Matej 28
28
O Isus uštilo andar e mule
1Posle o savato, ande zora savo sas prvo đes ando kurko, avili e Marija andar e Magdala thaj e aver Marija te dićhen o limori. 2Thaj katar jekhvar sas o baro potres, kaj e Gospodesko anđeo fuljisto andar o nebo, avilo džiko limori, spidas o bar katar o vudar e limoresko thaj bešlo pe leste. 3A vo sijalas sago munja, thaj e drze pe leste sas parne sago o iv. 4E stražarja izdranas e daratar thaj peline ando nesvest kana dikhline les.
5Askal o anđeo phendas e manušnjenđe: “Tumen na daran! Kaj džanav kaj roden e Isuse savo sas razapnime. 6Ali vo naj akate! Uštilo andar e mule sago kaj vi phendas tumenđe! Aven te dićhen o than kaj pašljolas, 7pa sigo džan thaj phenen lešće učenikonenđe: ‘Uštilo andar e mule thaj akana džal angle tumende ande Galileja. Okote dićhena les.’ Ake so sas man phendem tumenđe.”
8Pherde dar ali vi bahtale, e manušnja sigo teljardine katar o limori thaj prastaine te javin godova lešće učenikonenđe. 9Katar jekhvar angle lende avilo o Isus thaj phendas lenđe: “Zdravo!” Von avile majpaše leste, astardine lešće pungre thaj poklonisajle lešće. 10Askal o Isus phendas lenđe: “Na daran! Džan thaj javin mungre phralenđe te džan ande Galileja. Okote dićhena man.”
E stražarja sas poćinde te hohaven kaj sas čordo e Isusesko telo
11Dok e manušnja sas po drom karingal e učenikurja, varesave katar e stražarja đele ando gav thaj phendine e šorvale rašajenđe sa so dogodisajlo. 12Askal e šorvale rašaja sastaisajle e starešinenca thaj dogovorisajle te den e vojnikonenđe but love. 13Thaj phendine lenđe: “Phenen, ‘Arjat dok amen sovasas aviline e Isusešće učenikurja thaj čordine les.’ 14A te pale akava ašunel o upravniko, amen ćerasa lesa svato te tumen či avel problemurja.” 15E vojnikurja line e love thaj ćerdine sago kaj sas lenđe phendo. Gajda akava svato buljilo maškar e Židovurja thaj zadržisajlo sa dži ađes.
O Isus bičhalel e učenikonen te buljaren e Bahtali nevimata
16E dešujek učenikurja đeletar ande Galileja, pe gora, pe savi naredisardas lenđe o Isus te džan. 17Kana dikhline e Isuse, poklonisajle lešće. Ali varesave lendar palem posumnjisardine. 18Askal o Isus avilo dži lende thaj phendas: “Dini si manđe sa e vlast po nebo thaj pe phuv. 19Zato džan thaj ćeren sa e themen te aven mungre učenikurja! Bolen len ando alav e Dadesko thaj e Čhavesko thaj e Sveto Duhosko, 20thaj sikaven len te inćaren sa so zapovedisardem tumenđe. Ake me sem tumenca ande sa e đesa, sa džiko krajo e themesko.”
Currently Selected:
Matej 28: RČB
Highlight
Share
Copy
Want to have your highlights saved across all your devices? Sign up or sign in
