مادتھا 15
15
ژانگما تانگ تشیتو۔
1تینے فریسی پا تانگ شریعتی عالِم کھاچیگ یروشالیمّی گیالسانے حضرت عیسیٰ مسیح یودسا یونگستے ٹیس، 2”نیرانگی لوبٹوگسگونّی نگاتانگی اتا اپو ے لوگثول چیا چاگّانوگ؟ کھونگونی زان زے سانگ سنگونلا لاگپا ٹھوا میدوگ۔“
3حضرت عیسیٰ سی کھونگونلا لانسالس، ”کھیوجے کھیوجارانگی لام لوگثول ثونگچیسلا خُدے حُکم چیا چاگّاد؟ 4سپیرنا خُدے مولتے اینوگ، ’رانگی ابا تانگ اما سیوا چوس، یانگ رانگی ابا یا اما نگان تابسکھانگون سادگوس۔‘ 5اِین نانگ کھیوجے میگونلا کھورانگی ابا یا اما، ’نگے نیرانّگا روگس چوگوشیسپو خُدا پھولین زیرتے وعدہ چوستے این زیرچیس لابدوگ۔‘ 6تیزوگ چوچیسنے کھیوجاگونّی کھونگونلا رانگی ابا یا اما سیوا چو ماچوگّا اینوگ، تینّابویپھیا کھیوجارانگی لام لوگثول ثونگچیسّی نانّگا کھیوجے خُدے شریعت چاگستے اینوگ۔ 7ریاکاری کھیوجے سکورلا خُدے یسعیاہ پیغمبری گیُودتے ماونگ لونگستان سالکھانبو لدینبا اینوگ، کابوے نانّگا،
8’ای میگونّی کھانے نگا سیوا چونانگ
کھونگونی سنینگّون نگانے تھاگرینگ دوگ۔
9کھونگونی نگا چولچیسپو پھانمیتھوگس اینوگ،
چیازیرنا کھونگونی خُدے شریعتی تشابسلا
کھونگرانگونّی چوکھانّی شریعت گون لابدوگ۔‘“
10حضرت عیسیٰ سی میتشوگسلا بودّا زادتے مولس، ”نگے زیرکھانبو نیانتے ہاگوچیسّی سونڈوس چوس۔ 11کھے نانّگا چھاکھانگونّی می تشیتو گیورچوگّا مانوگ، اِین نانگ کھے نانگنے سپیرا نگانپا بینگکھانبوے تشیتو گیور چوگّانوگ۔“
12تینے لوبٹوگسگون کھونگ یودسا یونگستے زیرس، ”نیرانگی مولکھانبوے فریسی پاگون ماثانٹے ٹھیلبا چھاچوگکھانبو نیرانگی کھیینّا؟“
13حضرت عیسیٰ سی لانسالس، ”نگے نامکھے یابّی ماتسوگکھانّی لچانگماگون پاٹاگنے پھودّا زادِین۔ 14تشیرکھا ماچو، تے فریسی پاگون جارا لامستانکھانّی جاراگون اینوگ، کالتیس جارا جیکّی جارا جیکّا لام ستانّا نیسکو سادونگی نانّگا بودین۔“
15حضرت پطرؔس سی زیرس، ”نگاجا گُونلا تے رومسپو ہاگوچوگّا زادّانگ۔“
16حضرت عیسیٰ سی کھونگونلا ٹیا زادس، ”تارُوانگ کھیوجا ہاماگوا؟ 17تھونّگا میدوگّا، کھانے زاکھانّی زانبو ٹودپے نانّگا لیبتے زوگسپونے پھیلوگا بینّگانوگ؟ 18اِین نانگ کھانے بینگکھان سپیرا سیمسّی نانگنے بینگتے میگون تشیتو گیور چوگّانوگ۔ 19چیازیرنا سامبا نگانپا، می سادچیس، رانگی جیدماد مانپا جانما نیامپو لوسڈیل، لوسڈیل نگانپا، کوچیس، ٹھیمسکھونّگا زون گوا تانگچیس تانگ جانمے سچودپے سکورلا نگانپا زیرچیس گُون سیمسّی نانگنے بینّگانوگ۔ 20تے تشانگمے میگون تشیتو گیور چوگّانوگ، اِین نانگ لاگپا ماٹھوا زان زاچیسپوے می تشیتو گیورچوگّا مانوگ۔“
کینانماجیکّی ایمان۔
21تیکانے بینگتے حضرت عیسیٰ مسیح صُور تانگ صیدا ی گیالساگونلا سکیودس۔ 22تے یولجونگسّی کینانما بوموجیک کھونگ یودسا یونگستے کُوچو تانگین زیرس، ”گیالپو حضرت داؤد ّی اولاد مسیح لے، نگیکا سنینگرجے زاد۔ نگے بوموے نانّگا ردود جُوگستے ناگس ثانٹے ستاندوگ۔“
