مادتھا 27

حضرت عیسیٰ سی پیلاطُسی کا کھیرس۔

1نگاتوگ نگامونے، اِمام کُنی چھونمو تشانگما تانگ یہُودی پے اُسکیونگونی حضرت عیسیٰ مسیح سادگوس زیرتے تھاگچادس۔ 2کھونگونی کھونگی چھاگ لدامستے کالون پیلاطُسی لاگا ستادا کھیرس۔

یودے کھورانگ سادس۔

3نگولوگ چوکھانّی یودے حضرت عیسیٰ مسیح شیچیسّی چھادپا پھوگّا تھونگتے کھوے چوکھانبویکا تشیرکھا یونگستے یانگ مولّی پینے سومچوبو اِمام کُنی چھونمو گونتانگ یہُوداؔہ پے اُسکیونگونلا لوگستے کھیرس، 4یانگ کھوے زیرس، ”نگے نونگسمیدکھانجیکّا نگولوگ چوستے دِیگپا چوستوگ۔“

کھونگونی زیرس، ”نگاجے چیا تشیرکھا چوین۔ تیبوا تشیرکھا کھورانگی چوس“

5تینے یودے بیت المقدِس سی نانّگا مولّی پینیگون پھانگس یانگ پھیلوگا سونگتے اوگسکییلّیگا ژوگس۔

6اِمام کُنی چھونمو گونی مولّی پینے گون توستے زیرس، ”ای پینے گون می سادچیسلا شالپا، بیت المقدِس سی بانگدزودّی نانّگا بورچیسپو شریعت نانگجین گالتے اینوگ“ 7کھونگونی تے پینیبوا دزاما چوکھانّی جینگبو نیوستے ژانیولّی میگون شینا سوبچیسّی پھیا ناسّا چوچیسلا تھاگچادس۔ 8تینّا گیونتشانبوے پھیا داگسانگ تے جینگبوا ٹھاق ّی جینگ زیرّانوگ۔ 9سنگونمے پیغمبر حضرت یرمیاہ مولکھانبو ڈانڈا ڈوبتے اینوگ، کھونگی مولس،

”بنی اِسرائیل پاگونّی سروک رین چادکھانّی

مولّی پینے سومچو کھورتے

10دزاما چوکھانّی جینگبو نیوس۔

کازوگ مسیح خُدے نگا کا سالّا زادس۔“

پیلاطُسی حضرت عیسیٰ سی ٹیوا ٹیس۔

11حضرت عیسیٰ مسیح کالون پیلاطُسی لدُونلا جانگستے یودتوس کھوے کھونّگا ٹیس، ” کھیرانگ یہُودی پے گیالپو اینّا؟“

حضرت عیسیٰ سی سی لانسالس، ” دونا نیرانگی زیرد۔“

12اِمام کُنی چھونمو گون تانگ یہُودی پے اُسکیونگونی کھونّگا نیاد کال زانے کھونگی چانگ لانسالّا مازادس۔ 13تینے پیلاطُسی کھونّگا ٹیس، ”کھونگونی سکیون مانگپو کالکھانبو کھیورانّگا تشورّا میراگّا؟“ 14کھونگی سکیون کالکھان چیگّانگ لان ماسالپا، کالون ماثانٹے ہالاس۔

15لوگثول نانگجین پیساگی توسچھینّی توسلا، کالونّی میتشوگسّی لدامکھانّی تسونپا چیگ پھودّادپین۔ 16تیتوسلا لاسنگان چوستے مینگچان گیورکھان برابّاتسونپاجیک یودپین۔ 17میتشوگس دزومّاچیگ، پیلاطُسی کھونگونلا ٹیس، ”برابّایا حضرت عیسیٰ سی کابوا لدامّا زادکھانّی مسیحا زیرّاد، کھونگ نیسکوے نانگنے پھودّالا کھیوجے کا بو لدامّاد؟“ 18(اِمام ُسکیونگون حضرت عیسیٰ سی یکا تشیگچیسپوے کھونگ کھوے لاگا ستادکھانبو پیلاطُس لا گیوسّونگ)۔

