یوہانان 16
16
1حضرت عیسیٰ سی مولس، ”کھیوجاگونّی نگیکا ایمان یودکھانبو پھانگ میپھانگچیسلا نگے ای سپیرا ژانگما کھیوجاگونلا شادتے این۔ 2کھونگونی کھیوجا مجلِسی ٹونے پھینگس تانگین۔ تیزوگ توسّانگ لیباین، کھیوجا سادکھانگونّی سامین کھونگونی خُدا جابستوگ جْوس تے این۔ 3کھونگونی تیتسوگسی لاسگون چوین چیازیرنا کھونگونی یاب ماشیس یا نگانگ۔ 4تیتوسپو لیبّاچیگ، نگے سنگونلا سپانگپودکھانبو کھیوجاگونّی ایدتو یونگچیسّی پھیا نگے یگون کھیوجا شادتے این۔ سنگونلا نگے کھیوجاگونلا مازیرپین چیازیرنا نگا کھیوجاگون نیامپو یودپین۔“
ہلژخمہ رُوح بوے چھاگلاس۔
5حضرت عیسیٰ مسیح مولس، ”تا نگا، نگا کالا زادکھانّی یابّی سکوندونلا لوگستے چھاد، اِین نانگ کھیوجے ٹونے سوجیگیانگ نگا ’کارُو چھاد‘ زیرتے ٹیا میدوگ، 6چیازیرنا نگے ای ژانگما شادپا کھیوجا تشیرکھے گنگستے یودتے اینوگ۔ 7اِین نانگ نگے کھیوجا ٹانگپوذیرّاد، نگا یکانے چھاچیسپو کھیوجے پھیا پھانتھوگسچان این، چیازیرنا نامتشوگپا نگا میچھا تے روگس زادکھانبو کھیوجیکا میسکیود، اِین نانگ کالتیس نگا چھانا نگے کھونگ کھیوجیکا کالین ۔ 8کھونگ سکیودّاچیگ، کھونگی دُنیائی می گونّی دِیگپا، ٹانگپو تانگ خُدے ٹھیمسچاد گُونی سکورلا سامتشولبو نورتے اینکھان ستانّا زادِین۔ 9دِیگپا نی کھونگونی نگیکا ایمان مینگنانگ میچوچیسپو این۔ 10ٹانگپو نی نگا این چیازیرنا نگا نگارانگی یابّیکا لوگستے چھاد یانگ کھیوجاگونّی نگا میتُھونگ۔ 11خُدے ٹھیمسچادبو نی یونگین چیازیرنا خُدے دُنیائی می گونّیکا وانگثولکھان شیطان لا ٹھیمسچادّا زاد تشارتے این۔“
12”تارُونگ نگا شادگیو مامانگپو یود، اِین نانگ کھیوجاگونلا داگسا لچیدپو کھور تھوبچیس میدوگ۔ 13میگون ٹانگپوے چھوگسلا ٹھیدکھان ہلژخمہ رُوح سکیودّاچیگ، کھیوجاگونلا خُدے لدینبے لام ستانّا زادّانوگ۔ کھونگی کھونگرانگی چھوگسنے مامولّا یابنے تشورکھان چیگپو مولّانوگ، یانگ کھیوجاگونلا یونگچیسچانّی توسّی سکورلا شادّا زادِین۔ 14کھونگی نگا سپال کھیونگین چیازیرنا کھونگی نگے زیرکھانگون کھیرتے کھیوجاگونلا شادّا زادِین۔ 15یابّی اینکھان ژانگما نگے این۔ تینّابویپھیا نگے زیرّاد ہلژخمہ رُوح بوے نگے کھانے تشورکھان ژانگما کھیوجاگونلا شادّا زادّانوگ۔“
لوبٹوگسگونّی تشیرکھا تھادپوا گیور۔
16حضرت عیسیٰ مسیح مولس، ”ژاپیگشیگی ستینگنے کھیوجے نگا میتُھونگ یانگ ژاپیگشیگ ستینگنے کھیوجے نگا یانگسکیار تھونگین ۔“
17کھونگی لوبٹوگس کھاچیگی کھونگرانگ چیگ تانگ چیگّا ٹیس، ”کھونگی ’ژاپیگشیگی ستینگنے کھیوجے نگا میتُھونگ یانگ ژاپیگشیگ ستینگنے کھیوجے نگا یانگسکیار تھونگین ‘ یانگ ’چیازیرنا نگا یابّیکا چھاد‘ مولکھانگونّی تونبو چی اینوگ؟“ 18کھونگونی ٹیاین دُوگس، ” ’ژاپیگشیگی‘ تونتاگپو چی اینوگ؟ کھونگی مولکھانبو نگاتانگونّی ہاگوا میراگ۔“
