Matej 6
6
O Isus sikavol te da taro ilo
1O Isus vadži vaćarda: “Pazin te ma ćeren tumare buća taro pravednost angle manuša von te dičhen tumen thaj te divin pe tumenđe. Te ćerden kava, ni ka avol tumen plata ko tumaro Dad savo si ko nebo.
2Golese kana de e čororenđe, ma galami angle tute, sar so ćeren e dujemujenđe ani sinagoga thaj pe droma te bi hvalina len e manuša. Čače vaćarav tumenđe, aver nagrada ni ka dobin sem goja tare manuša. 3Thaj kana de e čororenđe, te ni džanol ćo levo va so ćerol o desno. 4Gija te de garandoj e čororen thaj ćo Dad te dičhol kaj gova ćere čorale, a vov ka poćinol tuće.”
O Isus sikavol e sikaden sar te molin pe
5O Isus vadži vaćarda: “Thaj kana molin tumen, ma te aven sar kola dujemujenđe, save but manđen ke sinagoge thaj ke anglune droma ačhen thaj molin pe te dičhen len e manuša. Čače vaćarav tumenđe, aver nagrada ni ka dobin sem goja tare manuša. 6A tu, kana moli tut, dža ani ći soba kaj ka ave korkoro, phande ćo vudar thaj moli tut će Devlese savo si ano garajipe thaj ćo Dad savo dičhol ano garajipe, ka poćinol tuće. 7Thaj kana molin tumen, ma vaćaren but lafura sar kola save ni džanen e Devlese, golese so von den gođi kaj ka aven uslišime paše but lafura. 8Golese ma aven sar von, golese kaj tumaro Dad džanol so trubul tumenđe i angleder nego so molin le. 9Gija molin tumen:
‘Dade amareja, savo san ano nebo,
nek svetil pe ćo alav.
10Te avol ćiro Carstvo.
Te avol ćiri volja,
sar ki phuv gija ano nebo.
11Mangro savo trubul amen,
de amen ađive
12thaj oprosti amare grehura,
sar amen so oprosti kolenđe
so grešin premal amende.
13Thaj crde amen taro iskušenje,
al ikal amen taro bilačhipe.
[Golese kaj si ćiro Carstvo,
thaj zor, thaj i slava ane sa e đivesa. Amin.]’
14Golese ako oprostin e manušenđe save grešin premal tumende, i o Dad tumaro o nebesko ka oprostil tumenđe. 15Al ako ni oprostin e manušenđe lenđe grehura, ni o Dad tumaro e grehura tumare ni ka oprostil.”
O Isus sikavol taro post
16O Isus vadži vaćarda: “Thaj kana postin, ma aven sar e dujemujenđe so ćeren pe žalosna, golese so von ćeren žalosna muja te dičhen len e manuša kaj postin. Čače vaćarav tumenđe kaj aver nagrada ni ka dobin sem goja tare manuša. 17Al tu kana posti, makh ćo šoro uljesa thaj thov ćo muj, 18te ni dičhen e manuša kaj posti, nego samo ćiro Dad, savo si ano garajipe. Thaj ćo Dad savo dičhol ano garajipe, ka poćinol tuće.”
O Isus sikavol taro barvalipe
19O Isus vadži vaćarda: “Ma ćiden tumenđe barvalipe kate pi phuv, kaj o moljco thaj i rđa rumil thaj kaj e čora ka uljen thaj ka čoren. 20Ćiden tumenđe barvalipe ko nebo, kaj ni o moljco ni i rđa ni rumil thaj kaj e čora ni uljen thaj ni čoren. 21Golese, kaj si ćo barvalipe, gothe ka avol ćo ilo. 22I jakh si sar i svetiljka e telose. Ako gija ćiri jakh si sasti, sa ćo telo ka avol pherdo svetlosa. 23Te si ći jakh bilačhi, sa ćo telo ka avol ani tama. Gijate, ako si o svetlost ane tute tama, tegani i tama ka avol but po bari ane tute! 24Ni jekh našti kandol tari jekh drom dujen gospodaren. Il jekhe ka mrzil, a dujtone ka manđol, il jekhe ka šunol, a e dujtone ni ka podnosil. Našti kanden e Devle thaj o barvalipe.”
Ma brini tut!
25O Isus vadži vaćarda: “Golese vaćarav tumenđe: Ma brinin tumen za sa tumaro džuvdipe, dal ka avol tumen so te xan il so te pijen, ni tumare telose so ka uraven! Naj li o džuvdipe po važno taro xape a o telo tare šeja? 26Dičhen e čirikljen ko nebo! Ni sejin, ni ćiden thaj ni čhuven ane ambara thaj tumaro Dad ko nebo parvarol len. Naj li sen tumen po vredna lendar? 27A šaj li neko tumendar golesa so brinil pe te baravol po džuvdipe za jekh đive? 28Thaj sose brinin tumen šejenđe? Dičhen šukar e luluđa ko polje sar baron. Khanči ni ćeren thaj ni suven šeja. 29A vaćarav tumenđe kaj ni o Solomon ani pi slava ni inđarda gija lačhe šeja sar akala luluđa. 30A ako o Dol uravol e biljke ko polje, so ađive si gothe, theara ani kubava čhuden pe, kobor tek tumen ka uravol? Sose gaći zala pačan? 31Golese, ma vaćaren ki dar: ‘So ka xa?’ il ‘So ka pija?’ il ‘So ka urava?’ 32Gija roden e manuša save ni džanen e Devlese, a tumaro Dad ano nebo džanol kaj sa kava trubul tumenđe. 33Golese angleder tare sa roden o Carstvo thaj o pravednost e Devleso thaj o Dol sa kava ka dol tumen.
34Ma brinin tumen e thearaće, i thearin nek brinil pe pese. Ađivesutni muka si dovoljno za ađive.”
Currently Selected:
Matej 6: GSP
Highlight
Share
Copy
Want to have your highlights saved across all your devices? Sign up or sign in
