Jovano 3
3
O Isus thaj o Nikodem
1Varesavo ugledno manuš, savo akhardolas Nikodem, sas fariseji thaj jek katar e vodeće manuša maškar e Židovurja. 2Vo avilo ko Isus raćava thaj phendas lešće: “Sikavneja, džanas kaj san tu sikavno saves o Del bičhaldas. Kaj khonik naštik ćerel kasave čudesne znakurja save tu ćeres, a te o Del naj lesa.”
3A o Isus phendas lešće: “Čačes, čačes phenav tuće: ako o manuš či bijandol palem, naštik dićhel e Devlesko carstvo.”
4O Nikodem phučla les: “Sar šaj o manuš te bijandol kana si već phuro? Naštik valda, po dujto data te del ando đi pire dejako thaj palem te bijandol?”
5O Isus phenda lešće: “Čačes, čačes phenav tuće: ako o manuš či bijandol katar o paj thaj katar o Duho, naštik del ande Devlesko carstvo. 6So si bijando e manušestar – manuš si, a so si bijando e Duhostar – duho si. 7Na čudisar tut kaj phendem kaj trubun palem te bijandon. 8E balval phurdel kaj kamel. Ašunes lako šumo, ali či džanes katar avel niti kaj džal. Gajda si svakonesa savo si bijando katar o Duho.”
9A o Nikodem phučla e Isuse: “Sar šaj godova te avel?”
10O Isus phenda lešće: “Tu san poštuime sikavno ando Izrael, a godova či džanes? 11Čače, čače phenav tuće: phenas okova so džanas, thaj svedočisaras pale okova so dikhlam, ali tumen či prihvatin amaro svedočanstvo. 12Ako či paćan manđe kana phenav tumenđe pale stvarja save si pe phuv, sar paćana kana phenav tumenđe pale stvarja save si po nebo? 13Kaj nikad khonik či đelo po nebo thaj boldape osim o Čhavo e Manušesko savo fuljisto katar o nebo. 14Thaj sago kaj o Mojsije ande pustinja vazdas pe rovlji e sapes katar e bronza, gajda moraš te avel vazdino vi o Čhavo e Manušesko, 15te svako savo paćal ande leste avel les večno trajo.”
16Kaj, o Del gadići volilas akava them kaj dija pire jedino bijande Čhave te ko god paćal ande leste, či propadnil, nego te avel les večno trajo. 17Kaj o Del či bičhaldas pire Čhaves po them te sudil e themešće, nego te o them spasilpe kroz leste.
18Ko paćal ande leste, naj osudime, a ko či paćal već si osudime, kaj či paćaja ando alav e jedino bijande Devlešće Čhavesko. 19A pale akava sudilpe lenđe kaj o svetlo avilo po them, ali o them volilas e tama umesto o svetlo, kaj lenđe dela sas bilačhe. 20Ko god ćerel bilačhipe, mrzil o svetlo thaj či inkljel po svetlo, te lešće dela či inkljen po videlo. 21A ko ćerel so si čačipe, inkljel po svetlo te sikadonpe kaj si lešće dela ćerde kroz o Del.
O Jovano savo bolelas del čast e Isusešće
22Pale godova o Isus đelotar pire učenikonenca ande Judejske gava. Okote ačhilo lenca thaj bolelas.
23A o Jovano isto bolelas ando than Enon, paše ko gav Salim, kaj okote sas but paj thaj e manuša avenas thaj bolenaspe. 24O Jovano askal još nas čhudino ande tamnica. 25A maškar e Jovanošće učenikurja thaj aver Židovo avilo džike čingara zbog o obredno thoipe. 26Askal e učenikurja avile ko Jovano thaj phendine lešće: “Sikavneja, okova kaj sas tusa pe istočno rig katar e reka Jordan, pale savo tu svedočisardan, eke bolel e manušen thaj savora džan leste umesto amende.”
27A o Jovano phendas: “Khonik naštik ćerel khanči, ako godova naj lešće dino katar o Del. 28Tumen korkoro sen mungre svedokurja kaj phendem: ‘Me najsem o Hristo, nego bičhaldo sem angle leste.’ 29Pe svaturja samo o džamutro ženilpe, a o ćirvo, savo ažućarel thaj čhol kan, pherdo si bah dok ašunel e džamutresko glaso. Askal godoja bah si mungri thaj akana si potpuno. 30Vo trubul te avel sa majbaro, a me sa majcikno.”
31Okova savo avel opral, pe savorende si; a okova savo si katar akaja phuv, pripadil e phuvjaće, thaj ćerel svato pale akale phuvjaće stvarja. Ali okova savo avel andar o nebo, pe savorende si. 32Vo svedočil pale kova so dikhlas thaj so ašundas, ali khonik či prihvatil lesko svedočanstvo. 33Ko prihvatil lesko svedočanstvo, potvrdil kaj si o Del čačutno. 34Okoles saves o Del bičhaldas, e Devlešće alava mothol, kaj o Del del les Duho ando izobilje. 35O Dad volil e Čhaves thaj sa dija ande lešće vas. 36Ko paćal ando Čhavo, si les večno trajo, a okova savo naj paćivalo e Čhavešće, či primila večno trajo, nego pe leste ačhel e Devlešći holji.
Currently Selected:
Jovano 3: RČB
Highlight
Share
Copy
Want to have your highlights saved across all your devices? Sign up or sign in