19حضرت عیسیٰ سی کھونگونی تیبوے سکورلا کھونّگا ٹینیین یودکھانبو کھیینپا، کھونگی لوبٹوگس گونلا مولس، ”کھیوجاگونّی نگے، ’ژاپیگشیگی ستینگنے کھیوجے نگا میتُھونگ یانگ ژاپیگشیگ ستینگنے کھیوجے نگا یانگسکیار تھونگین ‘ زیرکھانّی تونبو چیگ تانگ چیگّا ٹیادا؟ 20نگے کھیوجا لدینبا لدینبا زیرّاد، دُنیائی می گونّی گامو چو زانے کھیوجا نگواین، ردوگپو چوین۔ کھیوجاگونّی ردوگپو چوین اِین نانگ کھیوجے ردوگپو تھادپوے نانّگا گیورین۔ 21بوموجیگّا ٹھوگو جور زانے زُومو ثانٹے یونّگانوگ چیازیرنا کھوے توسپو لیبتے اینوگ، اِین نانگ ٹھوگو جور تشارّاچیگ، کھوا زوموبو رجیدین چیازیرنا دُنیائی نانّگا ٹھوگو سکییسکھانبویکا کھو تھادپو چھانوگ۔ 22تینّا تسوگسلا، داگسا کھیوجے ردوگپو چوین، اِین نانگ نگا کھیوجا یانگسکیار تھوگس پاسانگ کھیوجاگونلا تھادپو یونگین۔ کھیوجے کانے تے گاموبو سوینگ کوگستے کھیر مینیان۔ 23تیتوسلا کھیوجے، نگا چانگ ٹیچیسّی گھوسدوم مییونگ۔ نگے کھیوجا لدینبا لدینبا زیرّاد، نگے مینگی نانّگا کھیوجے نگے یابّا چیجیگ ژونانگ سالّا زادِین۔ 24کھیوجے داگسا تشوگپا نگے مینگی نانّگا نگے یابّا چیجیگی پھیانگ ماجوس۔ جونا کھیوجاگونلا تھوبین یانگ تھادپو گانگپو تھوبین۔“
25”داگسا نگے یگون سپے گیُودتے شادتے این، توسپو لیباین، نام نگے نگارانگی یابّی سکورلا کھیوجاگونلا سپے مانپا سالپو سپیرا گیُودتے شادین۔ 26تے جاگّا کھیوجے نگے مینگی نانّگا دُعا چھوس۔ نگے کھیوجاگونّی تشابسلا یابّا جُووا پھولین زیرتے مان، 27چیازیرنا کھیوجاگونّی نگا چامسپا چوچیس یانگ نگا یابّی چھوگسنے یونگکھانبوا ایمان یودچیسپوے یاب کھونگرانگی کھیوجاگونلا چامسپا زادّوگ۔ 28نگا یابّی چھوگسنے دُنیائی نانّگا یونگستے این، تا نگا دُنیا بورتے یابّی سکوندونلا لوگستے چھاد۔“
29تینے حضرت عیسیٰ سی لوبٹوگسگونّی زیرس، ”تا نیرانگی نگاجا گُونلا سپے گیُودتے مامولّا، جالتا سالپو سالپو مولّا زادّوگ۔ 30تا نگاجا گُونلا ہاگو، نیرانگی چیژانگما کھیینّانوگ، نیرانّگا سوجیگیانگ ٹیوا چوچیسّی گھوسدوم میدوگ، چیازیرنا نگاجے ٹیاین سامکھانگون نیرانگی سنگونلا کھیینّا زادّوگ۔ تیبوے جاستے نیرانگ خُدے چھوگسنے سکیودتے اینکھانبوا نگاجے ایمان چواد۔“
31حضرت عیسیٰ سی کھونگونلا مولس، ”کھیوجاگونّی لدینبا ایمان چوادا؟ 32اِین نانگ توسپو لیباین یانگ لیب تشارتے این نام کھیوجا یانتے نگا چیگپو پھانگستے رانگرانگی کھانگپا شوراین۔ تینیانگ نگا چیگپو مان چیازیرنا نگے یاب نگا نیامپو جُوگستے یود۔
33نگا نیامپو ڈیل یودچیسپوے، کھیوجاگونلا جیدے تھوبچیسلا نگے ای سپیراگون زیرتے این۔ ای دُنیائی نانّگا کھیوجاگونلا ردوگنگال تھونگین ، اِین نانگ سپوسپا بورشیگ، دُنیائی وانگثولپاگونّیکا نگا گیال تھوبتے این۔“
Currently Selected:
یوہانان 16: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
