یوہانان 13
13
حضرت عیسیٰ سی لوبٹوگسگونّی کانگپا ٹھوا زادس۔
1پیساگی دونتانگی سانگ سنگونلا، حضرت عیسیٰ مسیح ای دُنیا بو پھانگستے کھونگرانگی یابّیکا سکیودچیسّی توس لیبستے اینکھانبو تھوگیوس یودپین۔ کھونگی ای دُنیائی نانّگا کھونگرانگی میگونلا چامسپا زادس، کھونگونلا تا کھونگی کھونگرانگی چامسپا تشاد گانگپو ستانّا زادس۔ 2کھونگون پھیتوگی دونتانگ دونین یودپین، شیطانی شمعُوؔن ی بُوژا یہُوداؔہ اِسکریوت پے سنینگی نانّگا حضرت عیسیٰ نگولوگ چوچوگچیسّی سامبا سکییچوگس تشارتے اینپین۔
3حضرت عیسیٰ سی یابّی چیژانگما کھونگی چھاگّا ستادا زادکھان تانگ کھونگ خُدے چھوگسنے سکیودکھان یانگ خُدے سکوندونلا لوگستے سکیودچیسپو کھیینّا زادّادپین۔ 4تینے کھونگ چوگتسے لدُونلا جانگس یانگ رانگی کھاتھوگی نامزا پھودّا زادستے لاگپھیس چھینموجیگ کھونگرانگی سکییدپا ثیلّا زادس۔ 5تے ستینگنے کھونگی چیلیمچیی نانّگا چھو لوگستے کھونگرانگی لوبٹوگسگونّی کانگپا ٹھوچیس گوزوگ زادتے سکییدپا ثیلّا زادکھانّی لاگپھیس چھینمو نیامپو پھیازادس۔
6کھونگ شمعُوؔن حضرت پطرؔس سی لدُونلا لیبّاچیگ، حضرت پطرؔس سی زیرس، ”مسیح نیرانگی نگے کانگپا ٹھوا زادّادّا؟“
7حضرت عیسیٰ سی کھوا لانسالس، ”نگے چوکھانبو داگسا کھیورانّگا ہامیگو، اِین نانگ ستینگنے ہاگواین۔“
8حضرت پطرؔس سی زیرس، ”مان، نیرانگی نگے کانگپا مانے ٹھو مازاد۔“
حضرت عیسیٰ سی کھوا مولس، ”کالتیس نگے کھیرانگی کانگپا ماٹھونا تینے نگے نورسکالّی نانّگا کھیورانّگا کھاگ مید۔“
9شمعُوؔن حضرت پطرؔس سی زیرس، ”تیزوگ اینّا، تینے مسیح نگے کانگپا ماتشاد، لاگ تانگ گوانگ ٹھوازاد۔“
10حضرت عیسیٰ سی کھوا لانسالس، ”چھوا ژوگسکھانّی می بوے کانگپاتسا مانے ٹھوگوس میدتے اینوگ، کھوے زوگسپو گانگپو لاگمو اینوگ۔ چیگ چیگ ماستوگس کھیوجا ژانگما ژانگما این۔“ 11حضرت عیسیٰ نگولوگ چوچیسچانّی میبو تھوگیوس یود پاسانگ، چیگ چیگ ماستوگس کھیوجا ژانگما ژانگما این مولس۔
12حضرت عیسیٰ سی لوبٹوگسگونّی کانگپا ٹھو تشارّاچیگ نامزا نامستے کھونگرانگی ناسّیکا ژوگس، یانگ کھونگی لوبٹوگس گونلا ٹیا زادس، ”نگے چوسکھانّی تونبو کھیوجا ہاگوا؟ 13کھیوجے نگا لوبپون تانگ مسیح زیرّانوگ، تیزوگ زیرچیسپو ٹانگپو اینوگ، چیازیرنا نگا تیبو اِین نانگ این۔ 14تا نگا کھیوجاگونّی لوبپون تانگ مسیح اینین جیگ کھیوجے کانگپا ٹھوادنا، کھیوجاگونّیانگ چیگ تانگ چیگی کانگپا ٹھوگوس۔ 15نگے چوسکھانگون کھیوجیانگ چوچیسّی پھیا کھیوجاگونلا نگے سپیجیگ ستانتے این۔ 16نگے کھیوجا لدینبا لدینبا زیرّاد، یوگپو سپونبوے سانگ ٹاگا مانوگ، یانگ لون کھیونگکھانبو لون کالکھانبوے سانگ ٹاگا مانوگ۔ 17تا کھیوجاگونلا یگون ہاگوتے اینوگ۔ ایگونّیکا لاگلین چونا برکت تھوبین۔“
حضرت عیسیٰ نگولوگ چوچیسپو کھونگی لونگستان سالس۔
18حضرت عیسیٰ مسیح مولس، ”نگے کھیوجا تشانگمے سکورلا زیرّامید، نگے لدامسکھانگون نگا گیوسیود۔ اِین نانگ ہلژخمہ شوقبُو بوے نانّگا، ’نگا نیامپو زاکھانبوے نگا نگولوگ چوین‘ ڈیسکھانبو ڈانڈا ڈوبگوس۔ 19یگون چونگ زانے کھیوجاگونّی نگا لدامّا زادکھانّی مسیحا اینکھانبو ایمان چوچیسّی پھیا نگے ایبو جونگی سانگ سنگونلا داگسا کھیوجاگونلا زیرّاد۔ 20نگے کھیوجا لدینبا لدینبا زیرّاد، نگے کالکھانگونلا گاسوس چوکھانگونّی نگا گاسوس چوستے این، یانگ نگا گاسوس چوکھانگونّی نگا کالا زادکھانبوا گاسوس جْوس تے اینوگ۔“