23حضرت عیسیٰ سی چانگ مامولس۔ لوبٹوگسگون حضرت عیسیٰ سی یودسا یونگستے زیرس، ”جوجو ای بوموبو لوگستے لامچوگا زادّانگ چیازیرنا کھو کُوچو تانگین نگاتانگونّی گیابنے یونگدوگ۔“
24حضرت عیسیٰ سی تے بوموبوا لانسالس، ”نگا خُدے لُوگ ستورکھان بنی اِسرائیل پاگون چیگپوے پھیا کالا زادتے این۔“
25کھو کھونگی لدُونلا یونگستے پِیکدونگ ژُوگستے زیرس، ”مسیح لے، نگا روگس چوا زادّانگ۔“
26حضرت عیسیٰ سی مولس، ”ٹھوگوی تاگی بو لینتے کھییا پھانگنا ماڈیگّا اینوگ۔“
27کھوے لانتانگس، ”لدینبا اینوگ مسیح لے، اِین نانگ کھانگداگی چوگتسے کانے کھارجی بودکھانگون کھیی چھونگونگونّیانگ زادّوگ۔“
28حضرت عیسیٰ سی لانسالس، ”بومو، کھیورانّگا ایمان ٹاگپو دوگ۔ کھیرانگی دودپا چوکھانبو ڈوبشیگ۔“ تینّا توستش اوت پویکا ردود بینگتے سونگ یانگ کھوے بومو پھان۔
حضرت عیسیٰ سی می مانگپو پھانچوگا زادس۔
29حضرت عیسیٰ مسیح تیکانے جانگستے گلِیلی تشوے تھاما گیُودتے کیینلا ری جیگیکا سکیودتے جوگسا زادس۔ 30تیرو ژاو، جارا ، ہانڈانگ، لوسّکیونبا تانگ جان مانگپو ٹھیدتے میتشوگس چھینموجیک حضرت عیسیٰ سی لدُونلا دزومس، یانگ کھونگی کھونگون پھانچوگا زادس۔ 31ہانڈانگّونّی سپیرا تانگچیس، کھونگسکھانگون ٹھانگسپو سونگتے، جاؤ گُون ڈولچیس یانگ جارا گونلا تھونگچیس میگونّی تھونّگاچیگ کھونگون ہالاستے بنی اِسرائیلی خُدا ستودپا پھولس۔
حضرت عیسیٰ سی می ستونگژی ڈانگسشوگّا زادس۔
32حضرت عیسیٰ مسیح لوبٹوگسگون بودّا زادتے مولس، ”ای میگون نگا نیامپو دُوگستے جاگما سوم سونگ یانگ زاچیسلا چانگ مید پاسانگ، نگا سنینگرجیا سکییاراگ۔ نگے کھونگون ستوگریا لامچوگنیین میراگ چیازیرنا کھونگون لامّا گویونگ کھورتے گیل ثیدچیس اینوگ۔“
33کھونگی لوبٹوگسگونّی لانتانگس، ”نگاتانّگا ای میتشوگس چھینموا تانگچیسّی تاگی ای ریستونگی نانّگا کانے تھوبین؟“
34حضرت عیسیٰ سی کھونگونلا ٹیا زادس، ”نگاتانگی لاگا تاگی تسام یود۔“ کھونگونی لانتانگس، ”تاگی ردون یانگ نیا چھونگون کھاچیگ یودلے۔“
35حضرت عیسیٰ سی میتشوگسپوا سیکا دوگچیسلا مولس۔ 36کھونگی تاگی ردون تانگ نیاگون نامسّا زادتے خُدا شُکر جْوس ، یانگ تیگون چاگستے لوبٹوگس گونلا سالس، یانگ کھونگونی میتشوگسلا گوستے تانگس۔
37کھونگ تشانگمے تشیمستشیمس زوس۔ ستینگنے لوبٹوگسگونّی لاگما لوسکھانّی تاگی گُون دومسپا پاگتسے چھینمو ردون گانگ۔ 38بومو تانگ ٹھوگوگون ماتھیا کھارجی زاکھانّی می ستونگژی یودپین۔ 39میتشوگس لوگستے لامچوگا زادتے حضرت عیسیٰ سی لوبٹوگسگون نیامپو ٹُھوزینگی نانّگا ژونتے ماگادانّی یولجونگسلا سکیودس۔
Currently Selected:
مادتھا 15: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