19پیلاطُس شخ چوکانی ٹھیسّیکا دُوگستے یود زانے، کھوے نامے ای لونبو کالس، ”تے می نونگسمیدپوا ٹھیمسچادچیسّی نانّگا ڈیس ماڈیس چیازیرنا دانگی ژانلا کھوے سکورلا جیگسنانگچان نییلام تھونگچیسپوے نگا ردوگنگال چھینمو تھونگ۔“

20اِین نانگ اِمام کُنی چھونمو گونتانگ یہُودی پے اُسکیونگونی برابّاپھودچیس تانگ حضرت عیسیٰ سی سادچوگچیسّی پھیا میتشوگسلا کالونلا جُووا پھولچوگچیسّی پھیا لچے کولتے کھاچھامس چوگس۔ 21کالونّی یانگسکیار میتشوگسلا ٹیس، ”کھونگ نیسکوے نانگنے نگے کھیوجے پھیا سو پھود؟“

میتشوگسّی لانتانگس، ”برابّاپھودّا زاد۔“

22پیلاطُسی ٹیس، ”تینے نگے لدامّا زادکھانّی مسیحا، حضرت عیسیٰ سی چی چو؟“

میتشوگسّی لانتانگس، ”کھو کیانگشینگا کیونگ“

23پیلاطُسی ٹیس، ”چیپھیا، کھوے شریعتی گیابگال چی چوستوگ؟“ اِین نانگ میتشوگسّی کُوچو ثانٹے تانگین زیرس، ”کیانگشینگیکا کیونگ۔“

24پیلاطُسی میتشوگسّی نانّگا گیورجا کھیونگ مینیانّوگ سام ماتشاد کھونگونلا ثو یونگستے ہیلینگس پھینگچیس گوزوگسپا کھوے میتشوگسّی لدُونلا چھو کھیونگستے کھورانگی لاگپا غوتا یانگ زیرس، ”ای میبو سادچیسّی نانّگا نگا نونگسمید این، یبوے پھیا کھیوجا نونگسچان اینوگ“

25میتشوگسّی زیرس، ”کھو سادچیسّی نیادگالبو نگاجا تانگ نگاجے ٹھوگوگونلا پھوگشیگ“

26تینے کھونگونی پھیا پیلاطُسی برابّاتسونکھانگنے پھودچوگس یانگ حضرت عیسیٰ سی ستالچاگ گیابتے کیانگشینگیکا کیانگچیسلا ماگمیگونلا ستادس۔

ماگمیگونّی حضرت عیسیٰ سی تشیگپا ثوگس۔

27تینے کالونّی ماگمیگونّی، کالونّی کھارّی ماگمی دزومسّے ناسّے نانّگا حضرت عیسیٰ مسیح کھیرتے ماگتشوگس گانگپو کھونّگا کھورتے دُوگس۔ 28کھونگونی کھونگی نامزا پھودتے، گیالپو گونکھان تسوگسّی نامزا مارپوجیک سکونس، 29یانگ تشیرمانگی تھورشوگ لاستے کھونگی اوا سکونس۔ کھونگی چھاگ یاسپے نانّگا سنیوگبیرجیک کالس یانگ کھونگی لدُونلا پِیکدونگ ژُوگستے کھونّگا تشیگپا ثاگاین زیرس، ”یہُودی پے گیالپوا سیوا۔“ 30تھو گیاب، سنیوگبیربو کھورتے کھونگی اوا لان مانگپو گیابس۔ 31تشیگپا ثاگستے ستینگنے کھونگونی گیالپوے نامزا مارپوبو پھودتے، حضرت عیسیٰ سی کھونگرانگی نامزابو سکونس۔ تینے کھونگ کیانگشینگیکا کیانگچیسلا کھیرس۔

