Luka 1
1
O Luka bičhalol lil e Teofilese tare Isuseso džuvdipe
1Mangleja Teofile, sar so džane, but džene lije te pisin tare kova so sasa, so o Dol obećisada prekale prorokura, a ćerdilo maškar amende. 2Pisisade amenđe kola save korkore dikhlje vadži tare anglune đivesa thaj ćerdile sluge e Devlese Lafese, 3gija i me, mangleja Teofile, tuće pisiv sa redasa, golese so sa taro anglunipe ispitujisadem, 4te šaj ave uverimo kaj si čačipe kova so sikade tut.
O anđelo vaćarol taro bijandipe e Jovaneso e Krstiteljeso
5Kana sasa o Irod caro ani Judeja, nesavo manuš savo akhardola Zaharija sasa svešteniko tare Avijineso redo. Lesi romni sasa tari kuštik e Aaronesi thaj akhardola Jelisaveta. 6Solduj džene sesa čačutne anglo Dol thaj živisade pale zapovestura thaj palo Zakon e Gospodeso bizo nisavo bilačhipe. 7Al len ni sesa čhave, golese kaj i Jelisaveta naštine te ačhol khamni, a solduj džene sesa već purane.
8Jekh đive, o Zaharija služisada e Devle ano Hram golese kaj palo dužnost sasa leso redo, 9golese so, palo adeti e sveštenikurengo birisade le kockasa te džal ano Hram e Gospodeso te kadil. 10Kana o Zaharija dija ano Hram te kadil, but manuša molisajle avral.
11Tegani e Zaharijase sikadilo o anđelo e Gospodeso savo ačhilo ki desno rig taro žrtveniko e kadimaso. 12Kana o Zaharija dikhlja le, uznemirisajlo thaj but darajlo.
13Al o anđelo vaćarda lese: “Ma dara, Zaharije! Ćiri molitva sasa šundi. Ćiri romni i Jelisaveta ka bijanol murše thaj tu ka de le alav Jovan. 14Tu ka ave radosno thaj baxtalo thaj but džene ka aven blagoslovime lese bijandimasa, 15golese kaj vov ka avol baro anglo Gospod. Nikad ni ka pijol mol ni zuralo pijipe. Vov ka pherdol e Svetone Duxosa dok si ano vođi pe dako. 16O Jovane bute Izraelcuren ka iril anglo Gospod, angle lengo Dol. 17Vov ka džal anglo Gospod sar glasniko ano Duxo thaj ano zuralipe e prorokoso e Ilijaso. Ka miril e ile e dadenđe premale e čhave thaj ka iril kolen save ni šunen ano gođaveripe e pravednikurengo. Sa kava ka ćerol te pripremil e manušen te šaj aven spremna e Gospodese avimase.”
18O Zaharija vaćarda e anđelose: “Pale soste me gova ka džanav? Golese kaj sem purano thaj mingri romni si bute beršenđi.”
19O anđelo phenda lese: “Me sem o Gavrilo, o anđelo savo ačhol anglo Dol. Bičhaldo sem te vaćarav tuće kava lačho lafi. 20Akh, ka ave laloro thaj ni ka vaćare dži gova đive dži kaj sa gova ni ćerdol, golese so ni pačajan ane mingre lafura save ka pherdon ano pravo vreme.”
21E manuša ađućarde e Zaharija thaj čudisajle sose gaći majisajlo ano Hram. 22Al kana o Zaharija iklilo, naštine te vaćarol. Vov dija len znakura golese kaj sasa laloro. Gija e manuša haljarde kaj sasa le vizija ano Hram.
23Kana nakhle e đivesa lese služimase ano Hram, o Zaharija đelo čhere. 24Pale kala đivesa i Jelisaveta lesi romni ačhili khamni thaj ni iklili avral taro čher pandž čhon.
25Golese i Jelisaveta vaćarda: “Gija ćerda manđe o Gospod! Ane kala đivesa sikada manđe po milost thaj uljarda mandar i ladž maškare manuša kaj ni sasa man čhave.”
O anđelo vaćarol taro bijandipe e Isuseso
26Kana i Jelisaveta sasa šovto čhon khamni, o Dol bičhalda e anđelo e Gavrilo ano Galilejsko foro o Nazaret 27ki čhej i Marija savi sasa mangli romese e Josifese savo sasa tari kuštik e carosi e Davidesi.
28Kana o anđelo o Gavrilo avilo late, phenda: “Av radosno, tu so arakhljan milost. O Gospod si tusa. [Blagoslovimi san maškare džuvlja!]”
29I Marija but darajli tare lese lafura thaj dija gođi savo sasa kava pozdrav.
30Al o anđelo o Gavrilo phenda laće: “Ma dara, Marijo! Golese kaj arakhljan milost anglo Dol. 31Akh, ka ačhe khamni, ka bijane čhave thaj ka de le alav Isus. 32Vov ka avol baro thaj ka akhardol Čhavo e Embare Devleso. O Gospod o Dol ka dol le o presto lese paradadeso e Davideso. 33Vov ka carujil ane kuštika e Jakovese ane sa e đivesa thaj lese carstvose ni ka avol krajo.”
34Tegani i Marija pučlja e anđelo: “Sar ka avol gova kana sem me vadži čhej?”
35O anđelo o Gavrilo vaćarda laće: “O Sveto Duxo ka avol pe tute thaj o zuralipe e Embare Devleso ka učharol tut. Golese kaj o čhavoro so ka bijandol ka avol sveto thaj ka akhardol Čhavo e Devleso. 36Akh, i ćiri bibi i Jelisaveta ačhili khamni ane purane berša thaj ka bijanol murše. E manuša vaćarde kaj voj naštine te ačhol khamni, al akana si šov čhon khamni. 37Golese kaj o Dol šaj te ćerol sa so phenol!”
