشاسّی نانّگا تشانگمیسانگ چھینمو لچانگما گیورین، یانگ یالگاگون ایزام چھینمو چھین نامکھے چاگونّی تیبوے سیلّی نانّگا تشانگس چوین۔“

33حضرت عیسیٰ سی تینّا تسوگسّی رومس مانگپو کولتے میگونّی ہاگوچیسّی کھیود تشوگپا خُدے حُکم شادّا زادس۔ 34کھونگی رومس گیُودتے ماستوگس چی لابجاجیگّانگ سالّا میدپین، اِین نانگ کھونگ کھونگرانگی لوبٹوگسگون نیامپو چیگپو یود زانے، کھونگی رومس تشانگمے تونبو ہاگوچوگّا زادّادپین۔

حضرت عیسیٰ سی لونگراگ تانگ چھولباگ میدکھان زادس۔

35پھیتوگ لیبّاچیگ، حضرت عیسیٰ مسیح کھونگرانگی لوبٹوگس گونلا مولس، ”نگاتانگ تشوے پھارکا چھین۔“ 36میتشوگسپو بورتے کھونگون حضرت عیسیٰ سی نیامپو ٹُھوزینگی نانّگا ژونتے سونگ۔ جان ٹُھوزینگّونّانگ کھونگی گیابنے یونگس۔ 37ہونمیدلا نامتشوبستے لونگراگ ٹاگپو یونگس، یانگ چھولباگ ٹُھوزینگی نانّگا لیبستے تیبو نوبچیس سونگ۔

38حضرت عیسیٰ سی ٹُھوزینگی جوگا نیاسّیکا او بورتے نالزیمستے یودپین۔ لوبٹوگسگونّی کھونّگا نیدتشادّا زادتے زیرس، ”لوبپونلے، نگاجا چھوی نانّگا نوبچیس دوگ، سکیوبّا زادّا میدّا؟“

39حضرت عیسیٰ سی جانگستے لونگسپوا کھاسکییستے چھولباگّونلا مولس، ”چوبچود، کُوچو ماتانگ۔“ تینے لونگراگ میدکھان سونگتے تشوے نانّگا پاد جیدے چونگ۔ 40کھونگی کھونگونلا ٹیا زادس، ”چیا جیگسّاد؟ کھیوجاگونلا نگیکا تارُوانگ ایمان میدپا اینّا؟“

41لوبٹوگسگون ثانٹے جیگستے چیگ تانگ چیگّا ٹیس، ”کھونگ سو اینوگ؟ لونگسپو تانگ چھولباگ گونّیانگ کھونگی کھا نیاندوگ۔“

Currently Selected:

مارکوس 4: LBJNT

Highlight

Copy