حضرت عیسیٰ سی کیانگشینگا کیانگس۔

32کھونگونی حضرت عیسیٰ مسیح یروشالیمّی گیالسانے پھینگستے ٹھیدتے کھیر زانے کیرین پا شمعُوؔن تھوگ، یانگ ماگمیگونّی کھوا وانگ تانگستے حضرت عیسیٰ سی کیانگشینگ کھورچوگس۔ 33کھونگون گُلگُتا (کابوے تونتاگپو گوی روسپے ساکیاد) زیرکھانّی ناسّیکا لیب۔ 34تیرو کھونگونی حضرت عیسیٰ سی گال#27‏:34 گال زیرکھانبو کیانگشینگیکا کیانگسکھانّی میگونلا زُومو نیونگون تشورچیسّی پھیا تھونّگا تانّگانوگ زیرکھانّی سمان ثیسکھانّی رگونچھانگ دونچیسلا پھولس، اِین نانگ کھونگی تیبو نیانگستے دونّا مازادس۔

35حضرت عیسیٰ سی کیانگشینگیکا کیانگس تشارّاچیگ، کھونگی نامزا گوستے سُوا تھوبدوگ ستاچیسلا گیان گیابس۔ 36یانگ ماگمیگون سیکا دُوگستے حضرت عیسیٰ سی ثونگس۔ 37کھونگی اوی ستاگّا نیادگال کالکھانّی ستاگس پویکا ایبو حضرت عیسیٰ سی یہُودی پے گیالپو این ڈِیستے یودپین۔ 38چاگپا نیس کھونگ نیامپو کیانگشینگیکا کیانگس، چیگپو کھونگی یاسپا یانگ چیگپو یوما۔

39تے ناسّا گیُودتے ڈولکھانگونّی گو یوگتے سمادرا تانگین زیرس، 40”بیت المقدِس شیگستے جاگ سومی نانّگا سیگاین زیرکھان کھیود، کالتیس خُدےبوژا اینّا کیانگشینگی کانے یوگا بابستے رانگ سکیوبّانگ۔“

41تینّا تسوگسلا اِمام کُنی چھونمو گون، شریعتی عالِم گون تانگ یہُودی پے اُسکیونگونیانگ کھونّگا تشیگپا ثاگاین زیرس، 42”کھوے جانماگون سکیوبس، اِین نانگ کھورانگ سکیوبنیانّا میدوگ۔ بنی اِسرائیل پے گیالپو کیانگشینگی کانے داگسا بابستے یونگنا، نگاجے ایمان چوین۔ 43خُدا ایمان چوستے کھوے زیرّادپین، ’نگا خُدےبوژا این‘ تا ستینبا خُدے کھو سکیوبّا زاد دوگّا؟“ 44تینّا تسوگسلا کھونگ نیامپو کیانگشینگیکا کیانگسکھان چاگپاگونّیانگ کھونّگا تشیگ تانگس۔

حضرت عیسیٰ مسیح ڈونگس۔

45نیینگّونگنے چھوتشود سومپا تشوگپا یول گانگپو مونڈیگ سونگ۔ 46چھوتشود سومپا زودشیگّا حضرت عیسیٰ سی عِبرانی سکادّی نانّگا کُوچو ثانٹے سالین مولس، ”ایلوی ایلوی لیما ساباچتھانی“ کابوے تونتاگپو، ”نگے خُدے، نگے خُدے، نیرانگی نگا چیا پھانّگا زادتے این؟“

47تیکا یودکھانگونّی نانگنے کھاچیگی تیبو تشورّاچیگ زیرس، ”کھوے پیغمبر حضرت اِلیاس بودّاراگ۔“ 48تینّامالّا کھونگونی ٹونے چیگ بانگتانگستے راسبالجیک رگونچھانگ سکیورموے نانّگا چوگس یانگ بیرگیکا سکیونتے حضرت عیسیٰ سی دونچیسلا تانگس۔ 49جانگونّی زیرس، ”دوگچوگّانگ۔ پیغمبر حضرت اِلیاس کھو سکیوبالا سکیودّوگّا ستینبا۔“