21تیبو مولتے ستینگنے حضرت عیسیٰ سی سیمسلا ماثانٹے ناگس تھونگ، یانگ گواہ سالتے مولس، ”نگے کھیوجا لدینبا لدینبا زیرّاد، کھیوجے ٹونے چیگ چیگی نگا نگولوگ چوین۔“
22تینے لوبٹوگسگونّی چیگ تانگ چیگّا ستاس، چیازیرنا کھونگی سوی سکورلا مولتے این سوانگ گیُوس میدپین۔ 23حضرت عیسیٰ سی چیسپا زادکھانّی لوبٹوگسپو کھونگی لدویکا دُوگستے یودپین۔ 24شمعُوؔن حضرت پطرؔس سی گو سکولاین تے لوبٹوگسپوا زیرس، حضرت عیسیٰ سی سوی سکورلا مولتے این زیرتے ٹیسّانگ؟
25کھو حضرت عیسیٰ سی چھوگسلا نییستے کھونّگا ٹیس، ”مسیح کھو سو اینوگ؟“
26حضرت عیسیٰ سی لانسالس، ”نگے تاگی دابینّی نانّگا سپاگستے تانگچیسچانبو این۔“ تینے حضرت عیسیٰ سی شمعُوؔن اِسکریوت پے بُوژا یہُوداؔہ تاگی سپاگسکھانبو سالس۔ 27تاگی کھامبوبو زاچیگ شیطان کھوے نانّگا ژوگس۔ حضرت عیسیٰ سی کھوا مولس، ” کھیرانگی چوچیسچانبو گیوگسپا چوس۔“ 28اِین نانگ کھارجی زین یودکھان ژانژانگما حضرت عیسیٰ سی کھوا تیزوگ چیا مولتے این چانگ ہاماگو۔ 29یہُوداؔہ پینے کھاگکھورپا اینپا، کھاچیگی حضرت عیسیٰ سی کھوا توسچھینّی پھیا گھوسدومگون نیوچیس یا نیالباچان گُونلا پینے تانگچیسّی پھیا مولتے اینڈو سام۔ 30یودے تاگی کھامبوبو زوستے کھو پھیلوگا بینگتے سونگ، تے زانے تشان سونگتے یودپین۔
حضرت عیسیٰ سی حضرت پطرؔس سی کھونگ میشیسزون تانگچیس لونگستان زادس۔
31یہُوداؔہ سونگ تشارّاچیگ حضرت عیسیٰ سی مولس، ”تا اِبنِ آدم سپال تھوبین، یانگ کھو گیُودتے خُدا سپال تھوبین۔ 32کالتیس کھوے جاستے خُدا سپال تھوبّادنا، خُدے کھونگرانگی نانّگا ثاسلانگ سپال گیوگسپا سالّا زادِین۔ 33نگے ٹھوگوگون، کھیوجاگون نیامپو نگا تارُونگ توس نیونگونجیگ لوسین۔ کھیوجے نگا ژالین، کازوگ نگے یہُودی پے اُسکیونگونلا زیرپین داگسا کھیوجاگونلانگ زیرّاد، کارُو نگا چھاد کھیوجاگون تیرو یونگ مینیان۔ 34نگے کھیوجاگونلا حُکم سوماجیگ تانّگاد، چیگ تانگ چیگّا چامسپا چوس۔ نگے کھیوجا چامسپا چوا تسوگسلا، کھیوجاگونّیانگ چیگ تانگ چیگّا چامسپا چوگوس۔ 35تیبوے میژانگمالا کھیوجاگون نگے لوبٹوگس اینکھانبو شیساین، کالتیس کھیوجے چیگ تانگ چیگّا چامسپا چونا۔“
36شمعُوؔن حضرت پطرؔس سی حضرت عیسیٰ سی زیرس، ”مسیح نیرانگ کارُو سکیودچیس این؟“
حضرت عیسیٰ سی لانسالس، ”نگا چھاسا داگسا کھیرانگ یونگ مینیان، اِین نانگ ستینگنے کھیرانگ نگا ڈانگستے یونگین۔“
37حضرت پطرؔس سی ٹیس، ”کیے مسیح نگا نیرانگ نیامپو داگسا چیا یونگ مینیان۔ نیرانگی پھیا نگے سروک تانگین۔“
38حضرت عیسیٰ سی لانسالس، ” کھیرانگی نگے تونلا رانگی ثوگپو تانگینّا؟ نگے کھیورانّگا لدینبا لدینبا زیرّاد، چاپوے چاسکاد تانگی سانگ سنگونلا، کھیرانگی نگا لان سوم میشیسزون تانگین۔“
Currently Selected:
یوہانان 13: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