38I Marija phenda: “Ake, me sem sluškinja e Gospodesi. Nek avol manđe palo ćiro lafi!”
Thaj o anđelo đelo latar.
I Marija džal te dičhol e Jelisaveta
39Pale gola đivesa i Marija spremisajli thaj siđarda ani bregali phuv ano foro e Judejako. 40Kana resli odori, đeli ano čher e Zaharijaso thaj pozdravisajli e Jelisavetasa.
41Kana i Jelisaveta šunda e Marijako pozdrav, čhelda o čhavo ane lako vođi thaj i Jelisaveta pherdili Svetone Duxosa. 42Andare sa o glaso vaćarda e Marijaće: “Emblagoslovimi san maškare sa e džuvlja thaj blagoslovimo si o čhavo ane ćiro vođi. 43Kotar manđe kava čast kaj tu, i dej mingre Gospodesi, aviljan ke mande? 44Golese dikh, kana šundem ćiro pozdrav, taro radost čhelda o čhavoro ane mingro vođi. 45Blagoslovimi san tu so pačajan kaj ka pherdol kova so vaćarda tuće o Gospod!”
I Marija slavil e Devle
46Tegani i Marija vaćarda:
“Slavil mingri duša e Gospode!
47Mingro duxo veselil pe ano Dol, ane mingro Spasitelji,
48golese so sasa milostivno e poniznone sluškinjaće.
Golese dikh, od akana ka akharen man blagoslovimi sa e kuštika.
49Golese so ćerda manđe baro šukaripe o Zuralo Dol.
Sveto si leso alav!
50Vov si milostivno sa e manušenđe tari kuštik dži i kuštik,
kolenđe save daran lestar.
51Pe vastesa sikada piro zuralipe,
čhudija pestar kolen save si barikane ane ile thaj ani gođi.
52Čhudija e vladaren taro lengo presto,
thaj vazdija e poniznonen.
53E bokhalen čaljarda šukarimasa,
a e barvalen mukhlja čuče vastencar.
54Pomožisada e Izraele, ćire sluga,
golese kaj dol pe gođi taro milost,
55sar so obećisada amare paradadenđe,
e Avraamese thaj lese potomkurenđe ane sa e đivesa.”
56I Marija bešli e Jelisavetasa paše trin čhon thaj pale gova irisajli čhere.
Bijandilo o Jovan o Krstitelj
57Kana i Jelisavetaće avilo o sato te bijanol, bijanda čhave. 58Laće pašutne thaj lačhi familija šunde kaj o Gospod sikada laće baro milost thaj radujisajle lasa.
59Kana e čhavore sesa ohto đive, avile te ćeren lese suneti thaj manglje te den le alav lese dadeso – Zaharija.
60Al i Jelisaveta vaćarda: “Na, leso alav ka avol Jovan!”
61Von phende lačhe: “Naj tut khoni ani ćiri familija gole alavesa!” 62Tegani vastencar pučlje e dade e Zaharija sar bi vov manđola te avol leso alav.
63Thaj o Zaharija manglja khanči pe soste šajine te pisil thaj pisisada: “Jovan ka avol leso alav.”
Thaj savore čudisajle.
64Tare jekh drom putardilo leso muj thaj lesi čhib, tegani o Zaharija lija te vaćarol thaj lija te slavil e Devle.
65I dar e Devlesi avili ane sa lenđe pašutne thaj ki sa i bregali Judeja vaćarda pe tare kava so sasa. 66Savore so šunde gova, dije gođi tare gova thaj phende: “So ka avol tare kava čhavo? Golese so o va e Gospodeso sasa pe leste.”
O Zaharija prorokujil tare piro čhavo o Jovane thaj taro Mesija
67O Zaharija, e Jovaneso dad, pherdilo e Svetone Duxosa thaj prorokujisada:
68“Blagoslovimo si o Gospod o Dol e Izraeleso,
golese so avilo thaj otkupisada e manušen!
69Vazdija amenđe e zurale Spasitelje,
tari kuštik e carosi e Davidesi, pe slugase,
70sar so vaćarda ano purano vreme
andare muja tare pe sveta prorokura,
71kaj ka ikalol amen tare amare dušmanura
thaj tare vasta savorenđe save mrzin amen.
72Sasa milosno amare paradadenđe,
thaj ispunisada piro sveto savez,
73savez savo dija e Avraamese amare paradadese,
74te ikalol amen tare vasta amare dušmajenđe,
te šaj kanda e Devle bizi dar,
75ano svetost thaj ano pravednost
angle leste sa dok sam džuvde.
76A tu Jovane, čhaveja mingreja, ka ave akhardo proroko e Embare Devleso,
golese so ka dža anglo Gospod te pripremi lese o drom.
77Ka sikave lese manušen sar te pindžaren o spasenje
prekalo oproštenje tare lenđe grehura.
78Golese so si e Devleso ilo milostivno,
tare savo ka avol amenđe o svetlost e sabalinako tari visina,
79te svetlil kolenđe so bešen ano kalipe thaj ani sena e merimasi,
a amare pingre te usmeril ko drom taro mir.”
80A o čhavoro o Jovane barilo thaj zurajlo duxosa. Kana barilo, đelo ani pustinja sa dži kaj ni iklilo angle Izraelcura te propovedil.
Currently Selected:
Luka 1: GSP
Highlight
Share
Copy
Want to have your highlights saved across all your devices? Sign up or sign in