50حضرت عیسیٰ سی یانگسکیار سکاد چھینمو نیامپو کُوچو سالتے رانگی سکوثوگپو سالس۔ 51تینّا زانے بیت المقدِس سی یولّا گونّے جوگ تشوگپا کھاگنییسّی نانّگا چھاد۔ 52رومکھانگّون بیتے شیکھانّی می ہلژخمہ مانگپو سونتیا لانّگا زادس۔ 53حضرت عیسیٰ سونتیا لانّگا زادتے ستینگنے رومکھانگنے بینگستے یونگکھانگون ہلژخمہ یروشالیمّی گیالسا سونگ یانگ می مانگپوجیکّا تھونگ۔

54حضرت عیسیٰ سی ثونگتے یودکھان ماگیے سپونبو تانگ جان ماگمیگونّی، سانگّول تانگ جونگکھان تشانگما تھونگتے ماثانٹے جیگس یانگ زیرس، ”ای می خُدےبوژا اینکھانبو تانتان اینوگ۔“

55تھاگرینگجیکنے بومو مانگپوے حضرت عیسیٰ سی ٹونگشیسپو ستین یودپین، کھونگونی حضرت عیسیٰ سی گھوسدومگون ریگستے جابشی جوین کھونگ نیامپو گلِیل نے پارلا یونگستے اِنپین۔ 56کھونگونی ٹوا ماگدالّینما مریم، حضرت یُوسفؔ تانگ کھوے نو یعقُوبؔ ی اما حضرت مریم تانگ زبدی بُوژا گُونی اما یودپین۔

حضرت عیسیٰ سی جنازہ قبرستانی نانّگا بورّا زادس۔

57مونچوروبکییس یود زانے حضرت یُوسفؔ زیرکھان ارمتیہ پا می چھوگپوجیک تیرو یونگس، کھوانگ حضرت عیسیٰ سی لوبٹوگسجیک اِنپین۔ 58کھو پیلاطُسی کا سونگتے، کھوا حضرت عیسیٰ سی جنازہ سال زیرتے جُووا پھولس، تینے پیلاطُسی تیبو کھوا تونگ زیرتے کا تانگس۔ 59حضرت یُوسفؔ بی حضرت عیسیٰ سی جنازہ کھیرتے راس لاگمو کوسپوے نانّگا تومستے 60ڈاگی نانّگا کھورانگی پھیا سکوستے یودکھانّی سوما قبرستان پوے نانّگا حضرت عیسیٰ سی جنازہ بورس یانگ قبرستانی کھیکا ردوا لیب لیب چھینموجیک ریلتے کھو سونگ۔ 61ماگدالّینما مریم تانگ جان حضرت مریم گُون قبرستانی چھوگسلا دُوگستے یودپین۔

ماگمیگونّی حضرت عیسیٰ سی قبرستان ثونگس۔

62تھوریزوگپو شابّادّی جاگّا، اِمام کُنی چھونمو گونتانگ فریسی پاگون پیلاطُس یودسا سونگ۔ 63کھونگونی زیرس، ”سپونبولے، تے گوبسکورکھانبوے سونتیا یودتوس کھوے، ’جاگ سومی ستینگنے نگا سونتیا لانگین‘ زیرکھانبو نگاجا ایدتوراگ۔ 64تیبویپھیا جاگ سوم تشوگپا کھوے رومکھانّگا ثونگکھان ریگ بورّا زاد، تے مانے کھوے لوبٹوگسگون یونگستے سپھوربو سکوستے کھیرتے میگونلا کھو شیکھانگونّی ٹونے لانگس زیرثیدچیس اینوگ۔ تینے نگاتانگونّی پھیا ستینگجوگی گوبسکوربو سنگونمے سانگ مانّگا تھوا یونگین۔“

65پیلاطُسی زیرس، ”ماگمیگون کھیرتے تسامتھوب نیانّانگ ستانپو چوستے ثونگچوگ۔“ 66تینے کھونگون سونگتے قبرستان بو ستانپو چوستے گھویکا تھیتسے گیابس، یانگ ماگمیگون ثونّگا بورس۔

Currently Selected:

مادتھا 27: LBJNT

Highlight

Copy